Read Waray Samarenyo Meaning Based Numero 27 Bible Online

Numero 27 - Waray Samarenyo Meaning Based bible

Numero 27

¹Hira Maala, Noa, Hogla, Milca, ug Tirsa amo an mga anak nga kababayen-an ni Salfaad nga anak ni Hefer nga anak ni Galaad nga anak ni Maquir nga anak ni Manases nga anak ni Jose.

²Kinmadto ngan tinmindog hira ha atubangan nira Moises, Eleazar nga padi, mga pangulo, ngan bug-os nga bungto dida han agian han Tulda han GINOO, ngan nagsiring,

³“Namatay an amon amay didto ha kamingawan, nga waray makagbilin hin mga anak nga kalalaken-an. Diri hiya usa han mga kaupod ni Core nga sinmupil han GINOO; namatay hiya tungod han iya kalugaringon nga sala.

⁴Tungod la nga waray niya mga anak nga kalalaken-an, kay ano nga mapapara an ngaran han amon amay tikang han mga tulin han Israel? Bahini man kami han iginhatag nga malon ha mga kauropdan han amon amay.”

⁵Gindara ni Moises an ira sumbong ngadto han GINOO,

⁶ngan nagsiring ha iya an GINOO,

⁷“Matadong an pinangangaro han mga anak nga kababayen-an ni Salfaad; tagi hira hin bahin han malon nga iginhatag ha mga kauropdan han ira amay. Ighatag ha ira an iya malon.

⁸Sumati an mga tawo han Israel nga kon mamatay in usa ka tawo nga waray anak nga lalake, ighahatag an iya malon ngadto han iya anak nga babaye.

⁹Kon waray niya anak nga babaye, ighahatag ini ngadto han iya kabugtoan nga kalalaken-an.

¹⁰Kon waray niya kabugtoan nga kalalaken-an, ighahatag ini ngadto han kabugtoan nga kalalaken-an han iya amay.

¹¹Kon waray niya kabugtoan nga kalalaken-an o mga bata, niyan an tatagan hini amo an iya labi ka suok nga urupod, ngan pag-aangkonon ini nga iya kalugaringon nga malon. Pagtutumanon ini han mga tawo han Israel nga kinahanglanon nga balaod. Ako nga GINOO amo an nagsugo ha imo.”

¹²Nagsiring kan Moises an GINOO, “Sagka han Bukid Abarim ngan lantawa an tuna nga akon ighahatag ha mga Israelita.

¹³Katapos mo paglantawa hini, mapatay ka sugad han imo bugto nga hi Aaron,

¹⁴kay sinmupil kamo nga duha han akon sugo didto han kamingawan han Zin. Han pagngurutob han bug-os nga bungto kontra ha akon didto ha Meriba, waray kamo magtug-an han akon baraan nga gahom ha ira atubangan.” (An Meriba amo an burabod didto ha Cades ha kamingawan han Zin.)

¹⁵Nag-ampo hi Moises,

¹⁶“O GINOO nga Dyos, burabod han ngatanan nga kinabuhi, nag-aampo ako nga magtudlok ka hin usa ka tawo nga makakagpangulo han mga tawo,

¹⁷ngan makakagmando ha ira didto ha pag-awayan, basi an imo bungto diri masugad hin mga karnero nga waray magmarangno.”

¹⁸Nagsiring kan Moises an GINOO, “Kuhaa hi Josue nga anak ni Nun, nga usa ka tawo nga takos, ngan ipandong an imo kamot dida han iya ulo.

¹⁹Patindoga hiya ha atubangan ni Eleazar nga padi ngan han bug-os nga bungto, ngan didto ha atubangan nira ngatanan, isangyaw hiya nga amo an masaliwan ha imo.

²⁰Ihatag ha iya in bahin han imo pamunoan, basi pagsugton hiya han bug-os nga bungto han Israel.

²¹Aada an iya pagtapod kan Eleazar nga padi nga mahibabaro han akon kaburot-on pinaagi hin paggamit han Urim ug Tumim.[33] Dida hini tututdoan ni Eleazar nga padi hi Josue ngan an bug-os nga bungto han Israel han ngatanan nira nga mga buruhaton.”

²²Ginbuhat ni Moises sumala han iginsugo ha iya han GINOO. Ginpatindog niya hi Josue ha atubangan ni Eleazar nga padi ngan han bug-os nga bungto.

²³Sumala han iginsugo han GINOO iginpandong ni Moises an iya mga kamot dida han ulo ni Josue, ngan iginsangyaw niya nga hi Josue amo an masaliwan ha iya.