Read Waray Samarenyo Meaning Based Numero 28 Bible Online

Numero 28 - Waray Samarenyo Meaning Based bible

Numero 28

¹Ginsugo han GINOO hi Moises

²hin pagtutdo han mga Israelita nga ighalad nira ngadto han Dyos dida han igintalaan nga mga panahon an ginkikinahanglan nga mga halad nga pagkaon nga nakakalipay ha iya.

³Amo ini an mga halad nga pagkaon nga pagdadad-on niyo ngadto han GINOO; para han ikinaadlaw nga halad nga susunogon: duha nga nati nga mga karnero nga lalaki nga tag-usa ka tuig an panuigon, nga waray mga dum-it.

⁴Ihalad ha aga an syahan nga nati nga karnero ngan ha gab-i, an ikaduha,

⁵nga inupdan an kada usa hin usa nga halad nga pagkaon nga usa ka kilo nga harina nga sinaktan hin usa ka litro han gimamaupayi nga lana hin olibo.

⁶Amo ini an kada adlaw nga halad nga susunogon, nga iginhalad syahan didto ha Bukid Sinai nga usa nga halad nga pagkaon, kanay alimyon nakakalipay han GINOO.

⁷Updi hin halad nga bino an syahan nga nati nga karnero; ipisa dida han altar in usa ka litro nga bino.

⁸Ha gab-i ighalad an ikaduha nga nati nga karnero ha amo ngahaw nga paagi han paghalad ha aga, upod liwat an halad nga bino. Usa liwat ini nga halad nga pagkaon, kanay alimyon nakakalipay han GINOO.

⁹Dida han Adlaw nga Igparahuway ighalad in duha nga nati nga mga karnero nga lalaki nga tag-usa ka tuig an panuigon, nga waray mga dum-it, mga duha ka kilo nga harina nga sinaktan hin lana hin olibo nga usa nga halad nga pagkaon, ngan an halad nga bino.

¹⁰Ighahalad ini nga halad nga susunogon ha kada Adlaw nga Igparahuway, labot han kada adlaw nga halad upod an halad nga bino.

¹¹Ighalad in usa nga halad nga susunogon ngadto han GINOO dida han syahan nga adlaw han kada bulan: duha nga mga baka nga todo, usa nga karnero nga lalaki, pito nga nati nga mga karnero nga lalaki nga tag-usa ka tuig an panuigon, ngatanan waray mga dum-it.

¹²Sugad nga usa nga halad nga pagkaon, ighalad in harina nga sinaktan hin lana hin olibo: upod han kada baka nga todo, mga 3 ka kilo nga harina; upod han karnero nga lalaki, mga 2 ka kilo;

¹³ngan upod han kada nati nga karnero, ma usa ka kilo. Ini nga mga halad nga susunogon mga halad ini nga pagkaon kanay alimyon nakakalipay han GINOO.

¹⁴An angay nga halad nga bino amo in mga duha ka litro nga bino upod han kada baka nga todo, 1 1/2 ka litro upod han karnero nga lalaki, ngan usa ka litro upod han kada nati nga karnero. Amo ini an turumanon para han halad nga susunogon para han syahan nga adlaw han kada bulan ha bug-os nga tuig.

¹⁵Ngan labot han kada adlaw nga halad nga susunogon, upod an bino nga halad, ighalad in usa nga kanding nga lalaki nga usa nga halad tungod hin sala.

¹⁶Pagsasaurogon an Pyesta han Paglabay ha pagpasidungog han GINOO dida han ika-14 nga adlaw han syahan nga bulan.

¹⁷Dida han ika-15 nga adlaw, matikang in usa nga siringbahon nga pyesta nga naabot hin pito ka adlaw, nga sulod hini nga panahon tinapay la nga waray patubo an kakaonon.

¹⁸Dida han syahan nga adlaw han pyesta magtitirok kamo hin pagsingba ngan maundang kamo han iyo mga buhat.

¹⁹Paghalad kamo hin usa nga halad nga susunogon nga usa nga halad nga pagkaon ngadto han GINOO: duha nga mga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

²⁰Paghalad kamo han angay nga halad nga pagkaon nga harina nga sinaktan hin lana hin olibo: mga 3 ka kilo upod han kada baka, mga duha ka kilo upod han karnero nga lalaki,

²¹ngan ma usa ka kilo upod han kada nati nga karnero.

²²Paghalad liwat hin usa nga kanding nga lalaki nga usa nga halad tungod hin sala, ngan pinaagi hini pagbubuhaton niyo an seremonyas hin paglinis para han mga tawo.

²³Ighalad ini labot han ikinaaga nga halad nga susunogon.

²⁴Ha amo ngahaw nga paagi paghalad ngadto han GINOO hin usa nga halad nga pagkaon sulod hin pito ka adlaw, kanay alimyon nakakalipay han GINOO. Ighalad ini labot han kada adlaw nga halad nga susunogon ngan halad nga bino.

²⁵Pagtirok kamo hin pagsingba dida han ikapito ka adlaw ngan ayaw kamo pagtrabaho.

²⁶Dida han syahan nga adlaw han Pyesta han Pag-ani, kon maghahalad kamo han halad hin bag-o nga inani ngadto han GINOO, pagtirok kamo hin pagsingba, ngan maundang kamo hin pagbuhat.

²⁷Paghalad kamo hin usa nga halad nga susunogon, kanay alimyon nakakalipay han GINOO: duha nga mga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

²⁸Ighalad an angay nga halad nga pagkaon nga harina nga sinaktan hin lana hin olibo: mga 3 ka kilo upod han kada baka nga todo, mga duha ka kilo upod han karnero nga lalaki,

²⁹ngan ma usa ka kilo upod han kada nati nga karnero.

³⁰Ighalad liwat in usa nga kanding nga lalaki nga usa nga halad tungod hin sala, ngan dida hini pagbubuhaton niyo an seremonyas hin paglinis para han mga tawo.

³¹Ighalad ini ngan an halad nga bino labot han kada adlaw nga halad nga susunogon ngan halad nga pagkaon.