Read Waray Samarenyo Meaning Based Numero 29 Bible Online

Numero 29 - Waray Samarenyo Meaning Based bible

Numero 29

¹Dida han syahan nga adlaw han ikapito nga bulan pagtirok kamo hin pagsingba, ngan maundang kamo hin pagbuhat. Dida hito nga adlaw patutunggon an mga trompeta.

²Pagdara hin usa nga halad nga susunogon ngadto han GINOO, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

³Ighalad niyo an angay nga halad nga pagkaon nga harina nga sinaktan hin lana hin olibo: mga 3 ka kilo upod han baka nga todo, mga duha ka kilo upod han karnero nga lalaki,

⁴ngan ma usa ka kilo upod han kada nati nga karnero.

⁵Ighalad liwat niyo in usa nga kanding nga lalaki nga usa nga halad tungod hin sala, ngan pinaagi hini pagbubuhaton niyo an seremonyas hin paglinis para han mga tawo.

⁶Ighalad ini labot han nababatasan nga halad nga susunogon para han syahan nga adlaw han bulan upod an halad nga pagkaon, ngan han kada adlaw nga halad nga susunogon upod an halad nga pagkaon ngan halad nga bino. An alimyon hini nga mga halad nga pagkaon amo an nakakalipay han GINOO.

⁷Pagtirok kamo hin pagsingba dida han ikanapulo nga adlaw han ikapito nga bulan; pagpuasa kamo ngan ayaw pagbuhat.

⁸Paghalad kamo hin usa nga halad nga susunogon ngadto han GINOO, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

⁹Ighalad niyo an angay nga halad nga pagkaon nga harina nga sinaktan hin lana hin olibo: mga 3 ka kilo nga harina upod han baka nga todo, mga duha ka kilo upod han karnero nga lalaki,

¹⁰ngan ma usa ka kilo upod han kada nati nga karnero.

¹¹Ighalad liwat in usa nga kanding nga lalaki nga usa nga halad tungod hin sala, labot han kanding nga iginhahalad dida han seremonyas hin paglinis para han mga tawo, ngan han kada adlaw nga halad nga susunogon upod an halad nga pagkaon, ngan halad nga bino.

¹²Pagtirok kamo hin pagsingba dida han ika-15 nga adlaw han ikapito nga bulan. Pagsauroga niyo ini nga pyesta ha pagpasidungog han GINOO sulod hin pito ka adlaw ngan ayaw kamo pagbuhat.

¹³Dida hini nga syahan nga adlaw paghalad kamo hin usa nga halad nga pagkaon ngadto han GINOO, kanay alimyon nakakalipay ha iya: 13 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

¹⁴Ighalad an angay nga halad nga pagkaon nga harina nga sinaktan hin lana hin olibo: mga 3 ka kilo nga harina upod han kada baka nga todo, mga duha ka kilo upod han kada karnero nga lalaki,

¹⁵ngan ma usa ka kilo upod han kada nati nga karnero, upod an ginkikinahanglan nga mga halad nga bino.

¹⁶Ighalad liwat in usa nga kanding nga lalaki nga usa nga halad tungod hin sala. Ighalad ini labot han kada adlaw nga halad nga susunogon upod an halad nga pagkaon ngan halad nga bino.

¹⁷Dida han ikaduha ka adlaw paghalad kamo hin 12 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

¹⁸Ighalad upod hini an ngatanan nga iba nga mga halad nga ginkikinahanglan para han syahan nga adlaw.

²⁰Dida han ikatulo ka adlaw paghalad kamo hin 11 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

²¹Ighalad upod hini an ngatanan nga iba nga mga halad nga ginkikinahanglan para han syahan nga adlaw.

²³Dida han ikaupat ka adlaw paghalad kamo hin 10 nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

²⁴Ighalad upod hini an ngatanan nga iba nga mga halad nga ginkikinahanglan para han syahan nga adlaw.

²⁶Dida han ikalima ka adlaw paghalad kamo hin siyam nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

²⁷Ighalad upod hini an ngatanan nga iba nga mga halad nga ginkikinahanglan para han syahan nga adlaw.

²⁹Dida han ikaunom ka adlaw paghalad kamo hin walo nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

³⁰Ighalad upod hini an ngatanan nga iba nga mga halad nga ginkikinahanglan para han syahan nga adlaw.

³²Dida han ikapito ka adlaw paghalad kamo hin pito nga nati nga mga baka nga todo, duha nga karnero nga lalaki, ngan 14 nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

³³Ighalad upod hini an ngatanan nga iba nga mga halad nga ginkikinahanglan para han syahan nga adlaw.

³⁵Dida han ikawalo ka adlaw pagtirok kamo hin pagsingba ngan ayaw kamo pagbuhat.

³⁶Paghalad kamo hin usa nga halad nga susunogon nga usa nga halad nga pagkaon ngadto han GINOO, kanay alimyon nakakalipay ha iya: usa nga baka nga todo, usa nga karnero nga lalaki, ngan pito nga nati nga mga karnero nga lalaki, nga tag-usa ka tuig an panuigon, ngatanan waray mga dum-it.

³⁷Ighalad upod hini an ngatanan nga iba nga mga halad nga ginkikinahanglan para han syahan nga adlaw.

³⁹Amo ini an mga turumanon mahitungod han mga halad nga susunogon, mga halad nga pagkaon, mga halad nga bino, ngan mga halad hin pagkaurosa nga iyo ighahalad ngadto han GINOO dida han iyo gintalaan nga mga pyesta. Labot ini han mga halad nga ihinahatag niyo hin pagtuman hin saad o nga mga halad ha iyo kaburot-on.

⁴⁰Sanglit ginsumatan ni Moises an mga tawo han Israel han ngatanan nga iginsugo ha iya han GINOO.