Read Waray Samarenyo Meaning Based Numero 3 Bible Online

Numero 3 - Waray Samarenyo Meaning Based bible

Numero 3

¹Amo ini an panimalay nira Aaron ug Moises dida han panahon han paghimangraw han GINOO kan Moises didto ha Bukid Sinai.

²May upat nga mga anak nga kalalaken-an ni Aaron: hira Nadab nga suhag, Abiu, Eleazar, ug Itamar.

³Gindihogan ngan gin-ordenahan hira nga kapadian,

⁴kundi ginpatay hira Nadab ug Abiu han paghalad nira hin diri baraan nga kalayo ngadto han GINOO didto ha Kamingawan han Sinai. Waray hira mga anak, sanglit nag-alagad nga mga padi hira Eleazar ug Itamar han panahon nga buhi pa hi Aaron.

⁵Nagsiring an GINOO kan Moises,

⁶“Dad-a ha atubangan an tribo ni Levi ngan tudloka hira nga mga surugoon ni Aaron nga padi.

⁷Magtutuman hira han buruhaton nga ginkikinahanglan para han akon Tulda ngan magtutuman hira hin mga katungdanan para han kapadian ngan para han bug-os nga bungto.

⁸Paninimangnoon nira an ngatanan nga kasangkapan han Tulda ngan pagbubuhaton nira an mga katungdanan para han iba nga mga Israelita.

⁹An katungdanan la han mga Levita amo an pag-alagad kan Aaron ngan han iya mga anak nga kalalaken-an.

¹⁰Tutudlokon mo hi Aaron ngan an iya mga anak nga kalalaken-an hin pagbuhat han mga katungdanan han pagkapadi; papatayon an bisan hin-o nga magpapasipara hin pagbuhat han pagkapadi ni Aaron ug han iya mga anak.”

¹¹Nagsiring an GINOO kan Moises,

¹²“Magigin akon na yana an mga Levita. Han pagpataya ko han ngatanan nga mga suhag han mga Ehiptohanon, ginhimo ko nga baraan nga akon kalugaringon an suhag nga lalake han tagsa nga panimalay nga Israelita ngan an suhag han tagsa nga mananap. Yana, diri na aangkonon ko an mga suhag nga kalalaken-an han Israel nga akon kalugaringon, kundi akon na an mga Levita; maaakon na hira. Amo ako an GINOO.”

¹³

¹⁴Didto ha Kamingawan han Sinai ginsugo han GINOO hi Moises

¹⁵hin paglista han mga Levita pinaagi hin mga banay ngan pinaagi hin mga panimalay, ngan ginlista an kada lalake nga usa ka bulan o labaw an panuigon

¹⁶ngan ginbuhat ini ni Moises.

¹⁷May tulo nga mga anak hi Levi: hira Gerson, Coat, ug Merari, nga amo an ginikanan han mga banay nga nagdadara han ira mga ngaran. May duha nga mga anak hi Gerson: hira Libni ug Simei; may upat nga mga anak hi Coat: hira Amram, Ishar, Hebron, ug Uziel; ngan may duha nga mga anak hi Merari: hira Mahli ug Musi. Amo hira an ginikanan han mga panimalay nga nagdadara han ira mga ngaran.

¹⁸

¹⁹

²⁰

²¹An mga panimalay nira Libni ug Simei amo an mga sakop han banay ni Gerson.

²²An kadamo han iginlista nga kalalaken-an nga usa ka bulan o labaw an panuigon kapin hin 7,500.

²³Pinapagkampo ini nga banay didto ha katundan, ha luyo han Tulda,

²⁴nga hi Eliasaf nga anak ni Lael amo an puno han hugpo.

²⁵May katungdanan hira para han Tulda, han mga tahob ha sakob ngan ha gawas hini, han biray para han agian,

²⁶han mga biray para han bungsaran palibot han Tulda ngan han altar, ngan han biray para han agian han bungsaran. May katungdanan hira han ngatanan nga pag-alagad bahin hini nga mga butang.

²⁷An mga panimalay nira Amram, Izhar, Hebron, ug Uziel amo an mga sakop han banay ni Coat.

²⁸An kadamo han iginlista nga kalalaken-an nga usa ka bulan o labaw an panuigon kapin hin 8,600.

²⁹Pinapagkampo ini nga banay didto ha timogan han Tulda,

³⁰nga hi Elisafan nga anak ni Uziel amo an puno han hugpo.

³¹May katungdanan hira han Kahon han Ginsaaran, han lamesa, han kandilero, han mga altar, han mga garamiton nga ginagamit han kapadian didto han Baraan nga Dapit, ngan han biray dida han agian ngadto han Labi ka Baraan nga Dapit. May katungdanan hira han ngatanan nga pag-alagad bahin hini nga mga butang.

³²Hi Eleazar nga anak ni Aaron nga padi amo an puno han mga Levita. Tinaporan hiya hadton mga nagtutuman han mga buruhaton didto han Baraan nga Dapit.

³³An mga panimalay nira Mahli ug Musi amo an mga sakop han banay ni Merari.

³⁴An kadamo han iginlista nga kalalaken-an nga usa ka bulan o labaw an panuigon kapin hin 6,200.

³⁵Pinapagkampo ini nga banay didto ha amihanan han Tulda, nga hi Zuriel nga anak ni Abihail amo an puno han hugpo.

³⁶Iginhatag ha ira an katungdanan para han mga balayan han Tulda, han mga trangka hini, mga harigi, mga tungtongan, ngan han ngatanan nga mga kasangkapan hini. May katungdanan hira han ngatanan nga pag-alagad bahin hini nga mga butang.

³⁷May katungdanan liwat hira han mga harigi, mga tungtongan, mga usok, ngan mga pisi para han bungsaran ha gawas.

³⁸Pinapagkampo hira Moises ug Aaron ngan an iya mga anak nga kalalaken-an didto ha atubangan han Tulda ha sinirangan. May katungdanan hira hin pagtuman han mga ginbubuhat didto han Baraan nga Dapit para han mga tawo han Israel. Papatayon an bisan hin-o nga magpapasipara hin pagbuhat hini.

³⁹An kadamo han ngatanan nga kalalaken-an nga Levita nga usa ka bulan o labaw an edad nga iginlista ni Moises pinaagi hin mga hugpo hin mga panimalay ha pagsugo han GINOO kapin hin 22,000.

⁴⁰Nagsiring kan Moises an GINOO, “Akon an ngatanan nga mga suhag nga kalalaken-an han Israel. Sanglit iglista an ngaran han tagsa nga suhag nga lalake nga Israelita nga usa ka bulan o labaw an panuigon. Kundi liwat ha ira inaangkon ko nga akon an ngatanan nga mga Levita! Amo ako an GINOO! Inaangkon ko liwat an kahayopan han mga Levita nga liwan han ngatanan nga suhag han kahayopan.”

⁴¹

⁴²Sinmugot hi Moises ngan iginlista niya an ngatanan nga suhag nga kalalaken-an

⁴³nga usa ka bulan o labaw an panuigon; 22,273 ngatanan.

⁴⁴Nagsiring kan Moises an GINOO,

⁴⁵“Yana ighalad an mga Levita nga akon mga liwan han ngatanan nga suhag nga kalalaken-an nga Israelita, ngan ighalad an kahayopan han mga Levita nga liwan han mga suhag han kahayopan han mga Israelita.

⁴⁶Tungod nga nagsobra man hin 273 an kadamo han mga suhag nga kalalaken-an nga Israelita kay han mga Levita, kinahanglan lukaton mo an sobra nga mga anak nga kalalaken-an.

⁴⁷Baydi hin lima ka bug-os nga salapi para han kada usa, sumala han suruklan nga opisyal,

⁴⁸ngan ihatag ini nga kwarta ngadto kan Aaron ngan han iya mga anak nga kalalaken-an.”

⁴⁹Sinmugot hi Moises ngan kinuha niya

⁵⁰an 1,365 ka bug-os nga salapi,

⁵¹ngan iginhatag ini ngadto kan Aaron ngan han iya mga anak nga kalalaken-an.