Read Waray Samarenyo Meaning Based Numero 31 Bible Online

Numero 31 - Waray Samarenyo Meaning Based bible

Numero 31

²“Kastigoha an mga taga-Midian tungod han ira ginbuhat han mga tawo han Israel. Katapos pagbuhata mo hini, mapatay ka.”

³Sanglit ginsiring ni Moises an mga tawo, “Pag-andam kamo hin pagsulong han mga taga-Midian ngan pamataya niyo hira tungod han ira ginbuhat kontra han GINOO.

⁴Tikang han kada tribo han Israel ipadara niyo in usa ka yukot nga kalalaken-an ngadto ha pag-awayan.”

⁵Sanglit ginpili in usa ka yukot nga kalalaken-an ha kada tribo: 12,000 ngatanan nga kalalaken-an nga andam para hin pakig-away.

⁶Ginpadara hira ni Moises hin pakig-away ha ubos han pagpangulo ni Pinehas nga anak ni Eleazar nga padi nga tinaporan han mga butang nga baraan ngan han mga trompeta nga ginagamit para hin pagpahimatngon han mga sondalo.

⁷Ginsulong nira an Midian sumala han iginsugo han GINOO kan Moises, ngan pinanmatay nira an ngatanan nga kalalaken-an,

⁸lakip an lima nga kahadian han Midian: hira Evi, Recem, Sur, Hur, ug Rebe. Ginpatay liwat nira hi Balaam nga anak ni Beor.

⁹Ginbihag han mga tawo han Israel an kababayen-an ngan an kabataan nga Midianitanhon, gin-agaw an ira mga baka ngan an ira mga karnero, gintikas an ngatanan nira nga manggad,

¹⁰ngan ginsunog an ngatanan nira nga mga syudad ngan mga kampo.

¹¹Gindara nira an ngatanan nga ira natikas ngan nabihag, lakip an mga priso ngan an mga hayop,

¹²ngadto kanda Moises ug Eleazar, ngan ngadto han bungto han mga tawo han Israel nga nakadto han kampo didto ha kapatagan han Moab nga tabok han Jordan, atbang ha Jerico.

¹³Ginmawas han kampo hira Moises, Eleazar, ngan an ngatanan nga mga pangulo han bungto hin pagtapo han kasondalohan.

¹⁴Nasina hi Moises han mga opisyal nga mga kapitan hin mga hugpo hin mga kasondalohan nga inmoli tikang ha pag-awayan.

¹⁵Ginpakianhan hira niya, “Kay ano nga waray man niyo pamataya an ngatanan nga kababayen-an?

¹⁶Hinumdomi niyo nga an kababayen-an amo an nagsunod han mga tugon ni Balaam ngan nagtutdo han mga tawo didto ha Peor hin paglingo han GINOO. Sanglit ginpadara han GINOO in sakit ngada han mga tawo.

¹⁷Sanglit yana pataya niyo an tagsa nga bata nga lalake, ngan pataya an tagsa nga babaye nga diri na uray,

¹⁸kundi ayaw niyo ig-upod an ngatanan nga mga daragita ngan an ngatanan nga kababayen-an nga uray.

¹⁹Yana an ngatanan ha iyo nga nakamatay hin tawo o nakakamkam hin minatay kinahanglan gumawas la anay han kampo sulod hin pito ka adlaw. Dida han ikatulo ngan han ikapito ka adlaw paglinisi niyo an iyo kalugaringon ngan an kababayen-an nga iyo nabihag.

²⁰Kinahanglan paglinisan liwat niyo an tagsa nga panapton ngan an ngatanan nga hinimo hin anit, barahibo hin kanding, o kahoy.”

²¹Ginsiring ni Eleazar nga padi an kalalaken-an nga inmoli tikang ha pag-awayan, “Amo ini an mga turumanon nga iginhatag han GINOO kan Moises.

²²Paglilinisan pinaagi hin pagpuroga ha kalayo an ngatanan nga diri masurunog, sugad han bulawan, salapi, bronse, puthaw, lata, o timga. Paglilinisan an iba nga mga butang pinaagi hin tubig nga para hin paglinis.

²³

²⁴Dida han ikapito ka adlaw kinahanglan paglabhan niyo an iyo mga panapton; niyan magmamalinis kamo sumala han seremonyas ngan tutugotan na kamo hin pagsulod han kampo.”

²⁵Nagsiring kan Moises an GINOO,

²⁶“Pag-iihapon nimo ngan ni Eleazar upod han iba nga mga pangulo han bungto an ngatanan nga naagaw ha pag-awayan, lakip an mga priso ngan an mga hayop.

²⁷Parehoa an iyo pagtung-a han mga nakuha; an usa nga bahin para han nga sondalo, ngan an ikaduha para han iba han bungto.

²⁸Tikang han bahin nga kanan mga sondalo, kuha nga pinakabuhis hin usa ha kada 500 nga mga priso para han GINOO, ngan amo man liwat an kukuhaon ha mga baka, mga asno, mga karnero, ngan mga kanding.

²⁹Ighatag ini ngadto kan Eleazar nga padi nga linain nga amot ngadto han GINOO.

³⁰Tikang han bahin nga kanan iba han mga tawo kuha hin usa ha kada 50 nga mga priso ngan amo man liwat an kukuhaon ha mga baka, mga karnero, mga asno, ngan mga kanding. Ighatag ini ngadto han mga Levita nga tinaporan han Tulda han GINOO.”

³¹Ginbuhat nira Moises ug Eleazar an iginsugo han GINOO.

³²An masunod amo in usa nga lista han naagaw han mga sondalo, labot han ira ginhipos para ha ira kalugaringon: 675,000 nga mga karnero ngan mga kanding, 72,000 nga mga baka, 61,000 nga mga asno, ngan 32,000 nga kababayen-an nga uray.

³³

³⁴

³⁵

³⁶337,500 nga mga karnero ug mga kanding an katunga nga bahin han mga sondalo, nga 675 hini an buhis nga para han GINOO; 36,000 nga mga baka para han mga sondalo, nga 72 hini an buhis nga para han GINOO; 30,500 nga mga asno para han mga sondalo, nga 61 hini an buhis nga para han GINOO; ngan 16,000 nga kababayen-an nga uray para han mga sondalo, nga 32 hini an buhis nga para han GINOO.

³⁷

³⁸

³⁹

⁴⁰

⁴¹Sanglit iginhatag ni Moises kan Eleazar an buhis nga usa nga linain nga amot ngadto han GINOO, sumala han iginsugo han GINOO.

⁴²Pareho han kanan mga sondalo an bahin han bungto: 337,500 nga mga karnero ngan mga kanding, 36,000 nga mga baka, 30,500 nga mga asno, ngan 16,000 nga kababayen-an nga uray.

⁴³

⁴⁴

⁴⁵

⁴⁶

⁴⁷Tikang hini nga bahin kinuha ni Moises in usa ha kada 50 nga mga priso ngan mga hayop, ngan iginhatag ini ngadto han mga Levita nga mga tinaporan han Tulda han GINOO, sumala han iginsugo han GINOO.

⁴⁸Niyan kinmadto kan Moises an mga opisyal nga nagpangulo han kasondalohan,

⁴⁹ngan nagsumat, “Gin-ihap namon an mga sondalo nga amon nasasakopan, ngan waray usa ha ira nga iniiliw.

⁵⁰Sanglit gindadara namon an bulawan nga mga rayandayan, mga rayandayan ha butkon, mga pulseras, mga singsing, mga ariyos, ngan mga kwentas nga nakuha han kada usa ha amon. Ighahalad ini namon ngadto han GINOO nga usa nga bayad han amon mga kinabuhi, basi pagpanalipdan kami niya.”

⁵¹Kinarawat nira Moises ug Eleazar an ngatanan nga bulawan nga mga rayandayan.

⁵²Tinmimbang hin mga 200 ka kilo an ngatanan nga amot han mga opisyal.

⁵³Ginhimos hadton diri mga opisyal an naagaw ha pag-awayan nga ira nakuha.

⁵⁴Sanglit gindara nira Moises ug Eleazar an bulawan ngadto han Tulda basi pagpanalipdan han GINOO an mga tawo han Israel.