Read Waray Samarenyo Meaning Based Numero 32 Bible Online

Numero 32 - Waray Samarenyo Meaning Based bible

Numero 32

¹May damo hin duro nga kahayopan an mga tribo nira Ruben ug Gad. Han paghikit-i nira nga maupay gud an tuna han Jazer ug Galaad para hin kahayopan,

²kinmadto hira kanda Moises, Eleazar, ngan han iba nga mga pangulo han bungto ngan nagsiring,

³“Maupay nga tuna para hin kahayopan ini nga katunaan, nga tungod han pagbulig han GINOO, ginhatag ha mga Israelita—an mga bungto han Atarot, Dibon, Jaser, Nimra, Hesbon, Eleale, Sabam, Nebo, ug Beon—ngan damo hin duro an amon mga hayop.

⁵Ighatag gad ha amon ini nga tuna nga amon na malon, ngan ayaw na kami pagpataboka han Salog Jordan ngan pagpaokya didto.”

⁶Binmaton hi Moises, “Karuyag ba niyo magpabilin dinhe samtang mapakadto ha pag-awayan an iyo igkasi mga Israelita?

⁷Kay ano nga paghuhulopon niyo an mga tawo han Israel hin pagtabok han Jordan ngadto han tuna nga iginhatag ha ira han GINOO?

⁸Amo gihapon an ginbuhat han iyo mga ginikanan han pagsugoa ko ha ira tikang ha Cades Barnea hin pag-usisa han tuna.

⁹Inmabot hira ngadto han Kahamub-an han Escol ngan hinkit-an nira an tuna kundi han pagbalik nira, ginhulop nira an mga tawo hin pagsulod han tuna nga iginhatag ha ira han GINOO.

¹⁰Hito nga adlaw nasina an GINOO, ngan nagsumpa:

¹¹‘Nagsusumpa ako nga tungod nga waray hira makig-unong ha akon, waray han kalalaken-an nga 20 ngadto ha igbaw an panuigon, nga ginmawas han Ehipto nga makakasulod han tuna nga iginsaad ko kanda Abraham, Isaac, ug Jacob.’

¹²Diri makakasulod an ngatanan labot kanda Caleb nga anak ni Jefone nga Kenizitanhon ug Josue nga anak ni Nun; nakig-unong hira han GINOO.

¹³Nasina han mga tawo an GINOO, ngan naglayawlayaw hira didto ha kamingawan sulod hin 40 ka tuig, tubtob han pagkamatay hito nga bug-os nga katulinan nga nakasala ha iya.

¹⁴Ngan yana sinmaliwan kamo han iyo mga ginikanan, usa nga bag-o nga katulinan hin makasasala nga mga tawo nga andam na liwat hin pagtukso han GINOO basi masina hiya han Israel.

¹⁵Kon kamo nga mga tawo han Ruben ug Gad diri sumunod ha iya yana, pasasagdan na liwat niya ini ngatanan nga mga tawo didto ha kamingawan, ngan kamo an pagsasalaon han ira pagkapukan.”

¹⁶Dinmaop hira kan Moises ngan nagsiring, “Tugoti kami anay hin pagtindog dinhe hin mga alad nga bato para han amon mga karnero, ngan hin pagtindog hin pinaderan nga mga bungto para han amon mga sakop.

¹⁷Niyan mag-aandam kami hin pag-upod han amon igkasi mga Israelita ngadto ha pag-awayan, ngan mag-uuna kami han pagsulong ngada han pakapahimutang namon ha ira didto han tuna nga ira malon, samtang nag-uokoy an amon mga sakop dinhe han pinaderan nga mga bungto nga waray sadang kahadlokan han mga tawo hini nga tuna.

¹⁸Diri kami maoli kon diri an iba nga mga Israelita makatag-iya han tuna nga iginhatag ha ira.

¹⁹Diri kami maaro hin malon ha ira didto han tabok han Jordan, kay kinmarawat na man kami han amon malon dinhe ha sinirangan han Jordan.”

²⁰Binmaton hi Moises, “Kon tinuod an iyo iginsisiring, dinhe ha atubangan han GINOO, pag-andam kamo ito yana hin pagkadto ha pag-awayan.

²¹Matabok han Jordan an ngatanan niyo nga mga sondalo, ngan ha ubos han pagpangulo han GINOO, susulongon nira an aton mga kaaway tubtob nga pagpirdehon hira han GINOO,

²²ngan pagtag-iyahon an tuna. Katapos hito makakabalik na kamo, kay natuman na man niyo an iyo katungdanan ngadto han GINOO ngan ngadto han iyo igkasi mga Israelita. Niyan ihahatag han GINOO nga iyo malon an tuna ha sinirangan han Jordan.

²³Kundi kon diri niyo pagtumanon an iyo saad, nagpapahimatngon ako ha iyo nga makakasala kamo kontra han GINOO. Ayaw gud kamo pagsayop mahitungod hini; pagkakastigohon kamo tungod han iyo sala.

²⁴Sanglit pagtindoga niyo an iyo mga bungto ngan an mga alad para han iyo mga karnero, kundi pagtumana niyo an iyo iginsaad!”

²⁵Nagsiring an mga tawo han Gad ug Ruben, “Pagtutumanon namon sumala han imo iginsusugo ha amon.

²⁶Nagpapabilin an amon mga asawa ngan kabataan ngan an amon mga baka ngan mga karnero dinhe ha mga bungto han Galaad.

²⁷Kundi andam kami ngatanan hin pagkadto ha pag-awayan ha ubos han pagpangulo han GINOO. Matabok kami han Jordan ngan makikig-away kami sumala han imo iginsiring ha amon.”

²⁸Sanglit iginsugo ini ni Moises kanda Eleazar, Josue, ngan han iba nga mga pangulo han Israel:

²⁹“Kon tumabok na han Jordan an mga tawo han Gad ug Ruben nga andam hin pakig-away ha pagmando han GINOO, ngan kon makadaog kamo han tuna tungod han ira bulig, ihatag ha ira an tuna han Galaad nga ira malon.

³⁰Kundi kon diri hira tumabok han Jordan ngan kumadto ha pag-awayan upod ha iyo, kakarawaton nira an ira malon didto han tuna han Canaan sugad ha iyo.”

³¹Binmaton an mga tawo han Gad ug Ruben, “Pagtutumanon namon sumala han iginsugo han GINOO.

³²Ha ubos han iya pagmando matabok kami ngadto han tuna han Canaan ngan makadto kami ha pag-awayan, basi makatag-iya kami gihapon han amon malon dinhe ha sinirangan han Jordan.”

³³Sanglit iginggahin ni Moises an ngatanan nga katunaan ni Hadi Sihon han mga Amoreohanon ngan ni Hadi Og han Basan, lakip an mga bungto ngan an katunaan palibot hini ngadto han mga tribo nira Gad ug Ruben ngan han katunga han tribo ni Manases.

³⁴Gintindog na liwat han tribo ni Gad an ginpaderan nga mga bungto han Dibon, Atarot, Aroer,

³⁵Etrotsofan, Jaser, Jebaa,

³⁶Betnimra, ug Betaran.

³⁷Gintindog na liwat han tribo ni Ruben an Hesbon, Eleale, Quiriataim,

³⁸Nebo, Baalmeon (ginliwat ini nga mga ngaran), ug Sibna. Gintagan nira hin bag-o nga ngaran an mga bungto nga ira na liwat gintindog.

³⁹Ginsulong han banay ni Maquir nga anak ni Manases an tuna han Galaad; ira ini gin-ukyan, ngan ginpaiwas an mga Amoreohanon nga nakadto.

⁴⁰Sanglit iginhatag ni Moises an Galaad ngadto han banay ni Maquir ngan nag-ukoy hira didto.

⁴¹Ginsulong ngan naagaw ni Jair nga sakop han tribo ni Manases in pipira nga mga baryo ngan ginngaranan ini nga “Kabaryohan ni Jair.”

⁴²Ginsulong ngan naagaw ni Noba an Kenat ngan an mga baryo hini, ngan isinangay ha iya, sanglit ginngaranan hin Noba.