Read Waray Samarenyo Meaning Based Numero 35 Bible Online

Numero 35 - Waray Samarenyo Meaning Based bible

Numero 35

¹Nagsiring kan Moises an GINOO didto ha kapatagan han Moab nga tabok han Jordan, atbang han Jerico,

²“Sumati an mga Israelita nga tikang han malon nga ira kinakarawat, kinahanglan tagan nira an mga Levita hin mga syudad nga pag-uokyan ngan hin mga panabsaban nga tuna palibot han mga syudad.

³Pagtatag-iyahon han mga Levita ini nga mga syudad ngan mag-uokoy hira didto. An mga panabsaban nga tuna igagahin para han ira mga baka ngan ngatanan nira nga iba nga mga hayop.

⁴An panabsaban nga tuna matikang han mga pader han syudad tipagawas hin mga 470 ka metros palibot han syudad,

⁵basi magkamay-ada kwadrado nga dapit nga mga 950 ka metros an kada ligid, ngan aada ha butnga hini an syudad.

⁶Tatagan niyo an mga Levita hin unom nga mga syudad nga arayopan, nga dadangpan hin tawo kon makamatay hiya nga diri tinuyo. Labot hini, tagi hira hin 42 pa nga mga syudad

⁷upod an panabsaban nga mga tuna hini, nga maabot na ngatanan hin 48 nga mga syudad.

⁸Pag-iigoon an kadamo han mga syudad han mga Levita didto han kada tribo sumala han kadako han katunaan han kada tribo.”

⁹Gintugon han GINOO hi Moises

¹⁰nga sidngon an mga tawo han Israel: “Kon tumabok na kamo han Salog Jordan ngan sumulod han tuna han Canaan,

¹¹pagpili kamo hin mga syudad nga arayopan nga dadangpan hin tawo kon makamatay hiya nga diri tinuyo.

¹²Didto diri hiya paglalabtan han nagdudumot nga uropod han tawo nga namatay nga karuyag hin pagbulos. Diri papatayon in usa ka tawo nga iginsumbong hin pakamatay kon diri hiya anay tagan hin higayon hin pagpanalipod ha iya ha atubangan han mga tawo.

¹³Pagpili hin unom nga mga syudad,

¹⁴tulo ha sinirangan han Jordan ngan tulo ha tuna han Canaan.

¹⁵Hihimoon ini nga mga syudad nga arayopan para han mga Israelita ngan para han mga lumalangyaw nga lumalabay la o padayon nga mga umurokoy. Makakadalagan ngadto hin usa hini hin pagpalagiw in bisan hin-o nga makamatay hin tawo nga diri tinuyo.

¹⁶“Kundi, kon gumamit in usa ka tawo hin hinganiban nga puthaw o bato o kahoy hin pagpatay hin tawo, salaan hiya hin pagpatay, ngan papatayon man hiya.

¹⁹May katungdanan hin pagpatay han tawo nga nakamatay an gisusuoki nga uropod han tawo nga namatay. Kon hiagian an nakamatay, kinahanglan nga patayon hiya.

²⁰“Kon magdumot in tawo ngan makamatay hiya han iya gindudumtan pinaagi hin pagtikwang ha iya o hin paglabay ha iya,

²¹o hin pagsuntok ha iya, salaan hiya hin pagpatay ngan maupay nga patayon hiya. May katungdanan hin pagbulos an gisusuoki nga uropod han tawo nga namatay. Kon hiagian an nakamatay, maupay nga patayon hiya.

²²“Kundi pananglit nakamatay in usa ka tawo hin diri tinuyo hin tawo nga waray niya pagdumot, bisan pinaagi hin pagtikwang ha iya o hin paglabay ha iya,

²³o pananglit nalipatan hin kalabay hin bato in usa ka tawo, ngan nakamatay hin usa ka tawo nga waray niya tuyo hin pagdaot, ngan diri niya kaaway,

²⁴in sugad hini nga mga higayon, uugopan han bungto an tawo nga nakamatay ngan diri an nagdudumot hin pagbulos nga uropod han tawo nga namatay.

²⁵An tawo nga salaan hin pagpatay tatalwason han bungto tikang han uropod han tawo nga namatay, ngan ira igbabalik ini hiya ngadto han syudad nga arayopan nga iya gindangpan. Kinahanglan mag-ukoy hiya didto ngada han kamatay han Labaw nga Padi.

²⁶Kon an tawo nga salaan hin pakamatay, bumaya han syudad nga arayopan nga iya gindangpan,

²⁷ngan kon hiagian hiya ngan patayon hiya han uropod han tawo nga namatay, diri salaan hin pagpatay an pagbulos hini nga tawo.

²⁸Kinahanglan magpabilin didto han syudad nga arayopan an tawo nga salaan hin pakamatay ngada han kamatay han Labaw nga Padi, kundi katapos hini, makakahimo na hiya hin pakaoli.

²⁹Iginpapahinungod ha iyo ngan han iyo mga tulin ini nga mga turumanon, bisan diin kamo mag-ukoy.

³⁰“In usa ka tawo nga iginsumbong hin pagpatay mahihimo nga hisabtan hiya nga salaan ngan patayon hiya kahuman hisayori an iya kaso pinaagi hin duha o sobra pa nga mga testigo; diri igo in usa la nga saksi nga maghahatag hin kasayoran han kaso hin pagpatay.

³¹Kinahanglan pagpatayon in tawo nga makamatay. Diri hiya makakalikay hini nga sirot pinaagi hin pagbayad hin kwarta.

³²Kon pinmalagiw in usa ka tawo ngadto hin usa nga syudad nga arayopan, ayaw hiya tugoti hin pagbayad basi la makaoli hiya nga diri pa mapatay an Labaw nga Padi.

³³Kon pagbuhaton ini niyo, paghuhugawan niyo an tuna nga iyo gin-uokyan. Nakakahugaw han tuna an pagpatay hin tawo, ngan labot la han kamatayon han nakamatay, waray iba nga paagi hin paglinis han tuna diin ginpatay an tawo.

³⁴Ayaw niyo paghugawi an tuna nga gin-uokyan niyo, kay amo ako an GINOO ngan nag-uokoy ako dida han mga tawo han Israel.”