Read Waray Samarenyo Meaning Based Numero 7 Bible Online

Numero 7 - Waray Samarenyo Meaning Based bible

Numero 7

¹Dida han adlaw han kahuman ni Moises pagtindog han Tulda han GINOO, gindihogan ngan iginhalad niya an Tulda ngan an ngatanan nga mga kasangkapan hini, ngan an altar ngan an ngatanan nga mga kasangkapan han altar.

²Niyan gindara han mga puno han mga banay, nga mga pangulo han mga tribo han Israel, nga amo ngahaw an mga tawo nga tinaporan han pag-ihap, an ira mga halad ngadto han GINOO: unom nga mga karomata ngan dose nga mga baka, usa nga karomata para han kada duha nga pangulo, ngan usa nga baka para han kada usa nga pangulo. Katapos nira ighalad ini,

⁴nagsiring an GINOO kan Moises,

⁵“Karawata ini nga mga regalo basi gamiton para han buruhaton dida han Tulda; ighatag ini ngadto han mga Levita, sumala han buruhaton nga ira pagtutumanon.”

⁶Sanglit iginhatag ni Moises an mga karomata ngan an mga baka ngadto han mga Levita.

⁷Iginhatag niya in duha nga karomata ngan upat nga mga baka ngadto han mga anak ni Gerson,

⁸ngan upat nga mga karomata ngan walo nga mga baka ngadto han mga anak ni Merari. Pagtutumanon an ngatanan nira nga buruhaton ha ubos han pagmando ni Itamar nga anak ni Aaron.

⁹Kundi waray tagi ni Moises hin mga karomata o mga baka an mga anak ni Coat, kay hira man an magdadara han baraan nga mga butang nga ira ginmamangnoan.

¹⁰Nagdara liwat an mga pangulo hin mga regalo para hin pagsaurog han paghalad han altar. Han andam na hira hin paghalad han ira mga regalo dida ha altar,

¹¹nagsiring an GINOO kan Moises, “Sumati an tagsa ha ira nga ha kada adlaw, sulod hin dose ka adlaw, magdadara han iya mga regalo in usa han mga pangulo para han paghalad han altar.”

¹²Iginhalad nira an mga halad dida hini nga pagkasunodsunod: [Adlaw] — [Tribo] — [Pangulo] Syahan — Juda — Hi Naason nga anak ni Aminadab Ikaduha — Isacar — Hi Natanael nga anak ni Zuar Ikatulo — Zabulon — Hi Eliab nga anak ni Helon Ikaupat — Ruben — Hi Elizur nga anak ni Sedeur Ikalima — Simeon — Hi Selumiel nga anak ni Zurisadai Ikaunom — Gad — Hi Eliasaf nga anak ni Deuel Ikapito — Efraim — Hi Elisama nga anak ni Amiud Ikawalo — Manases — Hi Gamaliel nga anak ni Pedasur Ikasiyam — Benjamin — Hi Abidan nga anak ni Gideoni Ikanapulo — Dan — Hi Ahiezer nga anak ni Amisadai Ikaonse — Aser — Hi Pagiel nga anak ni Ocran Ikadose — Neftali — Hi Ahira nga anak ni Enan Papreho an mga halad nga gindara han kada usa: usa nga makaong nga salapi nga natimbang hin 1 1/2 ka kilo ngan usa nga palanggana nga salapi nga natimbang hin 800 ka gramos sumala han opisyal nga suruklan, puno ini nga duha hin harina nga sinaktan hin (...)

⁸⁴An ngatanan nga mga halad nga gindara han dose nga mga pangulo para han paghalad han altar amo inin masunod: — 12 nga mga makaong nga salapi ngan dose nga mga palanggana nga salapi nga natimbang ngatanan hin mga 27.6 ka kilo — 12 nga mga pinggan nga bulawan nga natimbang ngatanan hin 1.32 ka kilo, nga puno hin insyenso — 12 nga mga todo nga baka, 12 nga lalaki nga mga karnero, 12 nga mga nati nga karnero nga tag usa ka tuig an panuigon, lakip an mga halad nga pagkaon nga upod hini, para han mga halad nga tutuboron — 12 nga mga kanding para han mga halad tungod hin sala — 24 nga mga todo nga baka, 60 nga lalaki nga mga karnero, 60 nga mga kanding, 60 nga nati nga mga karnero nga tag usa ka tuig an panuigon, para han mga halad hin pagkaurosa

⁸⁹Han pagsulod ni Moises han Tulda hin pakighimangraw han GINOO, hinbatian niya in tingog nga nagyayakan ha iya tikang ha igbaw han takop han Kahon han Ginsaaran, ha butnga han duha nga mga kerubin.[2]