Read Waray Samarenyo Meaning Based Miqueas 1 Bible Online

Miqueas 1 - Waray Samarenyo Meaning Based bible

Miqueas 1

¹Ginhatag han GINOO ini nga mensahe kan Miqueas nga taga-Moreset dida han panahon nga mga hadi han Juda hira Jotam, Acas, ug Ezequias. Ginpadayag han GINOO kan Miqueas ini ngatanan nga mga butang mahitungod han Samaria ug Jerusalem.

²Pamatii ini, kamo ngatanan nga mga nasod; pamatii ini, kamo ngatanan nga nag-uokoy ha tuna! Magpapamatuod kontra ha iyo an Ginoo nga DYOS. Pamati! Naghihimangraw hiya tikang han iya langitnon nga templo.

³Maabot an GINOO tikang han iya baraan nga dapit; malusad hiya ngan maglalakat dida han mga sampaw han kabukiran.

⁴Niyan matutunaw an kabukiran ha ilarom niya sugad hin taro dida hin kalayo; mahuhuwad ini ngadto han mga kahamub-an sugad hin tubig nga naawas ngadto ha ubos hin pungtod.

⁵Mahinanabo ini ngatanan kay nakasala ngan sinmupil han Dyos an mga tawo han Israel. Hin-o an pagbabasolon han pagsupil han Israel? An Samaria nga kapital nga syudad! Hin-o an salaan hin pagsingba hin mga diyosdiyos didto ha Juda? An Jerusalem ngahaw!

⁶Sanglit nasiring an GINOO, “Hihimoon ko an Samaria nga tambak hin mga rinuba ha kadaygan nga tuna, nga usa nga dapit nga taramnan hin mga ubas. Ighuhuwad ko an ginpanas nga kababtoan han syudad ngadto han kahamub-an ngan ipadadayag ko an mga patukoranan han syudad.

⁷Pagdudugmokon an ngatanan nga mahal nga mga diyosdiyos hini, pag-uugtangon hin kalayo an ngatanan nga iginhatag ngadto han mga magraot an dungog nga kababayen-an han templo han Samaria, ngan mahihimo nga tinambak nga binayaan an ngatanan nga mga ladawan. Gin-angkon han Samaria ini nga mga butang para han mga seremonyas hin pagkahimungaan, ngan yana pagdadad-on ini nga mga ladawan han iya mga kaaway para hin mga magraot an dungog nga kababayen-an han templo didto hin iba nga dapit.”

⁸Niyan nagsiring hi Miqueas, “Tungod hini, magmamabidoon ngan magngungoyngoy ako. Maglalakat ako nga waray sapatos ngan hubo hin pagpakita han akon kabidoan. Mauwang ako sugad hin lubo ngan magngungoyngoy sugad hin tamsi nga duong.

⁹Diri matatambal an mga kasamdan han Samaria, ngan diri maiha mag-aantos man an Juda hin sugad nga paagi; inmabot na an pagkabungkag ngadto han mga ganghaan han Jerusalem ngahaw, diin nag-uokoy an akon mga tawo.”

¹⁰Ayaw pagsumati an aton mga kaaway didto ha Gat mahitungod han aton kapirde; ayaw niyo hira pagpakitaa nga nagtitinangis kamo. Mga tawo han Betleafra,[1] ipakita an iyo pagturaw pinaagi hin pagpulilid dida han tapotapo.

¹¹Kamo nga mga tawo han Safir, kadto kamo ha pagkabihag nga hubo ngan naaawod. Diri nagpapasipara hin paggawas han ira syudad adton mga nag-uokoy ha Saanan. Kon hibatian niyo nga nagngungoyngoy an mga tawo han Betesel, mahibabaroan niyo nga waray darangpanan didto.

¹²Namumulat hin tambulig an mga tawo han Marot, kay gindara han GINOO in karat-an nga hiraniay na ha Jerusalem.

¹³Kamo nga nag-uokoy didto ha Laquis, isangat ha mga karuwahe an mga kabayo. Ginsubad niyo an mga sala han Israel, sanglit kamo an tinikangan han pakasala han Jerusalem.

¹⁴Sanglit yana, mga tawo han Juda, panamilit kamo han bungto han Moresgat. Diri bubuligan han bungto han Acsib an kahadian han Israel.

¹⁵Mga tawo han Maresa, itutubyan kamo han GINOO ngadto hin kaaway nga magbibihag han iyo bungto. Makadto ngan mananago an mga pangulo han Israel didto han lungib ha Adulam.

¹⁶Mga tawo han Juda, arota an iyo buhok ha pagmasulob-on tungod han mga anak nga iyo hinihigugma. Pagdangas kamo ha iyo ngahaw sugad hin mga manaol, kay hahalinon ngadto ha pagkabihag an iyo mga anak.