Read Waray Samarenyo Meaning Based Miqueas 2 Bible Online

Miqueas 2 - Waray Samarenyo Meaning Based bible

Miqueas 2

¹Hin kamakaharadlok para hadton nahigda nga nagmiminata ngan nagpipinanhunahuna hin maraot! Kon aga na, kon may-ada na nira higayon, binubuhat nira dayon an maraot nga ira nahunahunaan.

²Kon naruruyag hira hin mga uma, inaagaw ini nira; kon naruruyag hira hin mga balay, kinukuha ini nira; waray panimalay o hiagi nga diri nira paglabtan kon ira karuyagon.

³Sanglit nasiring an GINOO, “Naglalarang ako hin pagdaot ha iyo, ngan diri kamo makakalikay hini. Mahingangadto kamo ha kasamokan ngan diri na kamo maglalakat nga mapahitas-on.

⁴Kon umabot na ito nga panahon, gagamiton han mga tawo an susumaton mahitungod ha iyo sugad nga pananglitan hin karat-an, ngan pagkakantahon nira ini nga kanta hin pagturaw hiunong han iyo kaagi: Napuo na gud kita! Ginkuha na han GINOO an aton tuna, ngan iginhatag ini niya ngadto hadton mga nagbihag ha aton.”[2]

⁵Sanglit kon umabot na an panahon nga ig-uli na an tuna ngadto han mga tawo han GINOO, mawawaray bahin an bisan hin-o ha iyo.

⁶Nagsiring ha akon an mga tawo, “Ayaw kami pagwalihi. Ayaw pagwali mahitungod hito ngatanan. Diri magpapakaalo ha amon an Dyos.

⁷Naghuhunahuna ba kamo nga ginabaan[3] an mga tawo han Israel? Nawad-an na ba han iya pagpailob an GINOO? Magbubuhat ba hiya hin sugad nga mga butang? Diri ba hiya[4] naghihimangraw nga maloloy-on hadton mga nagbubuhat hin matadong?”

⁸Nabaton an GINOO, “Sinusulong niyo an akon mga tawo sugad hin mga kaaway. Nauli an kalalaken-an tikang ha pag-awayan, nga naghuhunahuna nga talwas hira ha ira balay, kundi aada kamo nga naghuhulat hin pagkawat han ira bado.[5]

⁹Pinapaiwas niyo an kababayen-an han akon mga tawo tikang han mga puroy-anan nga ira hinihigugma, ngan gintitikasan niyo an ira mga anak han akon mga kaupayan nga kadayonan.

¹⁰Buhat ngan lakat na; waray na dinhe katalwasan. An iyo mga sala an nakahulog hini nga dapit ngadto ha pagkabungkag.

¹¹“Naruruyag ini nga mga tawo han buwaon ngan malimbong nga manaragna nga nagsusudoysudoy ngan nasiring, ‘Nananagna ako nga mag-aawas para ha iyo an bino ngan makahurubog nga irimnon.’

¹²“Kundi pagtitirokon ko kamo ngatanan nga mga tawo han Israel nga nahisalin. Titirokon ko kamo sugad hin mga karnero nga nabalik ngadto han panon. Sugad hin panabsaban nga luob hin mga karnero, maluluob na liwat an iyo tuna hin damo nga mga tawo.”

¹³Bubuksan han Dyos an agian para ha ira ngan pagtutugwayan hira hin paggawas tikang ha pagkabihag. Magkakagawas hira tikang han mga ganghaan han syudad ngan talwas na hira. An ira hadi nga amo an GINOO ngahaw amo an mag-uuna ha ira hin paggawas.