Read Waray Samarenyo Meaning Based Miqueas 3 Bible Online

Miqueas 3 - Waray Samarenyo Meaning Based bible

Miqueas 3

¹Pamati, kamo nga mga punoan han Israel! Angay unta kamo manimangno han katadongan,

²kundi ginsalikway niyo an maupay ngan ginhigugma niyo an maraot. Gin-aanitan niyo nga buhi an akon mga tawo ngan ginpalaknit niyo an ira unod tikang han ira mga tul-an.

³Linalam-oy niyo an akon mga tawo. Gin-aanitan niyo hira, ginbabari an ira mga tul-an, ngan iyo gintatadtad hira sugad hin karne nga lutoon.

⁴Maabot an panahon nga magtatawag kamo han GINOO, kundi diri hiya mabaton ha iyo. Diri hiya mamamati han iyo mga pag-ampo kay ginbuhat niyo an maraot.

⁵Ginlilimbongan an akon mga tawo hin mga manaragna nga nagsasaad hin kalinaw hadton mga nagbabayad ha ira, kundi gintatarhog hin away adton mga diri nagbabayad. Nasiring an GINOO ngadto hini nga mga manaragna,

⁶“Mga manaragna, tikatarapos na an iyo adlaw; natutunod na an iyo adlaw. Tungod nga ginlilipatlipat niyo an akon mga tawo, mawawaray na niyo mga panan-awon, ngan diri na kamo makakapanagna hin bisan ano.”

⁷Adton managna hin tiarabot nga mga butang, maaalohan tungod kay mapapakyas hira. Maaalohan hira ngatanan kay diri mabaton ha ira an Dyos.

⁸Kundi an ha akon nga bahin, ginpupuno ako han GINOO han iya espiritu ug gahom, ngan tinatagan ako hin pagsabot han katadongan ngan han kaisog hin pagsumat han mga tawo han Israel han ira mga sala.

⁹Pamati ha akon, kamo nga mga punoan han Israel, kamo nga nasalikway han katadongan ngan naghihimo nga sayop han matadong.

¹⁰Gintitindog niyo an Jerusalem nga syudad han Dyos dida hin patukoranan hin panmatay ngan diri pagkamatadong.

¹¹Naghahadi an mga punoan han syudad tungod hin mga hukip, ginhuhubad han kapadian an Balaod tungod hin bayad, nananagna an mga manaragna tungod hin kwarta—ngan nasiring hira ngatanan nga aada ha ira an GINOO. Nasiring hira, “Waray karat-an nga maabot ha amon; aadi ha amon an GINOO.”

¹²Sanglit, tungod ha iyo, pag-aaradohon sugad hin uma an Sion, mahihimo nga tambak hin mga rinuba an Jerusalem, ngan mahihimo nga kagurangan an pungtod han Templo.