Read Waray Samarenyo Meaning Based Miqueas 4 Bible Online

Miqueas 4 - Waray Samarenyo Meaning Based bible

Miqueas 4

¹Ha mga adlaw nga tiarabot an bukid nga tinitindogan han Templo magigin gihahataasi han ngatanan, nga mananawantawan ha ngatanan nga kapungtoran. Mahuyob ngadto hini in damo nga mga nasod,

²ngan masiring an ira mga tawo, “Sagka kita ngadto han pungtod han GINOO,[6] ngadto han Templo han Dyos han Israel. Kay pagtututdoan kita niya han karuyag niya ipabuhat ha aton; maglalakat kita dida han mga agianan nga iya ginpili. Kay natikang ha Jerusalem an pagturon-an han GINOO; tikang ha Sion maghihimangraw hiya ngadto han iya mga tawo.”

³Pagtutuhayon niya in mga kalipongan dida han mga nasod, dida han dagko nga mga kagamhanan nga higrani ngan higrayo. Pagpipilpigon nira an ira mga espada hin paghimo hin mga arado, ngan an ira mga bangkaw hin paghimo hin mga garab. Diri na gud makikig-away an mga nasod, diri na gud hira mangangandam para hin away.

⁴Mag-uokoy ha kalinaw an tagsatagsa dida han iya kalugaringon nga mga urubasan ngan kaigosan, ngan waray na maghahadlok ha iya. An GINOO nga Labi Kamakagarahum an nagsaad hini.

⁵Magsisingba ngan magsusugot han iya kalugaringon nga diyos an kada usa nga nasod, kundi magsisingba ngan magsusugot kita ha kadayonan han GINOO nga aton Dyos.

⁶“Maabot an panahon,” nasiring an GINOO, “nga akon pagtitirokon an mga tawo nga akon ginkastigo, adton mga nag-antos didto ha pagkabihag.

⁷Mga lulid hira ngan nahirayo han ira urokyan, kundi hihimoon ko in bag-o nga tinikangan hadton mga nanhisalin, ngan mahihimo hira nga dako nga nasod. Paghahadian ko hira didto ha Bukid Sion tikang hito nga panahon ngan ha kadayonan.”

⁸Ngan ikaw, Jerusalem, diin nagbabantay an Dyos han iya mga tawo sugad hin magmarangno hin mga karnero tikang han iya lantawan, magigin kapital ka na liwat han ginhadian nga imo hadto anay.

⁹Kay ano nga nagkikinurahab ka? Kay ano nga nag-aantos ka sugad hin babaye nga tipag-aranak? Tungod ba ini nga waray ka hadi, ngan patay na an imo mga magsaragdon?

¹⁰Paglubag ngan pag-araba,[7] mga tawo han Jerusalem, sugad hin babaye nga nag-aanak, kay yana kinahanglan bumaya kamo han syudad ngan mag-ukoy ha kaumhan han tuna. Kinahanglan kumadto kamo ha Babilonia, kundi didto pagtatalwason kamo han GINOO tikang han iyo mga kaaway.

¹¹Nagtitirok in damo nga mga nasod hin pagsulong ha imo. Nasiring hira, “Kinahanglan pagbungkagon an Jerusalem! Kikitaon ta ini nga syudad dida ha kabungkagan!”

¹²Kundi diri maaram ini nga mga nasod han hunahuna han GINOO. Diri hira maaram nga gintirok hira basi pagkastigohon ha sugad nga paagi nga gintitirok an mga inani basi paggiokon.

¹³Nasiring an GINOO, “Mga tawo han Jerusalem, kadtoa ngan kastigoha an imo mga kaaway! Hihimoon ko kamo nga sugad kamakusog hin baka nga may puthaw nga mga sungay ngan bronse nga mga kulo. Pagdudugmokon niyo in damo nga mga nasod, ngan an manggad nga ira nakuha pinaagi hin panlupig, iyo ighahalad ha akon nga Ginoo han bug-os nga kalibutan.”