Read Waray Samarenyo Meaning Based Habacuc 1 Bible Online

Habacuc 1 - Waray Samarenyo Meaning Based bible

Habacuc 1

¹Amo ini an mensahe nga iginpadayag han GINOO kan manaragna Habacuc.

²O GINOO, san-o pa nimo pamamatii an akon pangaro hin bulig ha imo? San-o ka pa pagtatalwas ha amon hini nga panlupig?

³Kay ano nga pinapakita mo ako hin sugad nga kakurian? Uunanhon mo pakailob hin pagtan-aw hin sugad nga kasaypanan? An mga panruba ug panlupig naglilibot ha akon, ngan may-ada araway ngan pagkabirubingkil ha ngatanan nga dapit.

⁴Maluya ngan waray la gamit an balaod, ngan diri gud gintutuman an katadongan. Linulupigan han mga magraot an mga magtadong, sanglit ginlulubag an katadongan.

⁵Niyan nagsiring an GINOO ha iya mga tawo, “Tan-awa daw an mga nasod nga palibot niyo, ngan mahipapausa kamo han iyo hikikit-an. Magbubuhat ako hin butang nga diri kamo magmamatuod kon hibatian niyo ini.

⁶Ginhihimo ko nga gamhanan an mga Babilonianhon, ito nga magbangis ngan madagmit masina nga mga tawo. Ginlalatas nira an kalibutan hin pagsulong hin iba nga mga tuna.

⁷Nagpapasarang hira hin kahadlok ngan kakulba, ngan ha ira kamapahitas-on, waray iba nga balaod kon diri an ira la kalugaringon.

⁸“Malarolaksi kay hin mga leyopardo an ira mga kabayo, mapiropintas kay hin mga gutom nga lubo. Naabot an ira mga dikabayo tikang ha higrayo nga katunaan; nagbabandok ha tuna an ira mga kabayo. Naabot hira nga nahugdon sugad hin mga agila nga nasulinap hin pagdagit han ira kakaonon.

⁹“Nasulong an ira mga kasondalohan nga mag-isog ha pag-awayan, ngan nahahadlok an ngatanan han ira pag-aabot.[1] Sugad han baras an kadamo han ira mga bihag.

¹⁰Gintatamay nira an kahadian ngan gintataw-an nira an labaw nga mga opisyal. Waray marig-on nga kota nga nakakapugong ha ira—nagtatambak hira hin tuna nga ira sasak-an ngan naagaw nira an kota.

¹¹Niyan nalabay hira sugad hin hangin ngan diri na hinkikit-an ini nga mga tawo kanay gahom amo an ira diyos.”

¹²GINOO, Dyos ka na tikang pa ha tinikangan. Ikaw an akon Dyos nga baraan ngan waray kataposan. O GINOO nga akon Dyos ngan mananalipod, ginpili mo an mga Babilonianhon ngan ginpakusog mo hira basi makagkastigo hira ha amon.

¹³Kundi uunanhon mo hin pakailob hini nga maglingo ngan magraot nga mga tawo? Baraan hin duro an imo mga mata hin pagtan-aw han karat-an, ngan diri ka mailob hin pagkita hin mga tawo nga nagbubuhat hin sayop. Sanglit kay ano nga nahilom ka la samtang ginpupukan nira in mga tawo nga mas matadong kay ha ira?

¹⁴Uunanhon mo hin pagdumara hin mga tawo nga sugad hin isda o sugad hin kabalay hin gudtiay nga mga mananap nga waray pangulo nga nagmamando ha ira?

¹⁵Dinadakop han mga Babilonianhonan mga tawo pinaagi hin mga kawil ug mga pukot nga sugad hin mga isda la hira, ngan nagoliat hira nga malipayon tungod han ira dakop!

¹⁶Ginsisingba pa ngani nira an ira mga pukot ngan ginhahalaran ini hin mga halad nga tinubod, kay nahatag man an ira mga pukot han gimamaupayi nira nga pagkaon.

¹⁷Gagamiton ba nira ha kadayonan an ira mga espada ngan magpapadayon ba hira hin pagpuo hin waray pagkalooy han mga nasod?