Read Waray Samarenyo Meaning Based Sofonias 2 Bible Online

Sofonias 2 - Waray Samarenyo Meaning Based bible

Sofonias 2

¹Waray alo nga nasod, panmurubuot daw

²nga diri ka pa nalalaya ngan nararapdag sugad hin bukad,[4] nga diri pa naabot ha imo an naglalaga nga kasina han GINOO, nga diri pa naabot an adlaw han iya kapungot.

³Pangitaa an GINOO, kamo ngatanan nga mapaubsanon nga mga tawo han tuna, nga nagsusugot han iya mga sugo. Buhata an matadong ngan pagpaubos kamo ha atubangan han GINOO. Bangin makalikay kamo han kastigo dida han adlaw han kapungot han GINOO.

⁴Waray mahibibilin didto ha syudad han Gaza. Babayaan an Ascalon. Paiiwason an mga tawo han Asdod sulod hin tunga la hin adlaw,[5] ngan paiiwason han ira syudad an mga tawo han Ecron.

⁵Maghihikaraot kamo nga mga Filisteohanon, kamo nga mga tawo nga nag-uokoy dida han baybayon. Ginsirotan na kamo han GINOO. Pupuohon kamo niya, ngan waray usa ha iyo nga mahibibilin.

⁶Mahihimo an iyo tuna dida ha ligid han dagat nga kaumhan nga may mga payagpayag hin mga magmarangno hin mga karnero ngan mga tangkal hin mga karnero.

⁷Pag-uokyan an iyo tuna han mahisalin nga buhi nga mga tawo han Juda. Papapanabsabon nira didto an ira mga panon ngan mangangaturog hira didto han kabablayan han Ascalon. Maupod ha ira an GINOO nga ira Dyos ngan pauuswagon na liwat hira.

⁸Nasiring an GINOO nga Labi Kamakagarahum, “Hinbatian ko an mga tawo han Moab ug Amon nga nagtatamay ngan nagpapakaalo han akon mga tawo, ngan naghihinambog nga aagawon nira an tuna.

⁹Sugad nga amo gud ako an buhi nga GINOO nga Dyos han Israel, nagsusumpa ako nga pagbubungkagon ko an Moab ug Amon sugad han Sodoma ug Gomora. Mahihimo hira nga dapit hin mga luong hin asin ngan ruba an ngatanan ngan luob hin kabanwaan. Pagtitikasan hira nga kukuhaon an ira tuna han akon mga tawo nga mahisasalin nga buhi.”

¹⁰Kakastigohon hin sugad an mga tawo han Moab ug Amon tungod han ira kamapahitas-on ug kamaparayawon, ngan tungod han ira pagpakaalo han mga tawo han GINOO nga Labi Kamakagarahum.

¹¹Paghahadlokon hira hin duro han GINOO. Pupukanon niya an kadiyosan han tuna, ngan an ngatanan nga mga tawo magsisingba han GINOO, an kada usa didto han iya kalugaringon nga tuna.

¹²Pamamatayon liwat han GINOO an mga tawo han Sudan.

¹³Gagamiton han GINOO an iya gahom hin pagpukan han Asiria. Hihimoon niya an syudad han Ninibe nga binayaan nga ruba nga syudad, usa nga mamara nga kamingawan.

¹⁴Magigin usa na la ini nga dapit nga luoban hin mga panon hin kahayopan ngan kamanampan. Mag-uokoy dida han mga buho han rinuba nga mga harigi an mga bukaw ngan dida han mga hagdan an mga uwak, ngan hibabatian an ira mga huni, kay rarangkahon man an sidro nga mga kahoy dida han kabablayan.

¹⁵Amo ini an dadangatan han syudad nga duro hin kamapahitas-on tungod han kalugaringon niya nga gahom, ngan naghuhunahuna nga waray na hiya kataragman. Naghuhunahuna an mga tawo nga an ira syudad amo an gidadakoi dinhe ha kalibutan. Hin kamamingaw nga dapit an dadangatan hini; usa nga dapit nga papahuwayan na la hin ihalas nga kamanampan! Maisol hin duro nga kahadlok an ngatanan nga malabay hini nga mga syudad.