Read Waray Samarenyo Meaning Based Sofonias 3 Bible Online

Sofonias 3 - Waray Samarenyo Meaning Based bible

Sofonias 3

¹Maghihikaraot an Jerusalem, ito nga mahugaw ngan masupilon nga syudad, nga nagraogdaog han kalugaringon niya nga mga tawo.

²Waray ini mamati han GINOO o kumarawat han iya mga pagsaway. Waray ini sumarig han GINOO o makibulig ha iya.

³An iya mga punoan sugad na la hin mag-isog nga mga liyon; an iya mga maghurukom sugad na la hin gutom nga mga lubo, nga uraura hin kalamot nga kinakaon pati tul-an nga waray salin ha pagkaaga.

⁴Diri kasasarigan ngan maglingo an iya mga manaragna; ginhuhugawan han kapadian an butang nga baraan, ngan ginlulubag an balaod han Dyos para la han ira kalugaringon nga kaupayan.

⁵Kundi aada la gihapon ha syudad an GINOO; ginbubuhat niya an matadong ngan diri gud an sayop. Ha kada aga dayuday gud niya binubuhat an matadong ngada han iya mga tawo. Kundi an diri magtadong nga mga tawo didto nagpapadayon la hin pagbinuhat hin kasaypanan ngan diri hira naaawod.

⁶Nasiring an GINOO, “Ginpuo ko in bug-os nga mga nasod; ginbungkag ko an ira mga syudad, ngan ginbayaan ko ha kabungkagan an ira mga pader nga mga lantawan. Ginbayaan an mga syudad; waray na mga tawo ha kakalsadahan—waray usa nga nahibilin.

⁷Naghunahuna ako nga matahod na ha akon an akon mga tawo ngan makarawat na hira han akon mga pagsaway, nga diri na gud nira hingangalimtan[6] an gintutdo ko ha ira nga pagturon-an. Kundi waray la kaiha binmalik na liwat hira han ira maraot nga panggawi.

⁸“Hulat la,” nasiring an GINOO. “Hulata an adlaw kon bumangon na ako hin pagsumbong han mga nasod. Ginlarang ko na hin pagtirok hin mga nasod ngan mga ginhadian basi abaton nira an kusog han akon kasina. Pag-uugtangon ko an bug-os nga tuna pinaagi han kalayo han akon kapungot.

⁹“Niyan babalyoan ko an mga tawo han mga nasod ngan mag-aampo hira ngadi ha akon gudla, ngan diri ngadto hin iba nga kadiyosan. Magsusugot ha akon hira ngatanan.

¹⁰Bisan tikang didto han hirayo nga Sudan magdadara ngadi ha akon hin mga halad an akon nagsasarang nga mga tawo.

¹¹Dida hito nga panahon, mga tawo ko, diri na kamo kinahanglan maawod nga sinmupil kamo ha akon. Kukuhaon ko an ngatanan nga mapahitas-on ngan parayawan, ngan diri na gud kamo masupil ha akon didto han akon baraan nga pungtod.[7]

¹²Bibilinan ko didto hin mapinaubsanon ngan makalolooy nga mga tawo nga madangop ha akon hin pakibulig.

¹³Diri na magbubuhat hin sayop bisan kan kanay an mga tawo han Israel nga mahibilin nga buhi, diri na magbibinuwa, o maglilimbong. Magmamainuswagon ngan himyang na hira, nga waray na nira sadang kahadlokan.”

¹⁴Pagkanta ngan goliat hin kalipay, mga tawo han Israel! Pagrayhak hin kinasingkasing, Jerusalem!

¹⁵Ginpahunong na han GINOO an pagkastigo ha iyo; ginkuha na niya an ngatanan niyo nga mga kaaway. Aada ha iyo an GINOO nga hadi han Israel; waray na kamo sadang kahadlokan.

¹⁶Maabot an panahon nga masiring hira ha Jerusalem, “Ayaw kahadlok, syudad han Sion! Ayaw paluyaha an iyo mga kamot!

¹⁷Aada ha iyo an GINOO nga iyo Dyos; mahatag hin pagdarag-an an iya gahom. Malilipay ha iyo an GINOO, ngan ha iya paghigugma tatagan kamo niya hin bag-o nga kinabuhi.[8] Magkakanta ngan magmamalipayon hiya tungod ha iyo,

¹⁸sugad kamalipayon hin mga tawo didto hin pyesta.” Nasiring an GINOO, “Gintapos ko na an akon pagtarhog hin pagpuo ha iyo ngan ginkuha ko na an iyo kaarawdan.[9]

¹⁹Maabot an panahon! Kakastigohon ko an mga nagtalumpigos ha iyo; tatalwason ko an ngatanan nga piay ngan pauulion ko an mga bihag. Hihimoon ko nga ira kadungganan an ira kaarawdan, ngan pagdadayawon hira han bug-os nga kalibutan.

²⁰Maabot an panahon! Pauulion ko an iyo nagsasarang nga mga tawo; hihimoon ko kamo nga bantogan ha bug-os nga kalibutan, ngan magmamainuswagon na liwat kamo.” An GINOO an nagyakan.