Read Waray Samarenyo Meaning Based Zacarias 1 Bible Online

Zacarias 1 - Waray Samarenyo Meaning Based bible

Zacarias 1

¹Dida han ikawalo nga bulan han ikaduha ka tuig nga emperador hi Dario han Persia, iginhatag han GINOO ini nga mensahe kan Zacarias nga manaragna, nga anak ni Berequias ngan apo ni Ido.

²Gintugon hi Zacarias han GINOO nga Labi Kamakagarahum nga sidngon an mga tawo, “Ako nga GINOO nasina hin duro han iyo kaapoy-apoyan,

³kundi yana nasiring ako ha iyo, ‘Balik kamo ngadi ha akon ngan mabalik ako ngada ha iyo.

⁴Ayaw kamo pagsubad han iyo kaapoy-apoyan. Maiha na nga panahon nga iginhatag ha ira han mga manaragna an akon mensahe hin pagsumat ha ira nga diri na hira mag-ukoy hin magraot ngan salaan nga kinabuhi. Kundi waray gud hira mamati o magsugot ha akon.

⁵Mga patay na an iyo kaapoy-apoyan ngan adto nga mga manaragna.

⁶Pinaagi han akon mga surugoon nga mga manaragna gintagan ko an iyo kaapoy-apoyan hin mga sugo ngan hin mga pahimatngon, kundi waray la nira ini pagbaliha ngan nag-antos hira han mga nahinabo ha ira. Katapos nagbasol hira ngan kinmilala hira nga ako nga GINOO nga Labi Kamakagarahum amo an nagkastigo ha ira sugad han angay ha ira ngan sumala han akon pagbuot.’”

⁷Dida han ika-24 nga adlaw han ika-11 nga bulan (an bulan han Sebat) han ikaduha ka tuig nga emperador hi Dario, iginhatag ha akon han GINOO in mensahe dida hin usa nga panan-awon ha gab-i.

⁸Hinkit-an ko in usa nga anghel han GINOO, nga nasakay hin pula nga kabayo. Hinmunong hiya dida hin kakahoyan nga mirtel didto hin kahamub-an, ngan ha luyo niya may iba nga mga kabayo—pula, kabang, ngan busag.

⁹Ginpakianhan ko hiya, “Mano, ano an kahulogan hini nga mga kabayo?” Binmaton hiya, “Ipapakita ko ha imo an kahulogan hini.

¹⁰Ginpadara ini han GINOO hin pagsudoy ngan pag-usisa han tuna.”

¹¹Ginsumatan nira an anghel: “Ginsudoy namon an bug-os nga kalibutan, ngan hinkit-an namon nga makalolooy ngan gindaog na an bug-os nga kalibutan.”

¹²Niyan nagsiring an anghel, “O GINOO nga Labi Kamakagarahum, nasina ka han Jerusalem ngan han mga syudad han Juda sulod hin 70 na ka tuig. San-o pa nimo ipapakita an imo kalooy ha ira?”

¹³Ginbaton han GINOO an anghel hin nakakaliaw nga mga pulong,

¹⁴ngan ginsiring ako han anghel nga igsangyaw ko an ginyakan han GINOO nga Labi Kamakagarahum: “Dako an akon paghigugma ngan pagpaid han Jerusalem nga akon baraan nga syudad,

¹⁵ngan nasisina gud ako han mga nasod nga nagpapahimulos hin kalinaw ngan kamurayaw. Kay samtang ginpupugngan ko an akon kasina kontra han akon mga tawo, gindugangan pa gud hini nga mga nasod an mga pag-antos han akon mga tawo.

¹⁶Sanglit binmalik ako ngadto ha Jerusalem ha pagpakita han akon kalooy ngadto han syudad. Pagtutukoron ko na liwat an akon Templo ngan pagtitindogon ko na liwat an syudad.”

¹⁷Ginsiring liwat ako han anghel hin pagsangyaw: “Nasiring an GINOO nga Labi Kamakagarahum nga magmamainuswagon na liwat an iya mga syudad ngan pagbubuligan na liwat niya an Jerusalem ngan pag-aangkonon an syudad nga iya kalugaringon.”

¹⁸Dida hin lain nga panan-awon hinkit-an ko in upat nga mga sungay hin baka.

¹⁹Ginpakianhan ko an anghel nga nakighimangraw ha akon, “Ano an kahulogan hini nga mga sungay?” Binmaton hiya, “Natindog ini para han mga kagamhanan han kalibutan nga nagpasarang han mga tawo han Juda, Israel, ug Jerusalem.”

²⁰Niyan ginpakita ako han GINOO hin upat nga mga panday nga may mga martilyo.

²¹Pinmakiana ako, “Ano an ginkanhi hini nga mga tawo?” Binmaton hiya, “Kinmanhi hira hin paghadlok ngan pagpukan han mga nasod nga nagpukan han tuna han Juda ngan nagpasarang han iya mga tawo.”