Read Waray Samarenyo Meaning Based Zacarias 13 Bible Online

Zacarias 13 - Waray Samarenyo Meaning Based bible

Zacarias 13

¹“Kon umabot na ito nga panahon,” nasiring an GINOO nga Labi Kamakagarahum, “matubod in burabod nga maglilinis han mga tulin ni David ngan han mga tawo han Jerusalem han ira sala ngan pagsingba hin mga diyosdiyos.

²Dida hito nga panahon kukuhaon ko an mga ngaran han mga diyosdiyos tikang han tuna, ngan waray na gud mahinunumdom ha ira. Paiiwason ko an bisan hin-o nga nasiring nga manaragna hiya, ngan kukuhaon ko an ungara hin pagsingba hin mga diyosdiyos.

³Niyan kon may-ada pa magpapadayon hin pagpanagna, susumatan hiya han iya kalugaringon nga amay ug iroy nga kinahanglan patayon hiya, kay nagsiring hiya nga nagyayakan hiya han pulong han GINOO, kundi naghimangraw lugod hiya hin mga buwa. Kon managna hiya, bubun-on hiya han iya kalugaringon nga amay ug iroy.

⁴Kon umabot na ito nga panahon, waray manaragna nga naparayaw han iya mga panan-awon, o magbubuhat sugad hin manaragna, o magbabado hin barahiboon nga bado hin manaragna, basi makaglimbong hin mga tawo.

⁵Lugod masiring hiya, ‘Diri ako manaragna. Parauma ako—nag-uma ako han tuna ha bug-os ko nga kinabuhi.’

⁶Niyan kon may magpakiana ha iya, ‘Ano man ito nga mga samad dida han imo dughan?’ mabaton hiya, ‘Naangkon ko ini didto han balay hin usa nga sangkay.’”

⁷Nasiring an GINOO nga Labi Kamakagarahum, “Pagmata, espada, ngan sulonga an magmarangno[18] nga nagbabantay ha akon ngaran! Pataya hiya ngan magsasarang an mga karnero. Susulongon ko an akon mga tawo,

⁸ngan magkakamatay in duha han tulo ka bahin han mga tawo ha bug-os nga tuna.

⁹Ngan sasarihan ko an ikatulo ka bahin nga mahisasalin nga buhi ngan lilinisan ko hira sugad nga ginpupurog hin kalayo an salapi. Sasarihan ko hira sugad han pagpurog hin bulawan. Niyan mag-aampo hira ha akon ngan babatonon ko hira. Pagsusumatan ko hira nga akon hira mga tawo ngan magtutug-an hira nga ako amo an ira Dyos.”