Read Waray Samarenyo Meaning Based Zacarias 14 Bible Online

Zacarias 14 - Waray Samarenyo Meaning Based bible

Zacarias 14

¹Hiraniay na an adlaw nga maghuhukom na an GINOO. Niyan paninikasan an Jerusalem ngan pagbabahinbahinon an mga tinikas ha atubangan han iyo mga mata.

²Pagtitirokon han GINOO an ngatanan nga mga nasod hin pakiaway han Jerusalem. Makukuha an syudad, paninikasan an kabablayan, ngan panlulugoson an kababayen-an. Bibihagon an katunga han mga tawo, kundi diri kukuhaon tikang han syudad an iba ha ira.

³Niyan magawas an GINOO ngan makikiaway hiya hadto nga mga nasod sugad han pakiaway niya han nag-agi nga mga panahon.

⁴Dida hito nga panahon matindog hiya didto ha Bukid han mga Olibo, nga aadto ha sinirangan han Jerusalem. Niyan an Bukid han mga Olibo matutunga tungod hin dako nga kahamub-an tikang ha sinirangan ngadto ha katundan. Mababalhin tipaamihan nga dapit an katunga han bukid ngan tipasalatan an katunga hini.

⁵Mapalagiw kamo pinaagi hini nga kahamub-an nga nabubutnga hin mga bukid.[19] Mapalagiw kamo sugad han pagpalagiw han iyo kaapoy-apoyan han paglinog ha panahon ni Hadi Oseas han Juda. Maabot an GINOO nga akon Dyos upod an ngatanan niya nga mga anghel.

⁶Kon umabot na ito nga panahon, mawawaray na gud kahagkot o yelo,[20]

⁷o bisan ano nga kasirom. Dayuday magkakamay-ada kapawa han adlaw bisan ha kagab-ihon. Kon san-o mahinanabo ini, an GINOO la an maaram.

⁸Kon umabot na ito nga panahon, mag-aawas tikang ha Jerusalem in masulog nga tubig, an katunga hini ngadto han Patay nga Dagat ngan an katunga ngadto han Mediteraneo. Mag-aawas ini ha bug-os nga tuig, ha panahon han kathuraw sugad man han kat-uran.

⁹Niyan magigin hadi an GINOO han bug-os nga tuna; sisingbahon hiya nga Dyos han ngatanan ngan kikilalahon hiya pinaagi han amo manta nga ngaran.

¹⁰Pagpapatagon an bug-os nga katunaan tikang ha Geba didto ha amihan nga dapit ngadto ha Rimon didto ha salatan nga dapit. Mananawantawan an Jerusalem ha igbaw han tuna nga naglilibot hini; an syudad matikang han Ganghaan ni Benjamin ngadto ha Kanto nga Ganghaan diin nakadto in uruuna nga ganghaan, ngan tikang han Lantawan ni Hananel ngadto han mga piriihan hin bino han hadi.

¹¹Mag-uokoy didto an mga tawo hin waray kataragman, nga diri na gud pagtatarhogon hin pagkapuo.

¹²Magpapadara an GINOO hin makalilisang nga sakit ngada han ngatanan nga mga nasod nga makikiaway han Jerusalem. Madudunot an ira unod samtang buhi pa hira; madudunot an ira mga mata ngan an ira mga dila.

¹³Dida hito nga panahon paggugupongon hira han GINOO ngan mahahadlok hira nga kakaptan an iya sapit nga tawo ngan iya papatayon.

¹⁴Makikiaway an mga tawo han Juda hin pagpanalipod han Jerusalem. Tilikason nira an mga manggad han ngatanan nga mga nasod—damo hin duro nga bulawan, salapi, ngan mga panapton.

¹⁵Duduktan liwat hin makalilisang nga sakit an mga kabayo, mga mula, mga kamelyo, ngan mga asno—an ngatanan nga kamanampan didto han mga kampo han kaaway.

¹⁶Niyan mapakadto ha Jerusalem kada tuig an ngatanan nga nanhisalin nga buhi tikang han mga nasod nga sinmulong han Jerusalem hin pagsingba han GINOO nga Labi Kamakagarahum nga hadi ngan pagsaurog han Pyesta han mga Payagpayag.

¹⁷Kon dumiri in bisan ano nga nasod hin pagkadto ngan pagsingba han GINOO nga Labi Kamakagarahum nga hadi, diri mauran didto han ira tuna.

¹⁸Kon dumiri an mga Ehiptohanon hin pagsaurog han Pyesta han mga Payagpayag hahampakon hira han amo manta nga sakit nga ipadadara han GINOO ngada han tagsa nga nasod nga nadiri pagkadto.

¹⁹Amo ini an ihahatag nga kastigo han Ehipto ngan didto han ngatanan nga iba nga mga nasod, kon diri hira magsaurog han Pyesta han mga Payagpayag.

²⁰Dida hito nga panahon bisan an bitay nga mga kampanilya han mga kabayo pagsusuratan han mga pulong “Iginhalad ngadto han GINOO.” An lutoan nga mga kaldero didto han Templo masusugad hin kabaraan han mga makaong ha atubangan han altar.

²¹Lalainon para hin paggamit hin pagsingba han GINOO nga Labi Kamakagarahum an tagsa nga lutoan nga kaldero didto ha Jerusalem ngan didto ha bug-os nga Juda. Gagamiton ini han mga tawo nga naghahalad hin mga halad nga tinubod hin paglaga han karne han mga hayop nga tinubod. Kon umabot na ito nga panahon, mawawaray na mga magparatigayon didto han Templo han GINOO nga Labi Kamakagarahum.