Read Waray Samarenyo Meaning Based Zacarias 6 Bible Online

Zacarias 6 - Waray Samarenyo Meaning Based bible

Zacarias 6

¹May-ada ko liwat lain nga panan-awon. Hini nga takna hinkit-an ko in upat nga mga karuwahe nga nagawas tikang ha butnga hin duha nga mga bukid nga bronse.

²Gindadanas hin pula nga mga kabayo an syahan nga karuwahe, hin itom nga mga kabayo an ikaduha,

³hin busag nga mga kabayo an ikatulo, ngan hin kabang nga mga kabayo an ikaupat.

⁴Niyan ginpakianhan ko an anghel, “Ano man an kahulogan hini nga mga karuwahe?”

⁵Binmaton hiya, “Amo ini an upat nga kahanginan; pagkakagawas pa gud la nira tikang ha atubangan han GINOO han bug-os nga tuna.”

⁶Nagtipakadto ha amihan nga dapit han Babilonia an karuwahe nga gindadanas han itom nga mga kabayo, ngan nagtipakadto ha habagatan nga dapit han nasod an kabang nga mga kabayo, ngan nagtipakadto ha katundan nga dapit an busag nga mga kabayo.

⁷Han paggawas han kabang nga mga kabayo, nagmanya hira kay karuyag na gud nira hin paglakat ngan pag-usisa han tuna. Nagsiring an anghel, “Kadto na ngan usisaha niyo an tuna!”—ngan gintuman nira ini.

⁸Niyan ginmoliat ha akon an anghel, “Ginpahugpoy han mga kabayo nga nagtipakadto han amihan nga dapit han Babilonia an kasina han GINOO.”

⁹Iginhatag ha akon han GINOO ini nga mensahe.

¹⁰Nagsiring hiya, “Dad-a an mga ginhatag han mga bihag nga amo hira Holdai, Tobias, ug Idaias, ngan pakadto dayon han balay ni Josias nga anak ni Sofonias. Binmalik na ini ngatanan nga mga tawo tikang han pagkabihag nira didto ha Babilonia.

¹¹Paghimo hin korona nga salapi ug bulawan, ngan ibutang ini ha ulo han Labaw nga Padi nga hi Josue nga anak ni Josadac.

¹²Sidnga hiya nga nasiring an GINOO nga Labi Kamakagarahum, ‘Matubo didto han iya dapit an tawo nga ginngangaranan An Sanga, ngan pagtitindogon na liwat niya an Templo han GINOO.

¹³Amo hiya an magtitindog hini ngan makarawat hiya han kadungganan nga angay hin usa nga hadi, ngan paghahadian niya an iya mga tawo. Matindog in padi ha sapit han iya trono, ngan magbubulig hira hin pagbuhat dida hin kalinaw ngan pagsinabtanay.’

¹⁴An korona mahihimo nga hinumdoman didto han Templo han GINOO ha pagpasidungog kanda Heldai,[7] Tobias, Jedaias, ug Josias.”[8]

¹⁵Magkakaabot in mga tawo nga nag-uokoy ha kahigrayoan ngan mabulig hira hin pagtindog na liwat han Templo han GINOO. Ngan kon matindog na liwat ini, mahibabaro kamo nga ginsugo ako ngada ha iyo han GINOO nga Labi Kamakagarahum. Mahinanabo ini ngatanan kon pagsugton gud niyo an mga sugo han GINOO nga iyo Dyos.