Read Waray Samarenyo Meaning Based Zacarias 7 Bible Online

Zacarias 7 - Waray Samarenyo Meaning Based bible

Zacarias 7

¹Dida han ikaupat nga adlaw han ikasiyam nga bulan (an bulan han Kisleb) han ikaupat ka tuig nga emperador hi Dario, iginhatag ha akon han GINOO in usa nga mensahe.

²Ginsugo han mga tawo han Betel hira Sareser ug Regemmelec ngan an ira mga tawo ngadto han Templo han GINOO nga Labi Kamakagarahum basi mag-ampo hira nga kalooyan hira han GINOO,

³ngan pagpakiana han kapadian ngan han mga manaragna kon kinahanglan ba magpadayon hira hin pagmabidoon tungod han pagkabungkag han Templo, pinaagi han pagpuasa dida han ikalima nga bulan sumala han ginbuhat nira sulod hin damo na nga katuigan.

⁴Amo ini an mensahe han GINOO nga inmabot ha akon.

⁵Nagsiring hiya, “Sumati an mga tawo han tuna ngan an kapadian, nga han ira pagpuasa ngan pagmasulob-on dida han ikalima ngan han ikapito nga mga bulan sulod hini nga 70 ka tuig, diri adto pagpasidungog ha akon.

⁶Ngan han ira pangaon ngan panginom, para la ini han ira kalugaringon nga pagkabusog.”

⁷Amo ini an ginsiring han GINOO pinaagi han mga una pa nga manaragna, dida han panahon nga mainuswagon pa ngan puno hin mga tawo an Jerusalem ngan han damo pa in mga tawo nga nag-uokoy diri la didto han mga bungto nga palibot han syudad, kundi didto liwat han habagat nga katunaan ngan didto han katundan nga kapatagan.

⁸Iginhatag han GINOO ini nga mensahe ngadto kan Zacarias:

⁹“Han maiha na nga panahon ginhatag ko ini nga mga sugo ngadto han akon mga tawo: ‘Kinahanglan nga kitaon niyo nga ginbubuhat an katadongan ngan kinahanglan nga ipakita an iyo paghigugmaay ngan pagkalooy han iyo igkasi-tawo.

¹⁰Ayaw niyo pagtalumpigosa an mga balo nga kababayen-an, mga ilo, mga lumalangyaw nga nag-uokoy dida ha iyo, o bisan hin-o nga makalolooy. Ngan ayaw kamo paghunahuna hin mga paagi hin pagdaot han iyo igkasi-tawo.’

¹¹“Kundi dinmiri gud pamati an akon mga tawo. Ginsadhan nira an ira mga hunahuna,

¹²ngan ginpatig-a nira sugad hin bato an ira mga kasingkasing. Tungod nga waray hira mamati han pagturon-an nga ginpadara ko pinaagi han mga una pa nga mga manaragna, nasina ako hin duro.

¹³Tungod nga waray hira mamati han akon pulong, waray man ako bumaton han ira pag-ampo.

¹⁴Sugad hin bagyo ginpasarang ko hira hin pag-ukoy didto hin langyaw nga mga nasod. Ginbayaan nga sugad hin kamingawan ini nga matahom nga tuna nga waray na nag-uokoy didto.”