Read Waray Samarenyo Meaning Based Zacarias 8 Bible Online

Zacarias 8 - Waray Samarenyo Meaning Based bible

Zacarias 8

¹Iginhatag han GINOO nga Labi Kamakagarahum ini nga mensahe ngadto kan Zacarias:

²“Naghingyap ako hin pagbulig han Jerusalem tungod han akon dako nga paghigugma han mga tawo hini, gugma nga nakapasina ha akon han ira mga kaaway.

³Mabalik ako ngadto ha Jerusalem nga akon baraan nga syudad, ngan mag-uokoy ako didto. Kikilalahon ini nga amo an matinumanon nga syudad, ngan tatawagon nga baraan nga pungtod an pungtod han GINOO nga Labi Kamakagarahum.[9]

⁴Manlilingkod na liwat didto ha mga plasa han syudad an mga kalagsan nga nagtutungkod na hin paglakat.

⁵Ngan mapupuno na liwat an kakalsadahan hin mga nag-uurugyag nga kabataan.

⁶“Bangin diri mahirimo ini hadton mga nanhibilin han nasod yana, kundi para ha akon mahihimo ini.

⁷Babawion ko an akon mga tawo tikang han katunaan nga gindad-an ha ira,

⁸ngan ibabalik ko hira tikang ha sinirangan ngan katundan hin pag-ukoy didto ha Jerusalem. Magigin akon hira mga tawo ngan ako magigin ira Dyos nga maghahadi ha ira nga matinumanon ngan matadong.

⁹“Pagmadasigon! Hibabatian na niyo yana an amo ngahaw nga mga pulong nga ginhimangraw han mga manaragna hadto nga panahon nga ginpapahimutang an patukoranan hin pagtindog na liwat han akon Templo.

¹⁰Han waray pa ito nga panahon waray nakakaakos hin pagsuhol hin mga tawo o mga mananap, ngan waray tawo nga diri nakada ha kataragman. Ginturutugpo ko an mga tawo.

¹¹Kundi yana lain na an akon pagdumara han mga nanhisalin nga buhi hini nga nasod.

¹²Dida hin kalinaw tatamnan nira an ira mga uma. Mamumunga an ira mga ubas, mahatag hin mga abot an tuna, ngan magkakamay-ada damo nga uran. Ihahatag ko ini ngatanan nga kaupayan ngadto han mga tawo nga mahisalin nga buhi han akon nasod.

¹³Mga tawo han Juda ug Israel! Han inmagi nga panahon nagpaturutunglo an mga lumalangyaw pinaagi hin pagsiring, ‘Mahulog unta ha iyo an mga karat-an nga nahulog ngada han Juda ug Israel!’ Kundi pagtatalwason ko kamo, ngan unina may hinsiring adto nga mga lumalangyaw, ‘Kumarawat unta kamo han amo ngahaw nga kaupayan nga kinarawat han Juda ug Israel!’ Sanglit pagmadasigon kamo ngan ayaw kamo kahadlok.”

¹⁴Nasiring an GINOO nga Labi Kamakagarahum, “Han pagtuksoha ha akon han iyo kaapoy-apoyan hin kasina, nakahunahuna ako hin karat-an para ha ira, ngan waray ako magbalhin han akon hunahuna, kundi akon lugod gintuman.

¹⁵Kundi yana naghuhunahuna ako hin pagpakaupay han mga tawo han Jerusalem ug Juda. Sanglit ayaw kamo kahadlok.

¹⁶Amo ini an kinahanglan niyo pagbuhaton: Igyakan niyo an kamatuoran ha iyo igkasi-tawo. Didto han mga hukmanan ihatag niyo an matuod nga katadongan nga nagdadara hin kalinaw.

¹⁷Ayaw kamo paghunahuna hin mga paagi hin paggidumotdumot. Ayaw kamo panumpa hin buwa. Napupungot gud ako han pagbinuwa, han diri pagkamatadong, ngan han panraogdaog.”

¹⁸Iginhatag han GINOO nga Labi Kamakagarahum ini nga mensahe ngadto kan Zacarias:

¹⁹“Mahihimo nga mga pyesta hin pagrayhak ngan pagkalipay han mga tawo han Juda an mga pagpuasa nga binubuhat dida han ikaupat, ikalima, ikapito, ngan ikanapulo nga mga bulan. Kinahanglan higugmaon niyo an kamatuoran ug kalinaw.”

²⁰Nasiring an GINOO nga Labi Kamakagarahum, “Maabot an panahon nga mapakadto ha Jerusalem in mga tawo nga tikang hin damo nga mga syudad.

²¹Adton tikang hin usa nga syudad masiring hadton tikang hin lain nga syudad, ‘Magsisingba kami han GINOO nga Labi Kamakagarahum ngan mag-aampo kami basi pagpakaupayon kami niya. Tana, upod ha amon!’

²²Mapakadto ha Jerusalem in damo[10] nga mga tawo ngan gamhanan nga mga nasod hin pagsingba han GINOO nga Labi Kamakagarahum ngan hin pag-ampo basi pagpakaupayon niya hira.

²³Dida hito nga mga adlaw mapakadto hin usa nga Judiyo in napulo nga mga lumalangyaw ngan masiring, ‘Karuyag namon umangbit han iyo kapalaran, kay hinbatian namon nga aada ha iyo an Dyos.’”