Read Waray Samarenyo Meaning Based Malaquias 2 Bible Online

Malaquias 2 - Waray Samarenyo Meaning Based bible

Malaquias 2

¹Nasiring an GINOO nga Labi Kamakagarahum ngadto han kapadian, “Para ha iyo ini nga sugo:

²Kinahanglan pasidunggan ako niyo pinaagi han iyo binubuhat. Kon diri kamo mamati ha akon, ikakada ko an gaba ha iyo. Higagabaan an mga butang nga iyo kinakarawat para han iyo kabuhian. Ngani ginabaan na ini, kay diri niyo tinutuman hin kinasingkasing an akon sugo.

³Kakastigohon ko an iyo mga anak ngan imumodmod ko an iyo mga bayhon dida han tai han mga mananap nga iyo iginhahalad—ngan ilalabog ko kamo ngadto han harapilan hin tai.

⁴Niyan mahibabaroan niyo nga iginhatag ko ha iyo ini nga sugo, basi diri pagsupakon an akon ginsaaran han kapadian nga mga tulin ni Levi.

⁵“Dida han akon ginsaaran, ginsaad ko ha ira in kinabuhi ngan kamurayaw, ngan amo ini an iginhatag ko ha ira, basi tumahod unta hira ha akon. Hadto nga mga adlaw nagtahod ngan nahadlok gud hira ha akon.

⁶Nagtutdo hira han matadong, diri han sayop. Murayaw an ira pag-ukoy upod ha akon; diri la nga ginbuhat nira an matadong, kundi ginbuligan liwat nira an iba nga humunong na hin pagbuhat hin maraot.

⁷Katungdanan ini han kapadian hin pagtutdo han matuod nga hibaro bahin han Dyos. Kinahanglan kumadto ha ira an mga tawo hin pag-aram han akon kaburot-on, kay amo hira an magsarangyaw han GINOO nga Labi Kamakagarahum.

⁸“Kundi yana tinalikdan niyo nga kapadian an matadong nga dalan. An iyo pagturon-an amo an tinikangan han pakasayop hin damo nga mga tawo. Ginsupak niyo an ginsaaran nga ginhimo ko ha iyo.

⁹Sanglit hihimoon ko man nga taramayon kamo han mga tawo han Israel, kay diri niyo ginsusugot an akon kaburot-on, ngan kon nagtututdo kamo han akon mga tawo, may-ada niyo pinalabi ug mga pinili.”

¹⁰Diri ba kita ngatanan may usa la nga amay? Diri ba gintuha kita ngatanan hin usa la nga Dyos? Niyan, kay ano man nga nagpapalingolingo man kita, ngan kay ano man nga gintatamay ta an ginsaaran nga ginhimo han Dyos ngan han aton kaapoy-apoyan?

¹¹Ginsupak han mga tawo han Juda an ira saad sa Dyos ngan ginbuhat nira in makangingirhat nga butang didto ha Jerusalem ngan ha bug-os nga nasod. Ginhugawan nira an Templo nga hinihigugma han GINOO. Nangasawa an kalalaken-an hin kababayen-an nga nagsisingba hin langyaw nga kadiyosan.

¹²Igawas unta han GINOO tikang han bungto han Israel adton mga nagbubuhat hini, ngan diri na gud nira tugotan hin pagtampo hin pagdara han mga halad han aton nasod ngadto han GINOO nga Labi Kamakagarahum.[1]

¹³Iini pa in lain nga butang nga iyo binubuhat. Linulumos niyo hin mga luha an altar han GINOO, pinaagi hin pagtangis ngan pagnguyngoy, kay diri na niya kinakarawat an mga halad nga iyo gindadara ha iya.

¹⁴Napakiana kamo kay ano nga diri na niya kinakarawat ini. Tungod ini nga maaram hiya nga naglingo ka han imo asawa nga imo pinangasawa han batan-on ka pa. Kapadis mo hiya hadto, ngan ginsupak mo an imo saad ha iya, bisan kon iginsaad mo ha atubangan han Dyos nga magmamatinumanon ka ha iya.

¹⁵Diri ba ginhimo han Dyos ikaw ngan han imo asawa nga usa la nga lawas ug espiritu?[2] Ano man an iya tuyo hini? Basi magkamay-ada kamo mga anak nga tinuod nga mga tawo han Dyos. Sanglit talinguhaa nga waray usa ha iyo nga maglingo han iya asawa.

¹⁶“Nadiri ako han pagkabulag,” nasiring an GINOO nga Dyos han Israel. “Nadiri ako nga buhaton han bana ini nga maraot nga buhat ngadto han iya asawa. Talinguhaa nga diri ka maglingo han imo asawa.”

¹⁷Ginul-an na an GINOO tungod han iyo mga yakan. Kundi napakiana kamo, “Gin-unan-o namon hin pagguol ha iya?” Pinaagi hin pagsiring, “Naghuhunahuna an GINOO nga Labi Kamakagarahum nga maupay adton nagbubuhat hin maraot; ngani naruruyag hiya ha ira.” O pinaagi hin pagpakiana, “Hain na man an Dyos nga matadong?”