Read Waray Samarenyo Meaning Based 1 Macabeo 10 Bible Online

1 Macabeo 10 - Waray Samarenyo Meaning Based bible

1 Macabeo 10

¹Dida han tuig 160[25] hi Alejandro Epifanes[26] nga anak ni Antioco Kwatro inmabot ha Tolemaida ngan iya nabihag an syudad. Ginkarawat hiya han mga tawo nga ira hadi.

²Han pakabati ni Demetrio hiunong hini, nagtirok hiya hin damo nga kasondalohan ngan ginmawas hiya hin pakiaway kan Alejandro.

³Hito nga panahon ginpadad-an ni Demetrio hi Jonatan hin usa nga minagsarangkay nga surat nga puno hin mga pag-ulog-ulog,

⁴ha paglaom nga makakabig niya hi Jonatan ha pagdapig ha iya ngan masasangkay niya an mga Judiyo san-o makigsabot ha ira hin kalinaw hi Alejandro kontra ha iya.

⁵Naghunahuna hi Demetrio nga hinunumdoman gud ni Jonatan an ngatanan nga mga kasaypanan nga ginbuhat ni Demetrio ha iya, han iya kabugtoan, ngan han bug-os nga Judiyo nga nasod.

⁶Sanglit ginhimo ni Demetrio hi Jonatan nga kabulig niya ngan gintagan hiya hin katungdanan hin pagtukod hin kasondalohan ngan pagsangkap hini nga kasondalohan. Nagsugo liwat hiya nga kinahanglan igtubyan ngadto kan Jonatan an mga bariga nga ginpriso didto han kota ha Jerusalem.

⁷Sanglit kinmadto ha Jerusalem hi Jonatan ngan iya ginbasa an surat ngadto han ngatanan nga mga tawo ngan ngadto han mga tawo didto han kota.

⁸Nagkahadlok hin duro ini nga mga tawo han paghibaro nira nga gintagan han hadi hi Jonatan hin katungdanan hin pagtukod hin kasondalohan.

⁹Ira igintubyan an mga bariga ngadto kan Jonatan ngan iginbalik hira ni Jonatan ngadto han ira mga kag-anak.

¹⁰Nagkampo hi Jonatan didto ha Jerusalem ngan nagtikang hiya hin pagtindog na liwat ngan pag-ayad han syudad.

¹¹Ginsugo niya an mga magtirindog hin paggamit hin kwadrado nga mga bato para han mga pader palibot han Bukid Sion. Ginbuhat ini nira.

¹²Ginbayaan han mga lumalangyaw an mga kota nga gintindog ni Baquides;

¹³binmaya han iya barantayan an tagsa ka tawo ngan inmoli ngadto han kalugaringon niya nga nasod.

¹⁴Kundi may-ada pa pira nga mga Judiyo nga binmaya han Balaod ni Moises ngan mga sugo han Balaod, nga nagpabilin didto ha Betsur, nga amo an ira kataposan nga darangpan nga dapit.

¹⁵Nahibaro hi Hadi Alejandro hiunong han mga iginsaad ni Demetrio kan Jonatan ngan nahibaro liwat hiya hiunong kan Jonatan ngahaw, hiunong han mga pag-awayan nga iya inatubang, han iya mag-isog nga mga buhat, ngan han kakurian nga gin-ilob niya ngan han iya kabugtoan.

¹⁶Maaram hiya nga diri na gud hiya makakaagi hin iba nga tawo nga sugad kan Jonatan, sanglit nakahunahuna hiya hin paghimo ha iya nga iya sangkay ngan kabulig.

¹⁷Ginsuratan niya hi Jonatan hini nga surat:

¹⁸“Tikang kan Hadi Alejandro ngadto kan Jonatan nga iya sangkay, damo nga mga pangumosta.

¹⁹Hinbatian ko nga usa ka nga maisog nga tawo nga nakab-ot mo an katungod hin ka usa nga sangkay han hadi.

²⁰Yana nga adlaw gintudlok ko ikaw nga Labaw nga Padi han imo nasod ngan ihahatag ko ha imo an ngaran nga ‘Sangkay han Hadi.’ Mahihimo ka nga amon kabulig ngan ipakita ha amon an imo pag-ugop.” Iya liwat ginpadad-an hiya hin usa nga hadianon nga hilawig nga panapton ngan hin usa nga korona.

²¹Nagsul-ot hi Jonatan han hilawig nga mga panapton han Labaw nga Padi dida han ikapito nga bulan han tuig 160[27] dida han Pyesta han mga Payagpayag. Nagtukod hiya hin kasondalohan ngan nagtirok hin damo nga mga kinahanglanon nga mga higamit ha pag-awayan.

²²Han paghibaro hini ni Demetrio, naguol hiya ngan nagsiring,

²³“Kay ano nga naunahan man kita ni Alejandro? Nagmarig-on an iya kahimtang pinaagi han iya pakig-urosa han mga Judiyo.

²⁴Magsusurat ako hin pakigsangkay ha ira ngan ihahatag ko in dagko nga mga katungdanan ngan mga regalo, basi umugop hira ha akon.”

²⁵Nagsurat hiya: “Tikang kan Demetrio ngadto han nasod han mga Judiyo, damo nga mga pangumosta.

²⁶Nalipay kami hin paghibaro namon nga nagtuman kamo han iyo mga katungdanan han aton ginkasabotan hin kalinaw, nagpabilin kamo hin pakig-unong ha amon ngan waray kamo kumampi ngadto han amon mga kaaway.

²⁷Yana kon magpadayon kamo hin pakig-unong ha amon, amon kamo babaloson hin maupay.

²⁸Diri kamo namon pababaydon hin damo nga mga buhis ngan diri damo an ipapagtuman ha iyo.

²⁹Akon yana igbubuot ha ngatanan nga mga Judiyo nga diri na hira mabayad han hin-araan nga mga buhis, han mga buhis han asin, ngan han iba pa nga mga buhis.

³⁰Dugang pa, tikang hini nga adlaw waray na niyo katungdanan hin pagbayad ha akon han ikatulo ka bahin han iyo mga inani ngan han katunga han abot nga bunga hin kahoy. Tikang yana diri na ako magkikinahanglan hini nga mga baraydan tikang ha Judea o tikang han tulo nga mga distrito nga igindugang ngadto ha Judea tikang ha Samaria ug Galilea.

³¹An Jerusalem ngan an higrani nga katunaan han syudad kikilalahon nga usa nga baraan nga syudad ngan diri na ini mabayad han ngatanan nga mga buhis.

³²Diri na ako maghihilabot han kota didto ha Jerusalem, ngan igtutubyan ko ini ngadto han Labaw nga Padi, nga amo an magbubutang didto hin mga magbarantay nga iya karuyag.

³³Bubuhian an ngatanan nga mga Judiyo nga napriso tungod hin away ha bisan diin nga dapit han akon ginhadian. Diri na hira pababaydon hin mga buhis, bisan han buhis han ira kabakahan.[28]

³⁴Waray susukton nga mga buhis tikang hin bisan hin-o nga Judiyo ha bisan diin nga dapit han akon ginhadian, nga buhis han mga Adlaw nga Iparahuway, mga pyesta han Bag-o nga Pagsubang han Bulan, ngan iba pa nga iglilihi nga mga adlaw.

³⁵Waray tawo nga may-ada katungod dida hini nga mga adlaw hin pagsukot o hin pagsamok ha iyo ha bisan ano nga paagi.

³⁶“Mahihimo makagsondalo an mga Judiyo dida han hadianon nga hugpo hin kasondalohan tubtob ha kadamo nga 30,000 ka tawo, ngan makarawat hira hin sugad nga suhol nga kinakarawat han iba nga hadianon nga mga sondalo.

³⁷Igbubutang an iba ha ira didto han dagko nga hadianon nga mga kota, ngan an iba igkakadto hin dagko nga mga katungdanan ha pamunoan. Mga Judiyo na an ira mga pangulo ngan mga opisyal, ngan tutugotan hira hin pagsunod han kalugaringon nira nga mga balaod ngan mga pamatasan, sugad han pagtugot han hadi para han mga tawo han Judea.

³⁸“An tulo nga mga distrito nga igindugang ngadto ha Judea tikang han katunaan han Samaria itatampo hin paghiusa han Judea ngan igbubutang ini ha ubos gud han gahom han Labaw nga Padi.

³⁹Ihinahatag ko ngadto han Templo didto ha Jerusalem para han kagarastohan ha pagdumara hini an mga buhis tikang han syudad ha Tolemaida ngan han mga tuna nga sakop hini nga syudad.

⁴⁰Nagsasaad liwat ako hin paghatag hin tinuig nga regalo nga 15,000 ka bug-os nga kwarta nga salapi tikang han natirok nga kwarta didto han hirimosan han hadi.

⁴¹An ngatanan nga natirok nga kwarta para hin pagbulig han pamunoan nga waray mabaydi han naglabay nga katuigan, pagbabaydan ngan ipadadayonon an pagbayad hini tikang yana para han buruhaton han Templo.

⁴²Dugang pa hini, diri na namon pagkikinahanglanon an tinuig nga 5,000 ka bug-os nga kwarta nga salapi tikang han abot han Templo. Pagtatag-iyahon ini nga kwarta han kapadian nga nag-aataman han Templo.

⁴³Bisan hin-o nga nakautang han hadi o bisan ano nga utang ngan dumangop ngadto han Templo ha Jerusalem o ha bisan diin nga dapit nga sakop han Templo, diri hiya pagdadakpon o pag-aagawan han iya mga hiagi ha bisan diin nga dapit han akon ginhadian.

⁴⁴An mga gasto para hin pagtindog na liwat ngan pag-ayad han Templo kukuhaon tikang han hirimosan hin kwarta han hadi.

⁴⁵Ha amo ngahaw nga paagi, kukuhaon tikang han hirimosan hin kwarta han hadi an mga gasto para hin pagtindog na liwat han mga pader han Jerusalem ngan han nagpapalibot nga mga salipdanan hini, sugad man han mga pader hin mga napili nga mga bungto ha Judea.”

⁴⁶Han paghibaro ni Jonatan ngan han mga tawo han mga hangyo ni Hadi Demetrio, dinmiri hira hin pagtuod o hin pagkarawat hini, kay nahinumdom hira han iya mapintas nga pagdumara ha ira ngan han makalilisang nga mga kasamokan nga iya ginbuhat ha ira.

⁴⁷Ngadto lugod hira ugop kan Alejandro kay amo hiya an syahan makigsabot ha ira hin kalinaw, ngan nagpabilin hira nga iya mga kaurosa samtang buhi pa hiya.

⁴⁸Nagtukod hi Hadi Alejandro hin usa nga dako nga hugpo hin kasondalohan ngan nag-atag hira ha pag-awayan nga naatubang kan Demetrio.

⁴⁹Kundi han pagkatapo na didto ha pag-awayan han mga kasondalohan han duha nga hadi, inmisol ngan nanmalagiw an kasondalohan ni Alejandro.[29] Ginlanat hira ni Demetrio ngan nagdaog hiya han away.

⁵⁰Makalilisang an pakig-away ni Alejandro[30] tubtob han katunod han adlaw, kundi ginpatay hi Demetrio hito nga adlaw.

⁵¹Niyan nagpadara hi Alejandro hin magturuhay ngadto kan Hadi Tolomeo Sixto han Ehipto upod ini nga mensahe:

⁵²“Binmalik na ako ha akon ginhadian ngan linmingkod na ako dida han trono han akon kaapoy-apoyan. Ako na an nagdudumara han pamunoan, ngan ako na an magburuot han nasod.

⁵³Pinakiawayan ko hi Demetrio ngan ginpirde ko hiya ngan an iya kasondalohan, ngan akon na naagaw an iya ginhadian.

⁵⁴Yana andam na ako hin pakighiusa ha imo. Igpaasawa ha akon an imo anak nga babaye, ngan tatagan ko kamo nga duha hin mga regalo nga angay ha iyo.”

⁵⁵Binmaton hi Tolomeo, “Usa adto nga dako nga adlaw han pagbalik mo ha imo nasod ngan pagkarawat mo han trono han imo kaapoy-apoyan.

⁵⁶Nauyon ako han imo ginhangyo, kundi pagkita kita anay didto ha Tolemaida. Magkakakilala kita didto, ngan igpapaasawa ko ha imo an akon anak nga babaye.”

⁵⁷Sanglit dida ha tuig 162[31] ginmikan ha Ehipto hira Tolomeo ug Cleopatra[32] nga iya anak nga babaye ngan inmabot ha Tolemaida.

⁵⁸Gintapo hira ni Hadi Alejandro, ngan iginpaasawa ha iya ni Tolomeo an iya anak nga babaye. Ginsaurog an pagkasal dida hin hadianon nga pagkalipay didto ha Tolemaida.

⁵⁹Nagsurat hi Hadi Alejandro kan Jonatan ngan naghangyo hiya hin pakigkita ha iya.

⁶⁰Sanglit, ha usa nga pagpakita hin pagkabahandianon, kinmadto ha Tolemaida hi Jonatan ngan iginkakita niya an duha nga mga hadi. Iya gintagan hira hin mga regalo nga salapi ug bulawan, ngan gintagan liwat niya hin damo nga mga regalo an dumagko nga mga opisyal nga inmupod ha ira. Naruyagan nira hin duro hi Jonatan.

⁶¹Ha amo ngahaw nga panahon, nagpasaka hin mga sumbong kontra kan Jonatan in pira nga mga maglingo nga mga Judiyo, nga karuyag magbuhat hin kasamokan ha iya, kundi waray hira pamatii ni Hadi Alejandro.

⁶²Nagsugo lugod hiya nga tagan hi Jonatan hin hadianon nga higlawig nga mga panapton nga iya igsusul-ot,

⁶³ngan ginpasidunggan hiya pinaagi hin pagpalingkora ha iya sapit. Ginsiring ni Alejandro an iya mga opisyal nga dad-on hi Jonatan ngadto ha butnga han syudad ngan igpahibaro nga kinahanglan waray tawo nga magsumbong kontra ha iya hin waray la hinungdan ngan waray tawo nga magdara ha iya hin bisan ano nga kasamokan.

⁶⁴Han pakakita han mga magsurumbong ha iya han mga kadungganan nga iginhatag ha iya, han pakabati nira han pahibaro, ngan han ira pakakita ha iya nga nakakabado na han hadianon nga higlawig nga mga panapton, nangalagiw hira ngatanan.

⁶⁵Ginpasidunggan pa han hadi hi Jonatan pinaagi hin paglistahan ha iya dida han Syahan nga Lista han “Kasangkayan han Hadi” ngan pinaagi hin paghimoa ha iya nga heneral ngan gobernador han iya lalawigan.

⁶⁶Binmalik hi Jonatan ngadto ha Jerusalem nga malipayon ngan malamposon.

⁶⁷Dida han tuig 165[33] binmaya han Creta hi Demetrio Segundo nga anak ni Demetrio Primero, ngan inmabot hiya ha Siria nga tuna han iya kaapoy-apoyan.

⁶⁸Han pakabati ni Hadi Alejandro hiunong hini, nabaraka hiya ngan binmalik ngadto ha Antioquia nga kapital han Siria.

⁶⁹Gintudlok na liwat ni Demetrio hi Apolonio nga gobernador han Siria Mayor. Nagtukod hi Apolonio hin usa nga dako nga hugpo hin kasondalohan, nagkampo hirani han Jamnia, ngan nagpadara han masunod nga mensahe ngadto kan Jonatan, an Labaw nga Padi:

⁷⁰“Tungod ha imo ginyuyubitan la ako, kundi kay ano nga nagpapadayon ka hini nga pagsupil didto han imo kabukiran, kon waray man nabulig ha imo?

⁷¹Kon tinuod nga natapod ka han imo kasondalohan, lugsong ngadi ha kapatagan ngan pakig-away, basi kasarihan an aton kakusog. Usisaha an kahimtang yana ngan hibabaroan mo nga nadapig ha akon an mga kasondalohan nga natikang han mga syudad.

⁷²Hibabaroan mo kon hin-o ako ngan kon hin-o an akon mga kabulig, ngan hibabaroan mo nga diri ka gud takos hin pakig-asdang ha akon. Ginpirde ko na makaduha an mga una ha imo didto han kalugaringon nira nga tuna;

⁷³sanglit uunanhon mo hin pagpaabot nga mapipirde an akon dikabayo nga kasondalohan ngan han akon kasondalohan nga aadi ha kapatagan? Waray didi bisan gutiay nga bato nga katatagoan ngan waray dapit nga kakalagiwan.”

⁷⁴Han pakakarawat ni Jonatan hini nga mensahe nga tikang kan Apolonio, nasina hiya. Nagdara hiya hin 10,000 nga gimamag-upayi nga mga sondalo nga tikang ha Jerusalem; nagdara liwat hi Simon nga iya mga bugto hin mga sondalo, ngan an ira duha ka hugpo hin kasondalohan

⁷⁵nagkampo gawas han Jopa. Waray hira pasudla han mga tawo han syudad kay may-ada didto usa ka hugpo hin kasondalohan hi Apolonio, kundi ginsulong ini ni Jonatan,

⁷⁶ngan nagkahadlok hin duro an mga tawo didto han syudad, sanglit ira ginbuksan an mga ganghaan, ngan nakahimo hi Jonatan hin pagbihag han Jopa.

⁷⁷Han paghibaro ni Apolonio han nahinabo, nagdara hiya hin 3,000 nga dikabayo nga mga sondalo ngan hin usa nga dako nga hugpo hin baktas nga kasondalohan, ngan pinmasangil hira hin pag-isol tipakadto ha salatan nga dapit han Asdod. Kundi ha pagtapod han kusog han iya dikabayo nga mga sondalo, kinmadto hira ha kapatagan upod an kadak-an nga iya kasondalohan.

⁷⁸Iya iginbutang in 1,000 nga dikabayo nga mga sondalo didto hin usa nga dapit nga makakasulong hira han kasondalohan ni Jonatan tikang ha luyo. Nagpadayon hi Jonatan han iya paglanat tubtob ha Asdod, diin nagkatapo ha pag-awayan an duha ka hugpo hin kasondalohan.

⁷⁹

⁸⁰Dinhe na hi Jonatan makasabot nga nadakop hiya hin usa nga paggama. Nalibotan an iya kasondalohan ngan ginpauranan hira hin mga pana han kaaway tikang ha aga tubtob han pagkagab-i.

⁸¹Kundi inmato hin maupay an mga tawo ni Jonatan sumala han iya sugo, ngan ginkapoy an nagsulong nga dikabayo nga mga sondalo.

⁸²Niyan han kapoy na hin duro an dikabayo nga mga sondalo inmabot hi Simon upod an iya kasondalohan ngan ginsulong ngan hinrag-an an kaaway nga dikabayo nga mga sondalo nga nagpatlag ngan nanngalagiw.

⁸³An dikabayo nga mga sondalo nga nagsarang ha bug-os nga pag-awayan nanmalagiw ngadto ha Asdod ngan inmayop hira didto han templo ni Dagon nga ira diyos.

⁸⁴Kundi ginsunog ni Jonatan an syudad ngan an templo ni Dagon ngan nagkasusunog adton ngatanan nga inmayop didto. Niyan iya ginsunog an higrani nga mga bungto ngan gintikasan ini nira.

⁸⁵Hito nga adlaw mga 8,000 ka tawo an pinamatay ha pag-awayan ngan nagkasusunog.

⁸⁶Binmaya hi Jonatan ngan nagkampo hira didto ha Ascalon, diin nagkagawas an mga tawo han syudad hin pagkarawat ha iya pinaagi hin dagko nga mga pagpasidungog.

⁸⁷Binmalik hira Jonatan ngan han iya mga tawo ngadto ha Jerusalem dara in damo hin duro nga mga tinikas.

⁸⁸Han pakabati ni Hadi Alejandro han ginbuhat ni Jonatan, iya tinagan hi Jonatan hin darudako pa gud nga mga pagpasidungog.

⁸⁹Iya ginpadad-an hiya hin usa nga bulawan nga rayandayan ha sugbong, nga ihinahatag la ini ngadto hadton mga ginpasidunggan han ngaran nga “Uropod han Hadi.” Iya liwat iginhatag ha iya an syudad han Ekron ngan an higrani nga katunaan.