Read Waray Samarenyo Meaning Based 1 Macabeo 16 Bible Online

1 Macabeo 16 - Waray Samarenyo Meaning Based bible

1 Macabeo 16

¹Binmaya han Gezer hi Juan nga anak ni Simon ngan kinmadto hiya han iya amay hin pagsumat han ginbuhat ni Cendebeo.

²Nagsiring hi Simon kanda Juan ug Judas, an duha nga gimamagurangi nga iya mga anak, “Ha bug-os namon nga kinabuhi nakig-away han mga araway han Israel hi ako, an akon kabugtoan, ngan an bug-os nga panimalay han akon amay, ngan nakadamo kami magmalamposon hin pagtalwas han Israel.

³Lagas na ako kundi salamat han Dyos, nga aada pa kamo ha kamakusog ha iyo kinabuhi. Kinahanglan nga lumiwan kamo ha akon ngan han akon bugto hin pakig-away para han aton nasod. Ngan umupod unta ha iyo an Dyos.”

⁴Niyan nagtukod hi Juan hin Israelita nga hugpo hin kasondalohan nga 20,000 nga hag-id ha pag-awayan nga mga sondalo ngan dikabayo nga kasondalohan ngan ginmawas hira kontra kan Cendebeo. Nagpalabay hira han gab-i didto ha Modin,

⁵ngan temprano pa han aga kinmadto hira ha kapatagan. Didto gintapo hira hin usa nga dako nga hugpo hin baktas ngan dikabayo nga kasondalohan, kundi nabubutnga an salog han duha nga magka-away hira Juan ngan han iya kasondalohan;

⁶han paghikit-i ni Juan nga nagkahadlok an iya mga sondalo hin pagtabok han salog, hiya an inmuna pagtabok. Hinkit-an hiya han iya mga tawo ngan sinmunod hira ha iya.

⁷Ginbahin ni Juan an iya kasondalohan ngan iginbutang an iya dikabayo nga mga sondalo ha butnga han baktas nga mga sondalo, kay damo an kaaway nga dikabayo nga kasondalohan.

⁸Nagtrompeta hira para hin pagsulong ngan napirde hira Cendebeo ngan han iya kasondalohan, ngan damo ha ira an pinamatay. Pinmalagiw an nanhisalin ngan binmalik ngadto han ira kota didto ha Kidron.

⁹Nasamad hi Judas didto han pag-awayan, kundi nagpadayon hi Juan nga iya bugto hin paglanat han kaaway tubtob ha Kidron nga gin-otro hin pagtindog ni Cendebeo.

¹⁰Linmikay an nanngangalagiw nga mga sondalo ngadto han mga lantawan didto han kaumhan han Asdod, ngan ginsunog ni Juan an syudad. Dida hito nga adlaw, 2,000 nga kaaway nga mga sondalo an pinamatay, ngan binmalik nga waray maano hi Juan ngadto ha Judea.

¹¹Gintudlok ni Simon hi Tolomeo nga Labaw nga Padi nga anak ni Abudo nga kapitan para han kapatagan han Jerico. Riko na hin duro hi Tolomeo,

¹²kay umagad hiya ni Simon.

¹³Kundi hitaas an iya tinguha ngan naruyag hiya hin pagkapot han nasod. Sanglit nakahunahuna hiya hin pagpatay kanda Simon ngan han mga anak niya nga kalalaken-an.

¹⁴Hi Simon kaupod hira Matatias ug Judas nga iya mga anak dinmuaw han mga bungto ha ilawod, basi panimangnoon an ira mga ginkikinahanglan. Inmabot hira didto ha Jerico dida han ika-11 nga bulan han Sebat han tuig 177.[45]

¹⁵Ginkarawat hira ni Tolomeo nga nakakahunahuna pa hin pagpatay ha ira. Gindara hira ngadto hin usa nga gutiay nga kota nga gintawag nga Dor, nga gintindog ni Tolomeo. Iya gintagan hira hin usa nga dako nga panagtawo, kundi ginpatago ni Tolomeo in pira nga mga tawo ha sakob han kota.

¹⁶Han hubog na hira Simon ngan han iya mga anak, ginmawas han taragoan hira Tolomeo ngan han iya mga tawo ngan dara in mga espada nagdagmit hira ngadto han ruwang han panagtawo, diin ira pinamatay hira Simon ngan han iya mga anak, ngan pira dida han mga surugoon.

¹⁷Tungod hini nga makangingirhat nga buhat hin paglingo, ginbalos ni Tolomeo hin maraot an maupay.

¹⁸Niyan ginsurat ni Tolomeo an iya ginbuhat ngan ginpadara ini ngadto han hadi. Dida han surat iya ginhangyo nga padad-an niya hin kasondalohan nga mabulig ha iya ngan itubyan ha iya an nasod ngan an mga syudad.

¹⁹Nagsurat hiya ngadto han mga opisyal han kasondalohan hin pagdapit ha ira basi tumampo hira ha iya ngan hin pagsaad ha ira hin salapi, bulawan, ngan mga regalo. Niyan nagsugo hiya hin mga tawo ngadto ha Gezer hin pagpatay kan Juan,

²⁰ngan an iba hin pag-agaw han Jerusalem ngan han pungtod han Templo.

²¹Kundi may-ada tawo nga nagdalagan ngadto ha Gezer ngan nauna ini han mga tawo ni Tolomeo. Nagsumat hiya kan Juan nga ginpatay na an iya amay ngan an iya kabugtoan, ngan nagsugo hi Tolomeo hin iya mga sondalo hin pagpatay ha iya.

²²Nahadlok hin duro hi Juan hini nga sumat, kundi tungod nga nasumatan hiya hin temprano, nabihag ngan ginpatay niya an mga tawo nga ginpadara ni Tolomeo hin pagpatay ha iya.

²³Yana, an iba pa nga ginbuhat ni Juan tikang hiya sumaliwan han iya amay: an iya mga pakig-away, an iya maisog nga mga binuhatan, an iya pagtindog na liwat han mga pader, ngan han iba pa nga iya nahimo,

²⁴nahisurat ini ngatanan dida han sinurat nga kasaysayan mahitungod han iya pagdumara han nasod ha iya pagka Labaw nga Padi.