Read Waray Samarenyo Meaning Based 1 Macabeo 3 Bible Online

1 Macabeo 3 - Waray Samarenyo Meaning Based bible

1 Macabeo 3

¹Sinmaliwan hi Judas Macabeo kan Matatias nga iya amay.

²Ginbuligan hiya han ngatanan niya nga kabugtoan ngan han ngatanan nga maunongon nga mga sumusunod han iya amay, ngan nalipay hira hin pagpadayon han away han Israel.

³Nakahatag hi Judas hin darudako nga pagdarag-an han iya mga tawo. Sugad hiya hin usa nga higante kon sul-ot niya an iya hinganiban. Dara an iya mga hinganiban ha pag-awayan ngan kinmadto hiya hin pakig-away; iya pinanalipdan an iya kampo pinaagi han kalugaringon niya nga espada.

⁴Sugad hiya hin mapintas nga liyon nga nagngungurob ha iya pagsulong.

⁵Ginpangita ni Judas adton mga sinmupak han Balaod ngan ginsunog niya an ngatanan nga nagraogdaog han iya mga tawo.

⁶Ha kahadlok ha iya nangalagiw nga nagtalaw an magsinupakon nga mga tawo, ngan diri maaram kon ngain hira kakadto. Ngan nahiagom hira han katalwasan pinaagi han iya ginbuhat.

⁷Ginpakurian niya an kinabuhi hin damo nga kahadian, kundi ginlipay niya an mga tawo han Israel. Amon hiya pagdadayawon ha kadayonan tungod han iya ginbuhat.

⁸Ginsudoy niya an mga bungto han Judea ngan pinamatay an ngatanan nga diri natoo han Dyos nga mga tawo. Gintalwas niya an Israel ha makalilisang nga iya pag-antos.[8]

⁹Nahibantog hiya ngadto han mga sidsid han tuna samtang gintirok niya adton mga gintarhog hin kamatayon.

¹⁰Niyan nagtirok hi Apolonio hin usa nga hugpo hin Hentil nga kasondalohan, lakip in usa nga dako nga hugpo hin kasondalohan tikang Samaria, hin pagsulong han mga tawo han Israel.

¹¹Han paghibaro hini ni Judas, ginmawas hiya hin pakig-away, gindaog niya an kasondalohan, ngan ginpatay niya hi Apolonio. Damo nga mga Hentil an nagkamatay ngan nanngalagiw an mga nanhisalin nga buhi.

¹²Han pagtiroka na nira han mga tinikas ha pag-awayan, ginkuha ni Judas an espada ni Apolonio ngan ginggamit ini ha pag-awayan tubtob han kamatay niya.

¹³Nahibaro hi Seron nga heneral han kasondalohan han Siria nga hi Judas nagtirok hin kasondalohan nga may-ada usa ka hugpo hin mag-unongon nga mga tawo nga andam hin pakig-away ha ubos han iya pagmando.

¹⁴Nagsiring ha iya la ngahaw hi Seron, “Hihimoon ko nga mabantogan ako ha bug-os nga ginhadian pinaagi hin pagpirde kan Judas ngan han iya mga tawo nga waray pagtahod han sugo han Hadi.”

¹⁵Niyan nagtikang hiya hin bag-o nga pag-andam kontra kan Judas ngan gin-apihan hiya hin usa nga makusog nga hugpo hin diri natoo han Dyos nga mga tawo nga may-ada tinguha hin pagbulig ha iya hin pagbulos han Israel.

¹⁶Han pag-abot niya didto han masigpit nga agian, gintapo hiya ni Judas upod in gutiay la nga hugpo hin mga tawo.

¹⁷Han pakabati han mga tawo ni Judas nga an kasondalohan tiabot kontra ha ira, nagpakiana hira, “Uunanhon han aton gutiay nga hugpo hin kasondalohan hin pakiaway hin sugad kadamo nga mga sondalo? Labot pa, waray pa kita makakaon ha bug-os nga adlaw, ngan kinakapoy na kita!”

¹⁸Binmaton hi Judas, “Diri ini makuri para hin usa nga gutiay nga hugpo hin pagpirde hin usa nga dako nga hugpo. Para han Ginoo waray la ha iya; magutiay o madamo nga mga tawo nakakahimo hiya.

¹⁹An pagdarag-an ha pag-awayan diri nasarig han kadamo han kasondalohan; an gahom han Ginoo amo an nagbubuot kon hin-o an magdadaog.

²⁰Makanhi ha aton an aton mga magbangis nga kaaway, ngan magtatalinguha hira hin panikas han aton mga hiagi ngan pamatay han aton kaasaw-an ngan kabataan.

²¹Kundi nakikig-away kita tungod han aton mga kinabuhi ngan tungod han aton tuloohan.

²²Kon sumulong kita, pupuohon han Ginoo an aton mga kaaway, sanglit ayaw kamo kahadlok ha ira.”

²³Han kahuman la paghimangraw ni Judas, ginsulong niya ngan han iya mga tawo hin tigda hi Seron ngan an iya kasondalohan ngan ginpuo nira hira.

²⁴Ira ginlanat hira tubtob han masigpit nga agian ha Betoron ngadto han kapatagan ngan pinamatay nira in mga 800 ka tawo. Kinmalagiw ngadto ha Filistia adton mga nanhisalin nga buhi.

²⁵Katapos hini, nahadlok na kan Judas ngan han iya kabugtoan an mga Hentil ha ngatanan nga dapit.

²⁶Inmabot an iya bantog ngadto kan Hadi Antioco, ngan naghiruhimangraw an mga tawo ha ngatanan nga mga nasod hiunong kan Judas ngan han iya mga pagdarag-an.

²⁷Han pakabati ni Antioco han nahinabo, napungot hiya. Ginhimo niya an ngatanan nga mga kasondalohan han iya ginhadian nga mausa na la nga dako ngan makusog nga hugpo hin kasondalohan.

²⁸Tikang han iya hirimosan hin kwarta ginbayaran niya an iya mga kasondalohan hin kanan tag usa ka tuig nga sueldo ngan ginsugo hira hin pag-andam para hin bisan ano nga tigda nga kasamok.

²⁹Niyan, hinbaroan niya nga naubos na an kwarta didto han iya hirimosan. Inmiban an kadamo han kwarta tikang han mga buhis, tungod han kasamok ngan kakurian nga ira gindara ha kalibutan pinaagi han pagsalikwaya niya han mga balaod nga ginsunod tikang pa han giuunahi nga katuigan.

³⁰Hi Antioco dayuday nagpasagad la hin paghatag hin darudagko nga mga regalo kay han una nga kahadian, kundi yana nagupong hiya nga bangin diri hiya makagpadayon hini nga iya buhat, o bangin ngani diri makaabot han iya mga kagarastohan—nahinabo ini makausa o makaduha na hadto.

³¹Uraura an iya kaguol; kundi ha kataposan nakahunahuna hiya hin pagkadto ha Persia basi makapanukot hiya han mga buhis didto han mga lalawigan, ngan madara niya an damo nga kwarta.

³²Iya gintudlok hi Lisias, usa nga importante nga tawo nga gintagan han ngaran nga “Uropod han Hadi,” nga gobernador nga maninimangno han mga tirimangnoon han hadi ha bug-os nga katunaan tikang han Salog Eufrates tubtob han pag-ultan han Ehipto.

³³Ginhimo liwat han hadi hi Lisias nga magmarangno han iya anak nga hi Antioco Quinto tubtob han iya pagbalik.

³⁴Iginbutang niya hi Lisias nga tinaporan han ngatanan nga mga elepante ngan han katunga han iya kasondalohan, ngan iginhatag ha iya in tinag-usa nga mga tugon hiunong han karuyag ipapagtuman ha iya, ngan labi na, kon ano an sadang pagbuhaton hiunong han mga umurokoy ha Judea ug Jerusalem.

³⁵Ginsugo hi Lisias nga magpadara hin kasondalohan kontra han mga Judiyo, labi na an mga Judiyo didto ha Jerusalem, pag-utod han ira gahom ngan pagpuo ha ira, basi waray mahisalin bisan usa ha ira.

³⁶Ginsugo hiya hin pag-agaw han ira mga tuna ngan paghatag hini ngadto hin mga lumalangyaw nga mag-uokoy didto hito ngatanan nga mga dapit.

³⁷Gindara han hadi an katunga han iya kasondalohan ngan sinmulong hiya tikang ha Antioquia, an kapital nga syudad han tuig 147.[9] Tinmabok hiya han Salog Eufrates ngan naglatas han Mesopotamia.

³⁸Ginpili ni Lisias hira Nicanor, Gorgias, ug Tolomeo nga anak ni Dorimenes nga mga kapitan han kasondalohan; takos nga mga tawo ini hira nga tulo nga nagdara han ngaran nga “Sangkay han Hadi.”

³⁹Ginbutang hira nga tinaporan hin 40,000 nga baktas nga mga sondalo ngan 7,000 nga dikabayo nga mga sondalo, ngan ginsugo hira hin pagsulong han tuna han Judea ngan pagbungkag hini sumala han iginsugo han hadi.

⁴⁰Nagkagawas ini nga mga kapitan upod an bug-os nira nga kasondalohan, ngan han pag-abot nira didto han kapatagan nga hirani han Emmaus, nagkampo hira didto.

⁴¹Tinmampo ha ira in kasondalohan nga tikang ha Edumea[10] ug Filistia. Nagpakabati an mga paratigayon han katunaan hiunong han kusog han kasondalohan, ngan nagpasingadto hira ha kampo dara in mga kadena ngan damo nga kwarta, upod an paglaom nga mapapalit nira an mga Judiyo nga oripon.

⁴²Hinkit-an ni Judas ngan han iya kabugtoan nga nagtitikakuri an ira kamutangan, tungod kay nagkampo in lumalangyaw nga mga kasondalohan ha sakob han kalugaringon nira nga mga pag-ultan. Nahibaro liwat hira nga nagsugo an hadi hin pagpuo han ngatanan nga mga tawo.

⁴³Sanglit nagtalinguha hira hin pagtindog liwat han ira nabungkag nga nasod ngan pakig-away para han ira nasod ngan han Templo.

⁴⁴Niyan nagtirok an bug-os nga bungto hin pag-andam para hin pakig-away ngan pag-ampo han kalooy han Dyos.

⁴⁵An Jerusalem mahawan sugad hin usa nga kamingawan, waray mga tuminungnong nga nagawas o nasulod han syudad. Ginhugawan hin mga lumalangyaw an baraan nga Templo, ngan nagkampo in mga Hentil didto han kota ha syudad; sanglit nawaray kalipayan an mga tawo han Israel, ngan waray na tokar han plauta ug arpa.

⁴⁶Niyan nagtirok hira Judas ngan han iya mga tawo ngan nasingadto hira ha Mispa nga tugbang han Jerusalem, kay hadto anay may-ada usa nga dapit para hin pagsingba didto an mga tawo han Israel.

⁴⁷Tugob hin kasubo, nagpuasa hira ha bug-os hito nga adlaw, nagbado hin sako, nagbutang hin mga agbon ha ira mga ulo, ngan nagsul-ot hira hin mga gisi nga panapton.

⁴⁸Bahin hini nga higayon, an mga Hentil maaro unta hin sagdon han ira mga diyosdiyos, kundi an mga Israelita nagbuklad han basahan han Balaod hin pagpangita kon ano an kaburot-on han Dyos ha ira.

⁴⁹Gindara nira an higlawig nga mga panapton han kapadian, an syahan nga abot nga mga halad, ngan an mga ikanapulo nga bahin, niyan ginpasakob nira in pipira nga mga Nazareo nga nakatuman na han ira mga ginsumpa.

⁵⁰Nag-ampo an bug-os nga bungto, “O Ginoo, ano an amon pagbubuhaton hini nga mga butang? Ngain ini namon pagdadad-a,

⁵¹yana nga gintamaktamakan ngan ginhugawan na han mga Hentil an imo baraan nga Templo, ngan masulob-on ha kaawod an imo kapadian?

⁵²Kinmanhi an mga Hentil hin pagsulong ngan pagpuo ha amon. Maaram ka kon ano an ira nahuhunahunaan ha amon!

⁵³Kon diri mo kami buligan, uunanhon hin pakaato naman ha ira?”

⁵⁴Niyan nagtrompeta hira ngan nanggogliat hin makusog.

⁵⁵Katapos hito ginbahinbahin ni Judas an iya mga tawo ngadto hin mga hugpo nga tinag-10, tinag-50, tinag-100, ngan tinag-1,000, nga ginbutangan hin mga opisyal nga tinaporan an kada hugpo.

⁵⁶Niyan, ha pagsugot han Balaod, ginpauli niya an kada tawo nga bag-o pala nga nakaasawa, bag-o pala nga nagbalay, o bag-o pala nga nagtanom hin mga ubas, sugad man an bisan hin-o nga hadlokon.

⁵⁷Ha kataposan, ginmawas an kasondalohan ngan nagkampo hira didto ha salatan nga dapit han Emmaus,

⁵⁸diin nagsiring ha ira hi Judas, “Pag-andam kamo para ha pag-awayan ngan ipakita an iyo kaisog! Maandam na kamo ha temprano pa buwas han aga hin pakig-away hini nga mga Hentil nga nagtirok han ira mga kasondalohan hin pagsulong ha aton ngan pagbungkag ha aton ngan pagbungkag han aton Templo.

⁵⁹Mauruupay para ha aton nga magkamatay kita nga nakikig-away kay hin pagtinukdaw la ngan pagkinita han pagkabungkag han aton nasod ngan han aton Templo.

⁶⁰Kundi pagtutumanon han Ginoo an iya kaburot-on para ha aton.”