Read Waray Samarenyo Meaning Based 1 Macabeo 4 Bible Online

1 Macabeo 4 - Waray Samarenyo Meaning Based bible

1 Macabeo 4

¹Gindara ni Gorgias in 5,000 nga baktas nga mga sondalo ngan 1,000 han iya gibabatiri nga dikabayo nga mga sondalo ngan binmaya hira han kampo ha gab-i,

²upod in mga tawo nga tikang han kota didto ha Jerusalem nga iya mga magturutdo han ira aagian. Nakahunahuna hiya hin tigda nga pagsulong han mga kasondalohan nga Judiyo,

³kundi hinbaroan ni Judas ini, ngan ginmawas hi Judas ngan an iya mga tawo hin pagsulong han kasondalohan han hadi didto ha Emmaus

⁴samtang hirayo pa tikang han kampo hi Gorgias ngan an iya mga sondalo.

⁵Han pag-abot ni Gorgias ngan han iya kasondalohan didto han kampo ni Judas hito nga gab-i, waray nira hin-agian nga tawo didto. Naghunahuna hira nga naikaralagiw hi Judas ngan an iya mga tawo, sanglit nagtikang hira hin pagbiling ha ira didto ha kabukiran.

⁶Han maagahon pa didto na han patag hi Judas upod in 3,000 nga mga tawo, nga diri ngatanan hira sangkap hin mga hinganiban ha pag-awayan sugad han angay.

⁷Ira hinkit-an in damo hin duro nga kasondalohan nga Hentil hin batid nga mga sondalo nga nakakasul-ot hin hinganiban ha pag-awayan ngan pinanalipdan hin dikabayo nga mga sondalo.

⁸Kundi nagsiring hi Judas ha iya mga tawo, “Ayaw kamo kabaraka han kadamo han ira kasondalohan, ngan ayaw kamo kahadlok kon sumulong hira.

⁹Hinumdomi kon gin-unan-o hin pagtalwas han aton kaapoy-apoyan didto han Dagat Pula han ginlalanat hira han hadi han Ehipto upod an iya kasondalohan!

¹⁰Yana pangamuyo kita han Ginoo nga kalooyan kita. Pag-ampo kita nga pagpasidunggan niya an iya ginsaaran han aton kaapoy-apoyan ngan puohon niya ini nga kasondalohan kon sumulong kita yana nga adlaw.

¹¹Niyan mahibabaro an ngatanan nga mga Hentil nga may-ada an Israel usa nga Dyos nga nagbabawi ngan nagtatalwas ha ira.”

¹²Han pakakita han mga Hentil kan Judas ngan han iya mga tawo nga nag-aandam para ha pag-awayan,

¹³ginmawas hira han ira kampo hin pakig-away. Niyan hi Judas ngan an iya mga tawo

¹⁴nagtrompeta ngan sinmulong hira. Nagsarang an mga Hentil ngan nanmalagiw ngadto han patag,

¹⁵kundi pinamatay an ngatanan nga mga nanhimulag. Ginlanat han mga Israelita an kaaway tubtob gud ha Gezer, ha kapatagan han Edumea, ngan han mga bungto han Asdod ug Jamnia. Pinamatay nira in mga 3,000 ngatanan han ira mga kaaway.

¹⁶Han pagbalik ni Judas ngan han iya kasondalohan tikang han panlanat,

¹⁷ginsiring niya an iya mga tawo, “Ayaw kamo kaikag hin panikas han mga butang. Aanhi pa ha hirani nga kabukiran hira Gorgias ngan han iya kasondalohan, sanglit dako pa nga araway an aton aatubangon. Kinahanglan umasdang kita hin marig-on ngan makig-away. Katapos, makakahimo na kamo hin pagkuha han ngatanan nga iyo karuyag tikason nga mga butang.”

¹⁸

¹⁹Kahuman la paghimangraw ni Judas, tinmangbo tikang han kabukiran in usa nga patrolya han ira kaaway,

²⁰ngan hinkit-an hini nira nga nanmalagiw na an ira kasondalohan; nahibaro hira tikang han aso nga nasusunog an ira kampo.

²¹Han paghikit-i nira hini ngatanan, nagkahahadlok hira hin duro, ngan han paghikit-i liwat nira nga nakadto han patag an kasondalohan ni Judas nga andam na para ha pag-awayan,

²²nanmalagiw hira ngatanan ngadto ha Filistia.

²³Niyan binmalik hira Judas hin panikas han kampo han ira mga kaaway; kinuha nira in damo nga bulawan ug salapi, asol ngan pula nga mga hinero, ngan iba pa nga marahalon nga mga butang.

²⁴Han pagbalik han mga Judiyo ngadto han kalugaringon nira nga kampo, nagkanta hira hin usa nga imno: “Angay pagdayawon an Ginoo; an iya kalooy ha kadayonan.”

²⁵Nakahatag ito nga adlaw hin usa nga dako nga pagdarag-an han mga tawo han Israel.

²⁶Kinmadto kan Lisias an nagpakakalagiw nga Hentil nga mga kasondalohan ngan iginsumat an ngatanan nga nahinabo.

²⁷Han pakabati ni Lisias nga nadaog ha pag-awayan an iya mga kasondalohan, nahipausa ngan nakaawod hiya nga waray madaog an Israel sumala han iginsugo han hadi.

²⁸Han pagkasunod nga tuig nagtirok hi Lisias hin kasondalohan nga 60,000 nga tinutdoan hin maupay nga baktas la nga mga sondalo ngan 5,000 nga dikabayo nga mga sondalo, nga an tuyo amo an pagpirde han mga Judiyo.

²⁹Napakadto hira ha Edumea ngan nagkampo didto ha Betsur. Inmabot hi Judas hin pag-asdang ha ira upod in 10,000 ka tawo.

³⁰Han pakakita ni Judas han kakusog han kasondalohan han kaaway, nag-ampo hiya, “Pagdadayawon ka namon, O Magtaralwas han Israel. Gindaog mo an pagsulong han higante pinaagi han kamot ni David nga imo surugoon ngan tinugotan mo hira Jonatan nga anak ni Saul ngan han batan-on nga nagdara han iya mga hinganiban hin pagpirde han bug-os nga kasondalohan han Filistia.

³¹“Yana, ha amo ngahaw nga paagi tugoti man an imo mga tawo nga Israel hin pagpirde han amon kaaway. Pagpakaalohi hira, bisan ha ngatanan nira nga pagtapod han ira baktas ngan dikabayo nga mga sondalo.

³²Himoa nga mahadlok hira; paluyaha an ira maisog nga kusog; pakuroga hira ha pagpaabot nira hin kapirdehan.

³³Hinihigugma ngan ginsisingba ka namon; sanglit tugoti kami hin pamatay han amon mga kaaway, basi magkanta kami hin mga pagdayaw ha imo.”

³⁴Nagtikang an away, ngan dida han tinag-usa nga asdangay, mga 5,000 han mga tawo ni Lisias an namatay.

³⁵Han paghikit-i ni Lisias nga nadaog na an iya kasondalohan ngan han paghikit-i niya han mapintas nga kaisog nira Judas ngan han iya mga tawo, nga nagpakita nga andam hira hin dungganan nga pagkabuhi kon pagkamatay, binmalik hiya ngadto ha Antioquia. Didto kinmarawat pa hiya hin sinuholan nga mga sondalo ngan nakahunahuna hiya hin pagbalik ngadto ha Judea dara in darudamo pa nga kasondalohan.

³⁶Nagsiring hira Judas ngan han iya kabugtoan, “Yana nga napirde an aton mga kaaway, pasingadto kita ha Jerusalem hin paglinis han Templo ngan hin pagbag-o han paghalad hini nga Templo.”

³⁷Sanglit nagtirok an bug-os nga kasondalohan ngan sinmagka hira han Bukid Sion.

³⁸Didto hinkit-an nira nga ginpabay-an la an Templo, mahugaw na an altar, sunog na an mga ganghaan, kabanwaan na an mga bungsaran, ngan ruba na an mga kwarto han kapadian.

³⁹Ha ira kabido, ira ginggisi an ira mga panapton, nagtangis hira ha dako nga tingog, nagbutang hin mga agbon ha ira mga ulo,

⁴⁰ngan nanngulob ha tuna. Han pagtunog han mga trompeta, nagsangpit an ngatanan ha dako nga tingog ngadto ha Ginoo.

⁴¹Niyan nagsugo hi Judas hin pira han iya mga tawo hin pagsulong han mga tawo didto han kota, samtang ginlilinisan niya an Templo.

⁴²Nagpili hiya hin pira nga kapadian nga may-ada katakos ngan matinumanon han Balaod.

⁴³Ira ginlinisan an Templo ngan ginkuha nira an ginpasipad-an nga mga bato ngan iginbutang ini didto hin usa nga dapit nga diri malinis.

⁴⁴Naghiruhimangraw hira kon ano an angay pagbuhaton han altar hin mga halad nga tinubod, nga nahugawan na

⁴⁵han mga Hentil, ngan nakahunahuna hira hin pagruba hini, basi diri ini tumindog didto nga usa nga hinumdoman han ira kaarawdan. Sanglit ginruba nira an altar

⁴⁶ngan iginbutang nira an mga bato hini didto hin usa nga angay nga dapit ha pungtod han Templo, diin ginhimos ini tubtob nga may-ada pumakita nga usa nga manaragna ngan maglarang kon ano an maupay pagbuhaton hini.

⁴⁷Niyan kinmuha hira hin diri tinabas nga mga bato, sumala han ginkinahanglan han Balaod ni Moises, ngan nagtindog hira hin usa nga bag-o nga altar nga sugad han daan.

⁴⁸Gin-ayad nira an Templo, ha sakob ngan ha gawas, ngan ginbag-o hin paghalad an mga bungsaran hini.

⁴⁹Naghimo hira hin bag-o nga mga garamiton para hin pagsingba ngan iginsulod ha Templo an burutangan han mga suga an altar hin insyenso, ngan an lamesa para han tinapay.

⁵⁰Nagtubod hira hin insyenso dida han altar ngan gindagkotan an mga suga dida han burutangan, ngan nagkamay-ada kapawa didto han Templo!

⁵¹Iginbutang nira dida han lamesa an mga tinapay, igintaod an mga biray, ngan nahuman an ngatanan nga buruhaton.

⁵²An ika-25 nga adlaw han ikasiyam nga bulan han Kisleb han tuig 148[11] amo an pagtagmo nga gindudumdom nira kay amo ani an adlaw nga ginpasipad-an han mga Hentil an altar. Dida hito nga adlaw iginhalad in usa nga halad nga tutuboron dida han bag-o nga altar ngan ginkanta in mga imno nga dinuyogan hin mga arpa, mga plauta, ngan mga gimbal.

⁵³

⁵⁴

⁵⁵Nanyukbo ha tuna an ngatanan nga mga tawo ngan nagsingba ngan nagdayaw han Ginoo tungod han pagdarag-an nira.

⁵⁶Nagsaurog hira han bag-o nga paghalad han altar sulod hin walo ka adlaw. Upod in dako nga pagrayhak nagdara hira hin mga halad nga tutuboron ngan naghalad hin mga halad hin pagkaurosa ngan mga halad hin pagpasalamat.

⁵⁷Gin-adornohan nira an atubangan han Templo hin bulawan nga mga korona ngan mga taming, gin-ayad an mga ganghaan ngan an mga kwarto han kapadian ngan ira ginbutangan hin mga sada.

⁵⁸Yana nga ginkuha na han mga Judiyo an kaarawdan nga gindara han mga Hentil, naghimo hira hin usa nga dako nga pagsaurog.

⁵⁹Hira Judas, an iya kabugtoan, ngan han bug-os nga bungto nagsugo nga an pagbag-o han paghalad han altar kinahanglan pagsaurogon upod in usa nga pyesta hin pagrayhak ngan pagkalipay ha kada tuig, nga magtitikang dida han ika-25 nga adlaw han ikasiyam nga bulan han Kisleb ngan magpapadayon sulod hin walo ka adlaw.

⁶⁰Niyan nagtindog hira hin higtaas nga mga pader ngan marig-on nga mga lantawan palibot han Bukid Sion, basi diri makasulod an mga Hentil hin pagpanamastamas ngan paghugaw na liwat ini.

⁶¹Ginbutangan ni Judas hin mga sondalo nga magbarantay han Templo. Iya liwat ginparig-on an bungto han Betsur, basi magkamay-ada usa nga balwarte nga naatubang ha Edumea an mga tawo han Israel.