Read Waray Samarenyo Meaning Based 1 Macabeo 5 Bible Online

1 Macabeo 5 - Waray Samarenyo Meaning Based bible

1 Macabeo 5

¹Han pakabati han higrani nga mga nasod nga gintindog han mga Judiyo an altar ngan ginpahiuli na an Templo sugad han hadto anay, napungot hira hin duro,

²nga naglarang hira hin pamatay han mga Judiyo nga nag-uokoy dida ha ira. Sanglit nagtikang hira pamatay han aton mga tawo.

³Gin-ulang han mga Edumeanhon an mga Israelita, sanglit nakig-away hi Judas kontra ha ira didto ha Akrabatane, ginpuo ngan pinanikasan hira.

⁴Gindaog liwat niya an mga tawo ni Baean nga dayuday nahahadlokan han mga tawo han Israel, kay ira ginagamaan an mga Israelita nga nagbabaktas.

⁵Iya ginpriso an mga taga-Baean didto han ira mga kota, nagsumpa nga iya pagpupuohon hira, ngan ginsunog an mga kota upod an ngatanan didto ha sakob.

⁶Niyan ginsulong niya an tuna han Ammon diin iginkakita hiya hin damo ngan magkusog nga kasondalohan ha ubos han pagmando hin usa ka tawo nga ginngangaranan nga Timoteo.

⁷Nagdaog hi Judas hin damo nga mga araway kontra ha ira, ngan ha kataposan iya ginpirde hira.

⁸Iya ginbihag an Jaser ngan an nagpapalibot nga kabaryohan hini ngan kahuman binmalik hiya ngadto ha Judea.

⁹Nagtirok an mga Hentil didto ha Galaad hin pagsulong ngan pagpuo han mga Israelita nga nag-ukoy didto han ira katunaan. Kundi nanmalagiw an mga Israelita ngadto han kota han Datema

¹⁰ngan nagpadara hinin masunod nga surat ngadto kanda Judas ngan han iya kabugtoan: “An kasondalohan nga mga Hentil nga naglilibot ha amon nagkaurosa ha ubos han pagdumara ni Timoteo hin pagsulong ha amon. Pinmalagiw kami nganhi hini nga kota para hin pagpanalipod, ngan yana nag-andam hira hin pagbihag hini ngan pagpuo ha amon.

¹¹

¹²Damo na ha amon an pinamatay. Pakadi ngan buligi kami!

¹³Pinamatay na an ngatanan nga Judiyo nga kalalaken-an didto han katunaan han Tob;[12] ginbihag an ira kaasaw-an ngan an ira kabataan, ngan gindara an ira mga hiagi. Mga 1,000 nga mga tawo an pinamatay didto.”

¹⁴Han ginbabasa pa ini nga surat, nagkaabot in lain nga mga sinugo nga naggisi han ira mga panapton tungod hin kabido nga dara in usa nga sumat tikang ha Galilea.

¹⁵Nagsiring hira, “Nag-urosa hin pagpuo ha amon in kasondalohan nga taga-Tolemaida, Tiro, Sidon, ug Galilea.”

¹⁶Han pakabati hini ni Judas ngan han mga tawo, nagtirok hira basi pagsarabotan nira kon ano an angay pagbuhaton hin pagbulig hini nga mga tawo han nasod, nga aada hin sugad nga kakurian, nga ginsusulong han ira kaaway.

¹⁷Nagsiring hi Judas kan Simon nga iya bugto, “Pagpili hin mga tawo ngan pakadto hin pagtalwas han aton igkasi mga Judiyo didto ha Galilea; ako ngan hi Jonatan nga aton bugto an mapakadto ha Galaad.”

¹⁸Ginbilin ni Judas an salin han iya kasondalohan hin pagbantay han Judea, ngan iya iginbutang nga tinaporan han mga tawo an duha nga mga pangulo nga amo hira Azarias ug Jose nga anak ni Zacarias.

¹⁹Iya ginsiring hira: “Iginbibilin ko kamo nga mga kapitan dinhe, kundi ayaw kamo paggawas ngan pakig-away han mga Hentil tubtob han amon pagbalik.”

²⁰Niyan 3,000 nga mga tawo an inmupod kan Simon ngadto ha Galilea, ngan 8,000 an nagpabilin kan Judas para ha Galaad.

²¹Kinmadto hi Simon ha Galilea ngan nakadamo hiya pakig-away kontra han mga Hentil. Iya ginpirde hira

²²ngan ginlanat hira tubtob ngadto han syudad han Tolemaida, ngan pinamatay in mga 3,000 ha ira ngan pinanikasan hira.

²³Niyan iya ginkuha an mga Judiyo nga nakadto ha Galilea ug Arbata, pati an ira kaasaw-an, ira kabataan, ngan an ngatanan nga ira mga hiagi, ngan iginbalik hira upod ha iya ngadto ha Judea. Nagkamay-ada hira dako nga pagrayhak.

²⁴Hini nga panahon tinmabok na han Salog Jordan hira Judas Macabeo ug Jonatan nga iya bugto ngan naglatas na han kamingawan sulod hin tulo ka adlaw.

²⁵Iginkatapo hira hin makisasangkayon nga mga Nabateohanon nga nagsumat ha ira han ngatanan nga nahinabo han mga Judiyo didto ha Galaad.

²⁶Nagsumat hira nga nagkapripriso in damo nga mga Judiyo didto han pinaderan nga mga syudad han Bosra, Bosor, Alema, Casfo, Maked, ug Carnaim,

²⁷samtang napriso an iba didto han gurugudti nga mga bungto han Galaad. Nagsumat liwat hira nga an kaaway masulong han pagkabuwas han mga kota han mga Judiyo, ngan dako an ira paglaom nga mapupuo an ngatanan nga mga Judiyo sulod hin usa la ka adlaw.

²⁸Sanglit ginsulong dayon ni Judas ngan han iya kasondalohan an Bosra ha ligid han dalan ha kamingawan, ginbihag an bungto, ngan pinamatay an ngatanan nga mga tawo didto. Ginpanikasan nira an bungto ngan ira liwat ginsunog.

²⁹Binmaya hira didto ngan nagbaktas ha bug-os nga gab-i ngadto han kota ha Datema.

³⁰Han maagahon pa hinkit-an ni Judas ngan han iya mga tawo in damo nga kasondalohan nga nasulong han kota; nagdara hira hin mga hagdan, mga tungtongan ngan mga igburundol basi makuha ini nira.

³¹Han pakabati ni Judas han aringasa, goliat, ngan tunog hin mga trompeta tikang han syudad, nakasabot hiya nga nagtikang na an araway,

³²sanglit ginsiring niya an iya mga tawo, “Pakig-araway kita yana para han aton igkasi mga Judiyo!”

³³Iya ginsugo an iya mga tawo nga maglakat hira ha tulo ka rumbay ngan sulongon an kaaway tikang ha luyo. Han pagsulong nira, nagtrompeta hira ngan naggogliat hin mga pag-ampo.

³⁴Han pakakita han kasondalohan nga minandoan ni Timoteo nga hi Judas Macabeo ini, inmisol ngan nanmalagiw an mga sondalo. Gindaog hira ni Judas ngan pinanmatay in mga 8,000 ka tawo hito nga adlaw.

³⁵Niyan inatubang ni Judas hin pagsulong an bungto han Alema;[13] iya ginbihag ini ngan pinamatay an ngatanan nga mga tawo didto. Iya pinanikasan an bungto ngan iya ginsunog.

³⁶Tikang didto nagpadayon hiya ngan ginbihag an Casfo, Maked, Bosor, ngan an iba nga mga bungto han Galaad.

³⁷Katapos hini, nagtirok hi Timoteo hin lain nga kasondalohan ngan nagkampo hira tugbang han Rafon, didto ha tabok hin usa nga salog.

³⁸Nagsugo hi Judas hin pira ka tawo hin pag-inaw han kampo, ngan binmalik hira hin pagsumat kan Judas nga tinmampo kan Timoteo an ngatanan nga mga Hentil didto hito nga dapit ngan nakagtukod hira hin usa nga hugpo hin damo nga kasondalohan.

³⁹May-ada liwat hi Timoteo mga sinuholan nga mga Arabe hin pagbulig ha iya, ngan nagkampo ini didto ha tabok han salog ngan andam hin pagsulong kan Judas. Sanglit ginmawas hi Judas hin pag-asdang ha ira ha pag-awayan.

⁴⁰Han tikahirani na han tubig hira Judas ngan han iya kasondalohan, nagsiring hi Timoteo han iya mga opisyal, “Kon magpadayon hiya hin pagtipakanhi ngan tumabok han salog, diri kita makakapugong han iya pagsulong ngan pipirdehon kita.

⁴¹Kundi kon mahadlok hiya ngan umukoy didto ha tabok han salog, matabok kita hin pagsulong ngan madadaog ta hiya.”

⁴²Han pag-abot ni Judas han pangpang han salog, ginsugo niya an iya mga opisyal nga diri tugotan an bisan hin-o hin pag-ukoy kundi nga magpadayon gud an ngatanan ngadto han pag-awayan.

⁴³Hi Judas amo an una nga tinmabok han salog ngadto han kaaway, ngan sinmunod an ngatanan niya nga mga tawo. Nagdadlagan an mga Hentil ha ira atubangan, ipinanlabog an ira mga hinganiban, ngan nanmalagiw ngadto han pagano nga templo didto ha Carnaim.

⁴⁴Kundi nakuha nira Judas ngan han iya mga tawo an syudad ngan ginsunog an templo upod an ngatanan nga nakadto ha sakob. Yana nga nabihag na an Carnaim, waray na makahimo hin pag-ato kan Judas an mga Hentil.

⁴⁵Niyan gintirok ni Judas an ngatanan nga mga Judiyo didto ha Galaad. Inmupod hira ha iya hin pagbalik ngadto ha Judea. Usa ini nga dako nga hugpo hin magkalainlain nga mga tawo, upod an ira kaasaw-an ngan kabataan ngan ngatanan nga ira mga hiagi.

⁴⁶Inmabot hira ha Efron nga usa nga dako ngan pinaderan hin maupay nga bungto. Makuri ka hini makalibot bisan diin nga dapit umagi, ngan an dalan natalabok gud han bungto.

⁴⁷Kundi waray hira paagia han mga tawo didto, ngan gin-ulang hin mga bato an mga ganghaan han bungto.

⁴⁸Niyan ginpadad-an hira ni Judas hin usa nga panginyupo nga mensahe ha paghangyo ha ira: “Paagia kami han iyo katunaan ha amon pag-uli. Waray may maglalabot ha iyo; maagi la kami.” Kundi dinmiri hira gihapon hin pagbukas han ira mga ganghaan.

⁴⁹Sanglit ginsiring ni Judas an ngatanan nga magkampo hira dida han ira hinmumutangan labot han paraaway nga mga tawo.

⁵⁰Ginsugo an paraaway nga mga tawo hin pag-andam para hin pagsulong han bungto. Nakig-away hira ha bug-os nga adlaw ngan bug-os nga gab-i tubtob han kakuha nira han bungto.

⁵¹Iginpapatay ni Judas an ngatanan nga mga tawo han Efron, pinanikasan an bungto, ngan nakuha nira an bungto. Niyan tinmalabok hira han bungto ngan naglakat hiya ngan an iya kasondalohan ha bawbaw han mga patay nga lawas.

⁵²Gintabok nira an Jordan ngan napakadto hira han hiluag nga kapatagan nga tugbang han Betsan.

⁵³Ha bug-os nira nga paglakaton gintirok ni Judas an mga nanhisalaag nga Judiyo ngan gindasig niya an mga tawo tubtob han pag-abot nira han tuna han Judea.

⁵⁴Upod hin mga pagpasalamat ngan pagrayhak, sinmagka hira han Bukid Sion ngan naghalad hin mga halad nga tinubod kay nakabalik hira nga talwas nga waray kawad-i hin bisan usa ka tawo.

⁵⁵Han nakadto pa ha Galaad hira Judas ug Jonatan ngan han pagsulonga han Tolemaida didto ha Galilea ni Simon nga ira bugto,

⁵⁶hinbatian nira Jose ug Azarias nga mga kapitan han kasondalohan didto ha Juda mahitungod han ira mag-isog nga mga pakig-away ngan an ira mga pagdarag-an.

⁵⁷May hinsiring ha ira, “Pakig-away man kita han mga Hentil nga hirani ha aton ngan maaangkon naton an bantog ha pag-awayan.”

⁵⁸Sanglit ginsulong nira ngan han ira mga tawo an Jamnia.

⁵⁹Ginmawas han bungto hin paggubat ha ira ha pag-awayan hira Gorgias ngan han iya mga tawo.

⁶⁰Ira ginpirde hira Jose ug Azarias ngan ginlanat nira ini hira tubtob han mga pag-ultan han Judea. Mga 2,000 nga mga Israelita an pinanmatay hito nga adlaw.

⁶¹Nahinabo ini nga dako nga kapirdehan kay an mga kapitan nga mga Judiyo karuyag man nga magin mga bayani hira ngan dinmiri hira hin pagsugot kanda Judas ngan han kabugtoan niya.

⁶²Labot pa, diri hira sakop han panimalay han mga Macabeo nga ginpili han Dyos hin pagdara hin kagawasan han mga tawo han Israel.

⁶³Kundi gintahod hin maupay han ngatanan nga mga Israelita ngan ngatanan nga mga Hentil hira Judas Macabeo ngan han iya kabugtoan. Han pakabati han mga tawo han ira kabantogan,

⁶⁴nagtirok in damo nga mga tawo hin pagdayaw ha ira.

⁶⁵Niyan nakig-away hira Judas ngan han iya kabugtoan kontra han mga Edomitanhon didto ha timogan. Iya ginsulong an Hebron ngan an mga bungto nga hirani ha ira, ginbungkag an pinaderan nga mga kota, ngan ginsunog an mga lantawan palibot han bungto.

⁶⁶Niyan ginkadto niya an tuna han mga Filisteohanon ngan nag-agi ha butnga han Marisa.[14]

⁶⁷Hito nga adlaw damo nga kapadian an pinamatay ha pag-awayan kay naruyag hira nga magin mga bayani ngan sugad hin mga lurong ginmawas hira hin pakig-away.

⁶⁸Linmiko hi Judas ngadto ha Asdod didto ha Filistia. Ginpanumba niya an mga altar didto, ginsunog an mga ladawan han ira kadiyosan, ginpanikasan an ira mga bungto, ngan katapos inmoli hira ngadto ha Judea.