Read Waray Samarenyo Meaning Based 1 Macabeo 6 Bible Online

1 Macabeo 6 - Waray Samarenyo Meaning Based bible

1 Macabeo 6

¹Han naglalatas hi Hadi Antioco Kwatro han Mesopotamia, nakabati hiya hin usa nga syudad didto ha Persia nga ginngaranan nga Elimais, nga bantogan tungod hin mga manggad nga salapi ug bulawan.

²Damo kaupay an mga manggad han templo, nga may-ada bulawan nga mga taming, hinganiban, ngan mga garamiton hin pakig-away nga ginbilin didto ni Alejandro nga anak ni Hadi Felipe han Macedonia, nga amo an syahan nga naghadi han Griego nga ginhadian.

³Inmabot hi Antioco ngan nagtalinguha hin pagkuha han syudad ngan pagtikas han mga butang, kundi waray hiya makahimo, kay hinbaroan han mga tuminungnong an iya nahunahunaan hin pagbuhat,

⁴ngan ira gin-andam an ira mga kasondalohan hin pag-ato ha iya. Ha dako nga kapakyasan inmisol hiya ngan binmalik ngadto ha Babilonia.

⁵Didto ha Persia inmabot ha iya in usa nga sinugo dara an sumat nga napirde an iya mga kasondalohan nga iya ginpadara ngadto ha Judea.

⁶Hi Lisias ngan an iya makusog nga kasondalohan napirit hin pagkalagiw tikang han mga Judiyo, nga nagmakusog na tungod han dugang nga mga hinganiban, mga garamiton ngan mga tinikas nga ira nakuha tikang han napirde nga mga kasondalohan.

⁷Gintumba han mga Judiyo an butang nga ira ginngaranan nga “Makaharadlok nga Taran-awon” nga gintindog ni Antioco ha bawbaw han altar didto ha Jerusalem. Ira liwat ginpalibotan an templo hin higtaas nga mga pader, sugad hadto anay, ngan ira ginkuha ngan ginparig-on an bungto han Betsur nga usa han kalugaringon nga mga bungto han hadi.

⁸Han pakabati han hadi hini nga mga sumat, waray hiya makayakan ngan nangurog tungod hin kahadlok, sanglit hinmigda hiya nga natigdaan hin mapait nga kabidoan kay waray mahimo an mga butang sumala han iya ginhihingyap.

⁹Nagpabilin hiya nga masakit sulod hin maiha nga panahon, samtang nga natugob hiya han kawaray na paglaom, tubtob nga ha kataposan nakasabot hiya nga mapatay na hiya.

¹⁰Iya gintirok adton ngatanan nga iya tinagan han ngaran nga “Kasangkayan han Hadi” ngan ginsiring hira, “Diri ako nahingangaturog, ngan samad an akon kasingkasing hin kabidoan ngan kaguol.

¹¹Ha syahan ginpakianhan ko an akon kalugaringon kay ano nga kon haros malumos ako hini nga mga kabidoan ug kagul-anan, nga maloloy-on man ako ngan ginhigugma man ako han panahon han akon pagkahadi.

¹²Kundi nahinumdoman ko an kasaypanan nga akon ginbuhat didto ha Jerusalem han pagkuhaa ko han ngatanan nga salapi ug bulawan nga mga butang didto han Templo ngan pagtalinguhaa ko hin pagpuoha han mga umurokoy han Judea hin waray gud bisan ano nga maupay nga hinungdan.

¹³Maaram na ako kay ano nga nahinabo ha akon ini ngatanan nga makalilisang nga mga butang, ngan mapatay na ako ha mapait nga pagturaw dinhe hini nga langyaw nga tuna.”

¹⁴Niyan iya gintawag hi Felipe nga usa han iya labi nga sinarigan nga mga magsaragdon, ngan gintudlok hiya nga tinaporan han bug-os niya nga ginhadian.

¹⁵Iginhatag ha iya an iya korona, hilawig nga panapton, ngan opisyal nga singsing, ngan gintagan hiya hin gahom hin pagpaaram han iya anak nga hi Antioco Quinto ngan pagmangno ha iya hin maupay basi mahimo nga hadi.

¹⁶Namatay didto hi Antioco hadton tuig 149.[15]

¹⁷Han paghibaro ni Lisias nga namatay na an hadi, iya ginhimo nga hadi an batan-on nga Antioco nga saliwan han iya amay. Iya ginmangnoan hi Antioco tikang han pagkabata ngan yana iginhatag ha iya an ngaran nga Eupator.

¹⁸Hito nga panahon, an mga kaaway didto han kota ha Jerusalem nag-ulang han mga tawo han Israel nga nakadto hirani han Templo, nga dayuday naghatag hin kasamokan ngan nagbulig han mga Hentil.

¹⁹Sanglit nakahunahuna hi Judas hin pamatay ha ira, ngan gintirok niya an ngatanan nga mga tawo hin pagsulong han kota.

²⁰Nagtirok an mga tawo ngan ira ginsulong an kota hadton tuig 150.[16] Nagtindog hira hin mga tungtongan para hin pagsulong ngan mga igburungkag.

²¹Kundi nakapalagiw in pira nga mga tawo nga ginsulong, ngan upod hin pira nga maglingo nga mga Judiyo, kinmadto hira han hadi ngan nagsiring,

²²“Tubtob pa san-o an imo paghulat san-o kamo bumulos tungod han ginbuhat nira han amon igkasi mga nasodnon?

²³Naruyag kami hin pag-alagad han imo amay, pagtuman han iya mga sugo, ngan pagsugot han iya mga pasangyaw.

²⁴Kundi ano nga kaupayan an ginbuhat hini ha amon? Yana nahimo na nga amon mga kaaway[17] an amon mga igkasi nasodnon. Ngani ira na pinamatay in damo ha amon nga ira hin-agian ngan gintikas an amon mga hiagi.

²⁵Kundi diri kami la an ira gindaot; ira ginsulong liwat an ngatanan nga ira mga kahigrani.

²⁶Ngan yana ira ginpalibotan an kota didto ha Jerusalem ngan nakahunahuna hira hin pag-agaw hini. Ira liwat ginparig-on an Templo ngan an Betsur.

²⁷Gawas kon gumios ka dayon, pagbubuhaton nira in labaw pa hini, ngan diri ka na makakapugong ha ira.”

²⁸Han pakabati hini han hadi, napungot hiya. Gintirok niya an ngatanan nga mga kapitan han kasondalohan, an mga opisyal han baktas la nga kasondalohan, ngan an labi ka sinarigan nga mga magsaragdon.

²⁹Nagsuhol liwat hiya hin mga sondalo nga taga iba nga mga nasod ngan tikang han mga poro nga Griego.

³⁰Nag-abot an iya kasondalohan hin 100,000 nga baktas la nga mga sondalo, 20,000 nga dikabayo nga mga sondalo, ngan 32 nga mga elepante nga gintutdoan para hin araway.

³¹Inmagi ha Edumea an hadi ngan an iya kasondalohan ngan ginsulong nira an Betsur, diin nakig-away hira sulod hin maiha nga panahon. Nagtindog hira hin mga igburungkag ngan mga tungtongan para hin pagsulong, kundi nakig-away hin maisog an mga nanalipod han bungto ngan ginmawas hira han bungto ngan ginsunog nira an mga tungtongan.

³²Kundi ginpaisol ni Judas an iya kasondalohan tikang han kota didto ha Jerusalem ngan nagkampo hira didto ha Bet Zacarias, ngan tungod hini naulang an pagsulong han kasondalohan han hadi.

³³Temprano pa han pagkaaga, ginbalhin han hadi hin kadagmitan an iya kasondalohan ngadto ha ligid han dalan tipakadto ha Bet Zacarias, diin nag-andam hin pakig-away an iya kasondalohan ngan nagtrompeta hira.

³⁴Ginpaisog nira an mga elepante para ha pag-awayan pinaagi hin pagpakitaa ha ira hin duga hin ubas ngan hin duga han kahoy nga mulbire.

³⁵Iginpasarang ini nga mga elepante dida han baktas la nga mga sondalo. Ha kada usa nga elepante iginpaupod in usa ka yukot nga mga tawo nga may salipod nga mga taming ngan bronse nga mga helmet. Inupdan liwat an kada elepante hin linain nga 500 nga dikabayo nga mga sondalo,

³⁶nga dayuday kaupod han elepante.

³⁷Iginsumpay hin maupay ngadto han bungkog han kada elepante in usa nga madig-on nga kahoy nga tungtongan pinaagi hin madig-on nga rienda. Tulo[18] nga mga sondalo an nasakay ha kada usa hini nga elepante, labot han nagdudumara han elepante.

³⁸Iginbutang ni Lisias an salin han mga dikabayo nga mga sondalo ha paluyo nga ligid han kasondalohan basi kapanalipdan ini han naglalakat nga mga sondalo samtang ira ginsusulong an kaaway.

³⁹Nagsilaw ha kabukiran ngan nag-idlap sugad hin naglalaga nga mga sulo an sikal han lamrag han adlaw dida han bronse ngan bulawan nga mga taming.

⁴⁰Usa ka bahin han kasondalohan han hadi ginpasarang didto han kahitas-an nga tuna han bakilid, ngan an iba nga bahin didto han kahamub-an, kundi durungan ngan tuhay an ira pagsulong.

⁴¹Nagkahadlok an mga tawo ha pakabati nira han aringasa han mga hinganiban ug han mga bandok han mga tiil han damo nga kasondalohan.

⁴²Hi Judas ug an iya kasondalohan sinmulong ha pag-awayan, ngan ha gilayon pinamatay nira in 600 han kasondalohan han hadi.

⁴³Han pakakita ni Eleazar Avaran nga darudako an usa han mga elepante kay han iba, ngan tinahoban ini hin hadianon nga hinganiban, nakahunahuna hiya nga sakay an hadi dida hini.

⁴⁴Igin-unong ni Eleazar an iya kinabuhi hin pagtalwas han iya mga tawo ngan pag-angkon hin dayon nga kabantogan.

⁴⁵Dinmalagan hiya nga waray kahadlok ngadto han elepante nga nakadto ha butnga hin usa ka hugpo hin baktas nga mga sondalo. Dinmasmag hiya ngadto, ngan iya pinamatay an mga tawo ha tuo ngan ha wala, sanglit an kaaway nga mga sondalo inmisol ha iya atubangan ha paluyo niya.

⁴⁶Sinmirong hiya han elepante ngan ginbuno ini niya, ngan natumba ini ngada ha iya, naipit hiya ngan namatay hiya.

⁴⁷Kundi han pakasabot han mga Judiyo han kakusog han kasondalohan han hadi ngan han tinuod nira nga tinguha hin pakig-away, inmisol hira.

⁴⁸Nagpadayon an hadi ngan han iya kasondalohan hin pakig-away han mga Judiyo didto ha Jerusalem ngan ginlibotan niya an bug-os nga Judea ug Jerusalem.

⁴⁹Nakigsangkay hiya han mga Judiyo didto ha Betsur, nga binmaya na han bungto. Waray na igo nga pagkaon didto han bungto para ha ira nga makailob hira hin pag-ato han pagsulonga ha ira, kay tuig adto nga iparahuway, nga waray tanom an kaumhan.

⁵⁰Ginbihag han hadi an Betsur ngan ginbutangan didto hin kasondalohan nga magbarantay.

⁵¹Niyan iya ginpalibotan an Templo ngan ginsulong niya hin maiha. Nagtindog hiya hin mga tungtongan hin pagsulong, ngan hin igburundol hin pagruba, mga lantaka hin kalayo ngan mga bato, ngan iba pa nga mga higamit hin pagpahanoy hin mga bangkaw ngan pagpalatos hin dagko nga mga bato.

⁵²An mga nananalipod naghimo man hin mga higamit hin pag-ato hadton mga kanan mga kaaway, sanglit nag-iha an away.

⁵³Kundi waray na gud pagkaon nga nahisalin didto han mga hirimosan han Templo kay tuig adto nga iparahuway, ngan ginkaon an ngatanan nga pagkaon didto han mga tawo nga kinmalagiw tikang han mga Hentil ngan inmayop didto ha Judea.

⁵⁴Nagin grabe na an kakulang hin pagkaon nga nanguli in damo nga mga tawo ngadto han ira kabablayan ngan gutiay na la nga mga tawo an nahibilin didto han Templo.

⁵⁵Hito nga panahon hi Felipe nga gintudlok ni Hadi Antioco san-o hiya mamatay hin pagtutdo han iya anak nga magin hadi,

⁵⁶binmalik tikang ha Persia ug Media. Binmalik hiya upod an kasondalohan han hadi ngan nakahunahuna hiya hin pagkapot han pamunoan. Han pakabati hini ni Lisias,

⁵⁷nagdagmit hiya hin pag-andam hin pagbaya. Nagsiring hiya ngadto han batan-on nga hadi, ha iya mga opisyal, ngan ngadto han iya mga tawo, “Nagtitikaluya kita kada adlaw; kulang na kita hin mga pagkaon, ngan makusog ini nga dapit nga aton ginsusulong. Labot hini, may-ada magkuri nga mga buruhaton han pamunoan nga nagkikinahanglan han aton panimangno.

⁵⁸Sanglit pag-andam kita hin pakigsabot ha ira ngan hin pakigdait ha ira ngan han bug-os nira nga nasod.

⁵⁹Tutugotan ta hira hin pagsunod han kalugaringon nira nga mga balaod ngan mga pamatasan sugad hadto anay. Nagtikang ini ngatanan nga mga kasamok tungod han kapungot nira ha aton pinaagi han diri naton pagtugoti ha ira hin pagtuman han ira mga balaod ngan mga pamatasan.”

⁶⁰Ginkarawat hin maupay han hadi ngan han mga opisyal ini nga sagdon, sanglit naghangyo hi Lisias hin kalinaw ngadto han mga Judiyo, ngan ira kinarawat ini.

⁶¹Han pagsumpa na han hadi ngan han iya mga opisyal hin pagtuman hini nga mga ginsabotan, nagkagawas an mga Judiyo han ira kota.

⁶²Kundi han pagsulod han hadi han dapit han Templo didto han Bukid Sion ngan han paghikit-i niya han marig-on nga mga kota, iya ginsupak an ginsabotan ngan nagsugo hiya nga pagpanason an mga pader palibot han Templo.

⁶³Katapos nagdagmit hiya hin pagbaya ngan pagbalik ngadto ha Antioquia, diin hin-agian niya hi Felipe nga amo an nagdudumara han syudad. Ginsulong han hadi an syudad ngan nakuha an syudad pinaagi hin kusog.