Read Waray Samarenyo Meaning Based 1 Macabeo 7 Bible Online

1 Macabeo 7 - Waray Samarenyo Meaning Based bible

1 Macabeo 7

¹Dida han tuig 151[19] ginmikan ha Roma hi Demetrio nga anak ni Seleuco upod in pira nga mga tawo ngan dinmuong hira didto hin usa nga bungto ha ligid han Mediteraneo, diin nagpasangyaw hiya nga hadi na hiya han bungto.

²Han tipakadto hiya han hadianon nga palasyo han iya kaapoy-apoyan, gindakop han iya mga sondalo hira Antioco Quinto ug Lisias, ngan may-ada niya hunahuna hin pagdara ha ira ngadto kan Demetrio.

³Han paghibaro ni Demetrio hiunong hini, nagsiring hiya, “Diri ako karuyag kumita ha ira.”

⁴Sanglit ginpatay hira han mga sondalo, ngan gin-agaw ni Demetrio an trono.

⁵Niyan kinmadto kan Demetrio an ngatanan nga diri natoo han Dyos ngan maglingo nga mga Judiyo, nga pinangulohan ni Alcimo nga karuyag magin Labaw nga Padi.

⁶Nagdara hira hin mga sumbong kontra han iba nga mga Judiyo ngan nagsiring, “Pinamatay nira Judas ngan han iya kabugtoan an ngatanan nga binmulig ha imo ngan ginpaiwas kami han amon nasod.

⁷Nagsasagdon kami ha imo nga magsugo ka hin tawo nga imo sinarigan hin pagkadto ngan pag-usisa han ngatanan nga kapirdehan nga ira ginbuhat han amon mga hiagi ngan han katunaan han hadi, ngan hin pagkastigo kanda Judas, iya kabugtoan, ngan han ngatanan nga inmugop ha ira.”

⁸Ginpili ni Demetrio in usa han iya mga magsaragdon, usa ka tawo nga Baquides an ngaran nga amo an gobernador han Siria Mayor. Usa hiya nga importante nga tawo han ginhadian ngan mainugopon hiya han hadi.

⁹Ginpaupod ha iya hi Alcimo, an diri natoo han Dyos, ngan gintudlok hiya han hadi nga Labaw nga Padi; hi Alcimo an ginsugo hin pagbulos han mga Judiyo.

¹⁰Ginmikan hira ha Antioquia ngan inmabot ha Judea upod in damo nga kasondalohan. Gintalinguha ni Baquides hin paglipat kanda Juda ngan han iya kabugtoan pinaagi hin pagpadara ha ira hin mga sinugo upod in mga paghangyo hin pakigdait.

¹¹Kundi pakakita nira Judas ngan han iya kabugtoan han kadamo han kasondalohan nga ira gindara, waray hira tumuod han iginsiring han mga ginsugo.

¹²Kinmadto kanda Alcimo ug Baquides in usa nga hugpo hin mga magturutdo hin Balaod, nga nangaro nga ihatag ha ira an katadongan.

¹³Ini nga mag-inampoon ngan mag-unongon han bungto nga mga tawo amo an syahan han mga Judiyo nga nagtalinguha hin pakigsangkay kanda Alcimo ug Baquides.

¹⁴Sinmarig hira kan Alcimo nga usa nga padi han banay ni Aaron, ngan naghunahuna hira nga diri ini hiya magdadaot ha ira.

¹⁵Ginpatapod hira ni Alcimo han iya pakigdait ngan nagsumpa hiya nga waray gud karat-an nga mahinanabo ha ira o han ira kasangkayan.

¹⁶Kundi han pagtikang la nira hin pagtapod ha iya, iya dayon gindakop in 60 ha ira ngan pinamatay hira ngatanan sakob hin usa la ka adlaw. Sumala han siring han kasuratan,

¹⁷“Igin-ula an dugo han magtinumanon mo nga mga tawo, nagsarang an ira mga lawas palibot han Jerusalem, ngan waray usa nga nahisalin hin paglubong han mga patay.”

¹⁸Han kahinabo hini, nahadlok kanda Alcimo ug Baquides an ngatanan nga mga tawo, ngan nagsiring hira, “Diri hira maaram kon ano an kahulogan han kamatuoran o katadongan. Nagsumpa hira ngan ginsupak ini nira!”

¹⁹Binmaya han Jerusalem hi Baquides ngan iginpahimutang an iya kampo didto ha Bet Sait. Ginpadakop niya in pipira han magtinumanon nga mga Judiyo ngan damo nga mga maglingo nga naruyag hin pagdapig ha iya, iya ginpapatay hira ngan ginlabog ngadto hin usa nga hilarom nga luong.

²⁰Iginbutang ni Baquides an nasod ha ubos han pagdumara ni Alcimo, iginbilin in mga kasondalohan hin pagbulig ha iya, ngan inmoli hiya ngadto han hadi.

²¹Sanglit nagtikang hi Alcimo hin panlimbasog hin pagparig-on han iya kalugaringon nga pagka Labaw nga Padi.

²²Dinmapig ha iya an ngatanan nga magsamok han nasod. Nakuha nira an tuna han Judea ngan amo ini an tinikangan han dagko nga mga kakurian han mga Judiyo.

²³Nakasabot hi Judas nga darudako pa an kakurian nga ginhimo nira Alcimo ngan han iya mga tawo kay han karat-an nga ginbuhat han mga Hentil.

²⁴Sanglit ginlibot niya an bug-os nga katunaan han Judea hin pagbulos han ngatanan nga mga tawo nga binmalhin ngadto kan Alcimo ngan pagpugong ha ira hin pagbaya han mga bungto ngan pagkadto han kahuronan.

²⁵Han pakakita ni Alcimo nga nagtikakusog na hira Judas ngan han iya mga tawo, ngan han pakasabot niya nga diri hiya makakaato ha ira, binmalik hiya ngadto han hadi ngan iya iginsumbong hira hin dagko nga mga pagtalapas.

²⁶Niyan ginsugo han hadi hi Nicanor nga usa han iya labi ka dungganan nga mga opisyal, nga nagdumot han mga Judiyo, hin pagpuo ha ira.

²⁷Inmabot hi Nicanor ha Jerusalem upod in damo nga kasondalohan. Gintinguha niya hin paglipat kanda Judas ngan han iya kabugtoan pinaagi hin pagpadara ha ira hin mga sarabot hin pakigdait. Nagsiring hiya,

²⁸“Diri na kita kinahanglan mag-inaway. Makada ako ha imo upod in gutiay la nga mga gwardya para hin usa nga minagsarangkay nga hiruhimangraw naton nga duha.”

²⁹Han pagkakita nira, naghatagay hira hin katalahoran, kundi andam na an mga kaaway ni Judas hin pagdakop ha iya.

³⁰Han paghibaroi ni Judas nga an pagduaw ni Nicanor usa ini nga paagi hin pagdakop ha iya, nahadlok hiya ngan naglarang hin diri na pakigkita ha iya.

³¹Nakasabot hi Nicanor nga hinbaroan an iya malimbong nga panuyo, sanglit binmaya hiya han Jerusalem hin pakig-asdang kan Judas didto ha pag-awayan hirani han Cafarsalama.

³²Mga 500 han mga tawo ni Nicanor an pinamatay, ngan nanmalagiw an nahisalin han kasondalohan ngadto han kota han Jerusalem.

³³Waray pag-iha kinmadto hi Nicanor ha Bukid Sion. Ginmawas han Templo in pira nga kapadian nga upod ha ira in pira han mga pangulo han mga tawo, ngan kinarawat nira hi Nicanor pinaagi hin mga pulong hin pakigdait ngan pagpakita ha iya han halad nga tinubod nga iginhahalad ha ngaran han hadi.

³⁴Kundi ginbiaybiay la ini niya ngan gintuprahan ini niya, sanglit nahugawan sumala han seremonyas. Naghimangraw hiya hin mapinahitas-on

³⁵ngan ha iya pangisog gintarhog hira upod an pagsumpa, “Labot kon igtubyan dayon ha akon hi Judas ngan an iya kasondalohan, pagsusunogon ko ini nga Templo ha pagbalik ko katapos han akon pagdaog ha pag-awayan.” Ngan linmakat hiya nga puno hin kapungot.

³⁶Sinmulod an kapadian ngadto han bungsaran ngan imatubang hira han altar ngan han Templo. Nagtikang hira hin pagtangis ngan pag-ampo,

³⁷“O Ginoo, imo ginpili ini nga Templo nga magdadara han imo ngaran ngan usa nga dapit hin pag-ampo ngan pangamuyo para han imo mga tawo.

³⁸Yana, bulsa ini nga tawo ngan an iya kasondalohan; pamataya hira ha pag-awayan. Hinumdomi an ira pagpakaraota ha imo, ngan ayaw tugoti nga may-ada mahisalin ha ira nga buhi.”

³⁹Binmaya han Jerusalem hi Nicanor ngan nagkampo hiya didto ha Betoron, diin tinmampo ha iya an Siriahanon nga kasondalohan.

⁴⁰Hini ngahaw nga panahon nagkampo hi Judas didto ha Adasa upod in 3,000 ka tawo. Didto nag-ampo hi Judas,

⁴¹“O Ginoo, nagsusumat ha amon an mga Kasuratan nga han pagpadara hin usa nga hadi hin mga surugoon ha pagpakaalo ha imo, ginmawas an imo anghel ngan iya pinamatay in 185,000 han iya mga sondalo.

⁴²Yana, ha amo ngahaw nga paagi, pamataya ini nga kasondalohan ha amon atubangan yana nga adlaw ngan ipahibaro han ngatanan nga ginkastigo hi Nicanor kay iya ginpanamastamasan an imo baraan nga Templo. Kastigoha hiya sugad han angay han iya pagkamaraot.”

⁴³Nagtapo ha pag-awayan an mga kasondalohan dida han ika-13 nga adlaw han bulan han Adar, ngan napirde an kasondalohan ni Nicanor. Hi Nicanor ngahaw amo an syahan nga ginpatay didto han pag-awayan,

⁴⁴ngan han pakakita han iya mga sondalo nga patay na hiya, pinanlabog nira an ira mga hinganiban ngan nanmalagiw hira.

⁴⁵Ginlanat hira han mga Judiyo ha bug-os nga adlaw tikang ha Adasa ngadto ha Gezer. Samtang naglalanat hira, waray hunong an ira pagtrompeta hin pagtawag ha ira ngadto ha pag-awayan,

⁴⁶sanglit tikang han ngatanan nga higrani nga kabaryohan han Juda nagkagawas an mga tawo ngan ginsulong paluyoluyo an nanngalagiw nga mga kaaway. Napirit hira hin pag-isol tipakadto han mga Judiyo nga naglalanat ha ira ngan pinamatay an ngatanan nga kaaway didto han araway. Waray usa ha ira nga nahisalin nga buhi.

⁴⁷Nanikas an mga Judiyo ngan katapos ira ginpugot an ulo ni Nicanor ngan an iya tuo nga butkon nga iya hadto ginbayaw hin paghinambog. Ira gindara an iya ulo ngan an iya butkon basi igbutang nga kiritaon ha gawas han Jerusalem.

⁴⁸Nagkamay-ada dako nga pagrayhak han mga Judiyo. Ira iginggahin ito nga adlaw sugad nga usa nga linain nga adlaw hin pagsaurog,

⁴⁹ngan iginpasangyaw nga an ika-13 nga adlaw han Adar kinahanglan pagtumanon nga usa nga tinuig nga adlaw hin pagsaurog.

⁵⁰Nagkamay-ada kalinaw ha bug-os nga tuna han Judea sulod hin gutiay nga panahon.