Read Waray Samarenyo Meaning Based 1 Macabeo 8 Bible Online

1 Macabeo 8 - Waray Samarenyo Meaning Based bible

1 Macabeo 8

¹Nakabati hi Judas hiunong han mga Romano ngan han ira kaban togan nga makusog ug gamhanan hira nga hugpo hin kasondalohan. Hinbaroan niya nga kinakarawat nira nga kaurosa nira adton ngatanan nga natampo ha ira ngan adton mga napakadto ha ira mahihimo gud nga mga sangkay han Roma.

²Ginsumatan hiya hin mga tawo hiunong han mga araway nga inatubang han mga Romano ngan han ira maisog nga mga buhat kontra han mga Gauliahanon nga ira ginsakop ngan ginpugos hin pagbayad hin mga buhis.

³Nasumatan hiya han ira ginbuhat didto ha Espania han pag-agawa nira han mga mina hin salapi ngan mga mina hin bulawan didto.

⁴Pinaagi hin maupay nga pagplano ngan pagpadayon han buhat bisan ano an mahinabo, ira nasakop an bug-os nga nasod, bisan kon hirayo ini tikang ha Roma. Ira ginpirde an kahadian nga tikang hin higrayo nga mga tuna nga nakig-away ha ira; ira gintiupay gud hira hin pagpirdeha nga nagbayad hin tinuig nga mga buhis an mga nanhisalin nga buhi.

⁵Ira pinakiawayan ngan ginpirde hira Felipe ug Perseo nga mga hadi han Macedonia ngan an ngatanan nga inmugop ha ira kontra han Roma.

⁶Ira ngani ginpirde hi Antioco Magno, nga hadi han Siria, nga sinmulong ha ira upod in 120 nga mga elepante, mga dikabayo nga mga sondalo, mga karuwahe, ngan usa nga gamhanan nga hugpo hin kasondalohan.

⁷Ira gindara hiya nga buhi ngan ginpugos hiya ngan an iya mga sumurunod hin pagbayad hin magbug-at nga mga buhis, hin paghatag hin lulukaton nga bihag, ngan hin pagtubyan han

⁸India, Media, Lidia, ngan han iba han gimamag-upayi nira nga mga tuna. Nakuha nira ini ngatanan ngan iginhatag kan Hadi Eumenes.[20]

⁹Han paglarang han mga Griego hin pagsulong ngan pagbungkag ha ira,

¹⁰nahibaroan han mga Romano an ira mga larang ngan nagpadara hin usa nga heneral hin pakig-away ha ira. Pinamatay han mga Romano in damo han mga Griego, ginbihag an ira kaasaw-an ngan kabataan, pinanikas an mga gintatag-iya, gin-agaw an ira tuna, ginruba an ira mga kota, ngan ginhimo hira nga mga oripon, sugad nga mga oripon hira yana nga adlaw.

¹¹Ira liwat ginbungkag o gin-oripon in iba nga mga ginhadian, an mga kapuropud-an, ngan an ngatanan nga nakig-away ha ira.

¹²Kundi ira gintuman an ira pakigsangkay han ira mga kaurosa ngan hadton nagtapod ha ira para hin panalipod. Ira ginpirde in kahadian nga higrani ngan higrayo, ngan nahadlok ha ira an ngatanan nga nakabati han ira pagkabantogan.

¹³Ira ginbuligan in pira nga mga tawo basi mahimo nga mga hadi, samtang ira ginhukasan an iba; hira na gud an gamhanan ha bug-os nga kalibutan.

¹⁴Bisan pa hini ngatanan, waray Romano nga nagpasipara hin pagpauswag han iya kalugaringon nga katungdanan pinaagi hin pagsul-ot hin korona o pagbado hin hadianon nga mga panapton.

¹⁵Nagtukod hira hin usa nga senado, ngan kada adlaw nagkakatirok in 320 nga mga senador hin pagkarukayakan hiunong han mga angay pagbuhaton para han pagdumara han mga tawo ngan han ira kaupayan.

¹⁶Kada tuig ira igintapod ngadto hin usa ka tawo an katungdanan hin pagdumara ha ira ngan han maupay nga pagpalakat han bug-os nira nga katunaan. Nagsugot hini nga usa ka tawo an ngatanan, ngan waray pagkaawa o pangabugho dida ha ira.

¹⁷Ginpili ni Judas hi Eupolemo nga anak ni Juan ngan apo ni Acco ug hi Jason nga anak ni Eleazar, ngan ginsugo hira ngadto ha Roma hin paghimo hin usa nga sarabot hin pakigsangkay ngan pakig-urosa han mga Romano.

¹⁸Ginbuhat niya ini basi matapos an pagraogdaog han Siria, kay klaro kaupay ha mga Judiyo nga ginhimo na hira nga mga oripon.

¹⁹Katapos hin maiha ngan makuri nga paglakaton, inmabot ha Roma hira Eupolemo ug Jason ngan sinmulod hira han senado. Ginhimangrawan nira an katirok hini nga mga pulong:

²⁰“Ginpadara kami nganhi nira Judas Macabeo, iya kabugtoan, ug han mga tawo han Judea, hin pakighimangraw ha iyo basi himoon in usa nga pakigsabot hin panalipod, ngan mahibutang kami dida han iyo opisyal nga libro nga kasangkayan ngan mga kaurosa na kami niyo.”

²¹Ginkarawat han mga Romano an hangyo,

²²ngan an masunod amo in usa nga kopya han surat nga gingguhit dida hin bronse nga mga susuratan ngan ginpadara ngadto ha Jerusalem ngan magpapabilin ini didto nga sinurat han ginkasarabotan:

²³“Maghingaupay unta ha kadayonan an mga butang para han mga Romano ngan para han Judiyo nga nasod ha tuna ngan ha dagat! Mawaray unta hira mga kaaway, ngan diri unta hira makig-away!

²⁴Kundi kon igpahibaro in away syahan kontra han Roma o han bisan hain han iya mga kaurosa ha bisan diin nga dapit,

²⁵mabulig ha iya an Judiyo nga nasod hin kinasingkasing nga pag-ugop, sumala han pagkinahanglana ha iya.

²⁶Ngan hadton nakikig-away han Roma, diri mahatag an mga Judiyo hin pagkaon, mga hinganiban, kwarta, o mga barko, sumala han ginkauruyonan didto ha Roma. Kinahanglan pagtumanon han mga Judiyo an ira mga katungdanan hin waray pagpamulat hin bisan ano nga balos.

²⁷“Ha amo man nga paagi, kon igpahibaro in away syahan kontra han Judiyo nga nasod, mabulig ha ira an mga Romano hin kinasingkasing nga pag-ugop, sumala han pagkinahanglana ha iya.

²⁸Ngan ngadto han ira mga kaaway waray ighahatag nga pagkaon, mga hinganiban, kwarta, o mga barko, sumala han ginkauruyonan didto ha Roma. Kinahanglan pagtumanon han mga Romano an ira mga katungdanan hin waray paglingo.

²⁹“Amo ini an ginkasarabotan nga ginhimo han mga Romano ngan han mga tawo nga Judiyo.

³⁰Kundi kon ha panahon nga tiarabot magkauyon ini nga duha hin pagdugang o pag-iban hin bisan ano, ira paghihiruhimangrawan an ira mga nahuhunahunaan, ngan bisan ano nga ira igdugang ngan ig-iban, kakarawaton nga matuod.

³¹“Dugang pa hini, mahitungod han mga kasaypanan nga ginbubuhat ni Demetrio kontra han mga Judiyo, amon na hiya gisuratan han masunod, ‘Kay ano nga imo ginraraogdaog hin duro an amon kasangkayan ngan mga kaurosa nga mga Judiyo?

³²Kon magsumbong hira ha amon hiunong ha imo hin makausa pa, ugupan namon an ira tinguha ngan makikig-away kami ha imo didto ha tuna ngan didto ha dagat.’”