Read Waray Samarenyo Meaning Based 2 Macabeo 10 Bible Online

2 Macabeo 10 - Waray Samarenyo Meaning Based bible

2 Macabeo 10

¹Ha ubos han pagpangulo han Ginoo, ginbawi nira Judas Macabeo ngan han iya mga sakop an Templo ngan an syudad han Jerusalem.

²Ira ginruba an mga altar nga gintindog hin mga lumalangyaw didto han taboan ngan ginbungkag an iba nga mga gintindog para han ira pagsingba.

³Ira ginlinisan an Templo ngan gintindog nira in usa nga bag-o nga altar. Niyan, dida hin bag-o nga kalayo nga gindagkot pinaagi hin pag-intok hin batobantilis, naghalad hira hin halad nga tinubod ngan syahan ini nga paghalad sulod hin duha ka tuig, nagtubod hin insyenso, nagdagkot han mga suga, ngan nagpahimutang han baraan nga mga tinapay.

⁴Katapos nira pagbuhat hini ngatanan, nanhapa hira ha tuna ngan nag-ampo nga diri na gud hira paghampakon han Ginoo hin sugad nga mga karat-an. Naghangyo hira nga ipakita an iya kalooy kon kakastigohon hira tungod han tiarabot nga mga sala ngan diri na gud hira itubyan ngadto han magpintas nga pagano nga mga Hentil.

⁵Ira iginhalad na liwat an Templo dida han ika-25 nga adlaw han bulan han Kisleb, nga amo ngahaw nga adlaw ngan bulan han pagpanamastamasi han Templo han mga Hentil.

⁶Inmabot hin walo ka adlaw an malipayon nga pagsaurog, sugad han Pyesta han mga Payagpayag ngan nahinumdom an mga tawo nga diri pa maiha, ginamit nira an Pyesta han mga Payagpayag hin pagsinudoysudoy didto ha kabukiran sugad hin ihalas nga kamanampan ngan pag-inukoy ha mga lungib.

⁷Kundi yana, nga nagdadara hin mga sanga hin palmira ngan mga tungkod nga sinabongan hin mga bukad, nagparada hira ngan nagkakanta hin mapinasalamaton nga mga pagdayaw ngadto ha iya nga nagpalinis han kalugaringon niya nga Templo.

⁸Nagkasarabot an ngatanan nga kinahanglan magsaurog hini nga pyesta ha kada tuig an bug-os nga nasod nga Judiyo.

⁹Natapos an mga adlaw ni Antioco Epifanes.

¹⁰Yana magsusumat kami hiunong kan Antioco Eupator nga anak hini nga tawo nga diri natoo hin Dyos, ngan maghahatag kita hin usa nga dalikyat nga susumaton han magraot nga mga bunga han iya mga araway.

¹¹Han kahimo niya nga hadi, nagtudlok hiya hin usa ka tawo nga ginngaranan nga Lisias, nga magigin tinaporan han mga buruhaton han bungto ngan magigin labaw nga gobernador han Siria Mayor,

¹²nga masaliwan kan Tolomeo Macron nga nagin syahan nga gobernador nga nagdumara hin maupay han mga Judiyo. Nagtukod hi Macron hin malinaw nga ginkasabotan ha ira ha pagtalinguha hin pagbalos tungod han mga sayop nga ira gin-antos.

¹³Tungod hini, kinmadto kan Eupator an Kasangkayan han Hadi ngan iginsumbong hi Macron tungod hin paglingo, kay ginbayaan niya an poro han Cipre nga iginbutang ha ubos han iya pagmando ni Hadi Filometor han Ehipto, ngan inmugop hiya kan Antioco Epifanes. Ngani hi Macron gintawag han ngatanan nga usa nga malingo. Tungod kay waray na man hiya makakahimo nga mapadayon an pagtahod nga ginkinahanglan han iya katungdanan, nag-unay hiya pinaagi hin pag-inom hin hilo.

¹⁴Han kahimo ni Gorgias nga gobernador han Edumea, nagtukod hiya hin kasondalohan nga mga sinuholan ngan ginsulong niya an mga Judiyo ha kada higayon.

¹⁵Diri amo la ini, kundi nakuha han mga taga-Edumea ngahaw in pira nga mga importante nga mga kota ngan dayuday ginsasamok nira an mga Judiyo. Ira ginkarawat adton mga nangalagiw tikang ha Jerusalem ngan ginbuhat an ngatanan nga ira nahimo nga magpadayon la an araway nga kahimtang han nasod.

¹⁶Sanglit hira Judas Macabeo ngan han iya mga tawo, katapos maghalad hin mga pag-ampo para han tambulig han Dyos, nagdagmit hin pagkagawas ngan ginsulong hin tigda an mga kota han Edumea.

¹⁷Ginpaisol nira an mga natago ha mga pader ngan nakuha nira an mga kota, ngan pinamatay an ngatanan nga ira hintad-an, nga inmabot ngatanan hin mga 20,000 ka tawo.

¹⁸Kundi mga 9,000 han kaaway an nakasingabot hin pag-ayop ngadto hin duha nga masayon la kapanalipdan nga mga kota, dara nira an ngatanan nga ira kinahanglan hin pakig-away kon sulongon hira.

¹⁹Kinahanglan magpadayon hi Judas hin pagkadto han iba nga mga dapit han nasod, diin importante an pagkinahanglan ha iya, kundi iya ginbilin hira Simon ug Jose, upod hira Saqueo ngan han iya mga tawo. Igo kadamo ini nga kasondalohan hin pagpadayon han pagsulong,

²⁰kundi mga lamot in pira han mga tawo ni Simon, ngan han paghukipi ha ira hin 64 ka kilo nga salapi, ira tinugotan in pira han kaaway hin pagkalagiw tikang han mga kota.

²¹Han pakabati ni Judas han nahinabo, gintirok niya an mga pangulo han iya kasondalohan ngan ginsumbong adto nga mga tawo kay nagbaligya han ira kabugtoan pinaagi hin pagpagawsa han ira mga kaaway basi makig-away kontra ha ira.

²²Niyan iya pinamatay an mga maglingo ngan naagaw dayon an duha nga mga kota.

²³Dayuday mainuswagon hi Judas ha pag-awayan, ngan dida han iya pagsulonga hadto nga duha nga mga kota, iya pinamatay in kapin 20,000 ka tawo.

²⁴Hi Timoteo nga ginpirde na han mga Judiyo nakausa hadto, nagtirok na liwat hin damo nga dikabayo nga mga sondalo nga taga-Asia ngan hin damo kaupay nga mga sinuholan nga kasondalohan ngan sinmulong hira nga andam hin hinganiban ha pag-awayan hin pag-agaw han Judea.

²⁵Kundi samtang nagtitikahirani na an kaaway nga kasondalohan, nag-ampo ngadto han Dyos hira Judas ngan han iya mga tawo. Nanagbado hira hin sako, nagbutang hin tapotapo ha ira mga ulo,

²⁶ngan nanngulob dida han mga balitang han altar. Naghangyo hira han Dyos nga buligan hira pinaagi hin pakig-away kontra han ira mga kaaway, sumala han iya iginsaad dida han iya Balaod.

²⁷Han kahuman nira pag-ampo, kinuha nira an ira mga hinganiban, ginmawas hira ngan inmantaw hira han Jerusalem, ngan nagpalabay hira han gab-i didto hin dapit nga diri hirayo tikang han kaaway.

²⁸Han pagkaaga, nag-asdangay ha pag-awayan an duha nga hugpo hin kasondalohan. Ibinutang han Judiyo nga kasondalohan an ira pagtapod dida han ira kaisog ngan han ira pagsarig han Ginoo nga padadag-on hira, samtang an kaaway tinmapod la dida han ira kamaaram hin mapintas nga pakig-away.

²⁹Dida han makusog na gud an araway, nakakita an kaaway hin lima nga gwapo nga kalalaken-an nga sakay hin mga kabayo nga bulawan an mga bukado, ngan nagmamando han Judiyo nga kasondalohan.

³⁰Ginlibotan hi Judas hini nga lima ka tawo, ha pagpanalipod ha iya pinaagi han kalugaringon nira nga mga hinganiban, ngan ginpauranan hin mga pana ngan mga lilinti an kaaway. Sanglit nagupong ngan nalisang hin duro an kaaway nga kasondalohan ngan nagburublag hira. Ngan gintiupay hira han mga Judiyo,

³¹nga inmabot an namatay hin 20,500 nga baktas nga mga sondalo ngan 600 nga mga dikabayo.

³²Pinmalagiw hi Timoteo ngahaw ngadto han pinarig-on gud nga kota han Gezer nga minandoan ni Kareas nga iya bugto.

³³Ginsulong nira Judas ngan han iya mga tawo an kota sulod hin upat ka adlaw ha dako nira nga kasindak,

³⁴kundi sinmarig an mga tawo ha sakob han kota tungod kay marig-on an ira hinmumutangan. Nagginogliat hira ngatanan hin magpakalilisang nga mga pagbiaybiay kontra han mga Judiyo ngan han ira Dyos.

³⁵Han pagkaaga dida han ikalima ka adlaw, 20 han mga tawo ni Judas, nga namamaso hin kasina hini nga mga pakaraot, nagsaka han pader ngan ha mapintas nga kapungot ira pinamatay an ngatanan nga ira iginkita.

³⁶Ha amo ngahaw nga takna nagsaka han mga pader an iba didto ha luyo nga dapit han kota ngan ginsuritan an mga lantawan. Han pagsarang na han kalayo, damo han mga kaaway in nasunog ngan nagkamatay. An ikatulo nga bahin han kasondalohan nagruba han mga ganghaan ngan ginpasulod an iba nga mga tawo ni Judas hin pag-agaw han syudad.

³⁷Tinmago hi Timoteo didto hin usa nga atabay, kundi ira ginpatay hiya, sugad man hi Kareas nga iya bugto ngan hi Apolofanes.

³⁸Katapos hini, nagsaurog an mga Judiyo pinaagi hin pagkanta hin mga imno ngan mga kanta hin pagpasalamat ngadto han Ginoo nga nagpakita ha ira hin dako nga pagkalooy ngan nagpadaog ha ira.