Read Waray Samarenyo Meaning Based 2 Macabeo 14 Bible Online

2 Macabeo 14 - Waray Samarenyo Meaning Based bible

2 Macabeo 14

¹Paglabay hin tulo ka tuig, nahibaro hira Judas ngan han iya mga tawo nga nagsakay hi Demetrio nga anak ni Seleuco ngadto han duruongan han Tripolis upod in usa nga gamhanan nga hugpo hin kasondalohan ngan usa ka hugpo hin mga barko.

²Nahisumat nga iya ginpatay hi Hadi Antioco ug hi Lisias nga iya magmarangno ngan hiya na an nagdudumara han nasod.

³May-ada usa ka tawo nga ginngaranan kan Alcimo nga hadto anay usa hiya nga Labaw nga Padi, kundi naruyag hiya hin pagsunod han Griego nga pamatasan ha panahon han karibok. Ha pakasabot niya nga diri na hiya mahihimo nga Labaw nga Padi ngan tungod hin kahadlok han pagbubuhaton ha iya han mga Judiyo,

⁴nakigkita hiya kan Hadi Demetrio hadton tuig 151.[27] Dida hini nga higayon naghatag hiya han hadi hin usa nga bulawan nga korona ngan usa nga sanga hin palmira, upod in pira nga mga sanga hin olibo nga hin-araan hin paghatag ngadto han Templo, kundi waray hiya maghinabi hiunong han iya mga ginhuhunahuna.

⁵Kundi han paglabay hin panahon, nakahigayon hiya hin pagtuman han iya tinuyaw nga mga nahuhunahunaan dida han pagpatugoni ha iya ni Demetrio ngadto hin usa nga katirok han iya mga magsaragdon ngan ginpakianhan hiya kon ano an ginhunahuna han mga Judiyo nga iya bubuhaton. Nagsiring hi Alcimo,

⁶“Naghuhunahuna an mga sakop ni Judas Macabeo nga mga dyosnon hira ngan mga maunongon han bungto; karuyag nira an karibok ngan dayuday nag-uugsong hira han mga tawo hin pagsupil ngan diri gud nira karuyag nga mahimutang an nasod dida hin kalinaw.

⁷Ira ini kasaypanan nga diri na ako nakakapot han dungganan nga katungdanan hin pagka Labaw nga Padi, nga takos man unta ako tungod han akon mga tulin. Sanglit kinmanhi ako,

⁸una han ngatanan, tungod hin tinuod nga panginlabot para han imo mga kaupayan ha imo pagka hadi, ngan tungod man liwat han kaupayan han kalugaringon ko nga mga tawo han nasod, kay nag-aantos hin makalilisang nga kakurian an bug-os namon nga nasod tungod han linurong nga mga paagi nira Judas ngan han iya mga sakop.

⁹Katapos mo pag-usisaha, Harangdon nga Hadi, han ngatanan nga mga bahin hiunong hini nga mga butang, buhata na la tungod han imo hin-araan nga maloloy-on ngan mahigugmaon nga paagi basi makapahuway han mga pagtalumpigos an amon nasod ngan an mga tawo namon.

¹⁰Samtang buhi pa hi Judas, waray gud kalinaw an amon nasod.”

¹¹Han kahuman la ni Alcimo han iya pamulong, ginpahimulosan dayon ini nga higayon han iba nga mga magsaragdon hin pag-ugsong han kasina ni Demetrio kontra kan Judas, kay nasina liwat hira kan Judas.

¹²Sanglit ha gilayon gintudlok dayon ni Hadi Demetrio hi Nicanor, an magmarangno han iya mga elepante hin pakig-away, nga gobernador han Judea, ngan ginsugo hiya

¹³hin pagpatay kan Judas, pagburublag han iya mga sakop, ngan paghimo kan Alcimo nga Labaw nga Padi han labi kadako nga Templo ha bug-os nga kalibutan.

¹⁴An ngatanan nga mga lumalangyaw didto ha Judea nga namalagiw tungod han mga pagsulong ni Judas, nagdagmit na yana hin pagtampo han kasondalohan ni Nicanor, kay naghunahuna hira nga ira kaupayan an bisan ano nga pagkapirde o kasamokan nga maabot han mga Judiyo.

¹⁵Nakabati an mga Judiyo nga sinmulong hi Nicanor ngan binmulig ha iya an mga lumalangyaw didto han ira nasod. Sanglit nagsabrag hira hin tapotapo ha ira ngahaw ngan nag-ampo han ira Dyos nga nagpili han ira nasod nga iya dayon nga malon ngan waray gud magkawang hin pagbulig ha ira ha panahon han ira pagkinahanglan.

¹⁶Niyan nagmando hi Judas nga ira pangulo, ngan nagkagawas hira dayon hin pag-asdang han ira kaaway didto ha pag-awayan hirani han baryo han Adasa.[28]

¹⁷Nakig-away na kan Nicanor hi Simon nga bugto ni Judas, kundi tikapirde na hiya tungod hin tigda nga pagsulong han mga kaaway nga waray niya pagpaabota.

¹⁸Kundi han pakabati ni Nicanor han kaisog ngan kasindak nira Judas ngan han iya mga tawo hin pakig-away para han ira nasod, naglarang hiya hin pagtuhay hini nga mga butang diri ha pag-awayan.

¹⁹Iya lugod ginsugo hira Posidonio, Teodoto, ug Matatias hin pakigsabot han mga Judiyo hin usa nga ginsabotan hin kalinaw.

²⁰Katapos pagkauruyoni han ngatanan nga mga bahin han ginsabotan hin kalinaw, ginsumatan ni Nicanor an iya kasondalohan, ngan inmuyon hira hini ngatanan.

²¹Niyan igintalaan in usa nga adlaw diin magkikita hin hilit an duha nga mga pangulo. Iginggawas ngan iginpahimutang in mga lingkoran tikang han tagsa nga kampo hin pag-andam han dapit nga pagkikitaan.

²²Nagtagam hi Judas pinaagi hin pagbutang hin armado nga mga sondalo nga andam hin pakig-away didto hin mga dapit nga angay para hin ano man nga malingo nga gios han kaaway. Kundi malinaw an pagkahampang han duha nga mga pangulo ngan nagkasangkay hira nga duha.

²³Katapos hini nagpabilin hi Nicanor hin mairuiha didto ha Jerusalem. Waray na niya pagdaota an mga Judiyo, ngan iya pa ngani ginpaiwas an mga tawo nga kinmampi ha iya.

²⁴Nagkasangkay gud hira hin maupay, ngan hi Judas dayuday nga kaupod upod ni Nicanor.

²⁵Gin-aghat ni Nicanor hi Judas hin pangasawa ngan magtikang na hin usa nga panimalay. Sanglit gintuman ini ni Judas ngan nag-ukoy hiya hin usa nga malinaw nga kinabuhi.

²⁶Han pakasabot ni Alcimo han maupay nga pagkasangkay nira Nicanor ug Judas, kinmuha hiya hin usa nga kopya han ginsabotan hin kalinaw ngan kinmadto hiya hin pakigkita kan Hadi Demetrio. Iya ginsumatan an hadi nga nasupil hi Nicanor han pamunoan, kay iya gintudlok hi Judas nga malingo nga iya sumusunod.

²⁷Nakapapungot han hadi ini nga buwa nga mga sumbong, ngan ha iya kasina nagsurat hiya kan Nicanor, diin ginsumat niya nga diri hiya kontento han ginsabotan hin kalinaw ngan iya dakpon hi Judas Macabeo ngan dad-on dayon ngadto ha Antioquia.

²⁸Han pag-abot hini nga mensahe kan Nicanor, nabido hiya ngan waray mahibaro hiya kon ano an iya bubuhaton, tungod kay makuri para ha iya hin pagbungkag hin usa nga ginsabotan hin usa ka tawo nga nagtuman han iya bahin han ginsabotan.

²⁹Kundi makuri liwat ha iya in diri pagtuman han sugo han hadi, sanglit nagtikang hiya hin pagpangita hin usa nga paagi hin pagbitik kan Judas.

³⁰Kundi hinmatikan ni Judas nga tikalain ngan tikaisog na ha iya hi Nicanor, ngan iya hinbaroan nga maraot gud ini nga tigaman. Sanglit iya gintirok in kadam-an han iya mga sakop ngan linmakat hira hin pagtago.

³¹Han pakasabot ni Nicanor nga ginlipat hiya ni Judas, ginsulod niya an dako ngan baraan nga Templo ha takna nga naghahalad an kapadian ngan ginsugo hira nga ira itubyan ha iya hi Judas.

³²Kundi nagsumpa an kahadian nga diri hira maaram kon diin tago hi Judas.

³³Niyan ginbayaw ni Nicanor an iya tuo nga butkon tipakadto han Templo ngan nagsumpa hin pagtarhog: “Kon diri niyo igtubyan ha akon hi Judas sugad nga usa nga priso, pagpapanason ko ha tuna an Templo han Dyos, pagrurungkabon ko ini nga altar, ngan dida hini nga dapit pagtitindogon ko in usa nga maanyag nga templo para kan Dionisio.”

³⁴Katapos linmakat hiya, ngan ha gilayon nagbayaw an kapadian han ira kamot ngadto ha langit ngan nag-ampo han Dyos, an matinumanon nga Mananalipod han aton nasod:

³⁵“O Ginoo, diri ka nagkikinahanglan hin bisan ano, kundi imo karuyag in pagbutang dinhe han imo Templo ngan pag-ukoy tampo ha amon.

³⁶Ikaw la an baraan, ngan bag-o pa la nga ginlinisan an imo Templo, sanglit panalipdi yana ha kadayonan an pagkabaraan han Templo.”

³⁷Iginsumbong kan Nicanor in usa han pangulo didto ha Jerusalem nga ginngaranan kan Rasis. Iginkasumatsumat nga nagbulig hiya han iya mga tawo ha damo nga mga paagi ngan tinahod gud hiya nira ngan kinikilala hiya nga “an Amay han mga Judiyo.”

³⁸Han syahan pa nga mga adlaw han panahon han karibok, iya igin-unong an iya kinabuhi para han Judiyo nga tuloohan, ngan gindara hiya ngadto ha hukmanan tungod han iya pagkamaunongon.

³⁹Nagpadara hi Nicanor hin kapin 500 nga mga sondalo hin pagdakop kan Rasis ha pagpakita hin dayag nga may-ada niya pagdumot han mga Judiyo,

⁴⁰kay naghunahuna hiya nga an pagdakop ha iya makakapaluya han mga Judiyo.

⁴¹Harapit na makuha han mga sondalo an lantawan nga gintagoan ni Rasis. Ira ginpirit hin pag-abre an mga ganghaan tipakadto han bungsaran, ngan ihinatag na an sugo hin pagsunog han porta. Nakasabot hi Rasis nga diri hiya makakapalagiw, sanglit nag-unay na la hiya pinaagi han iya espada,

⁴²nga maupay lugod para ha iya nga mamatay nga dungganan kay mag-antos hiya hin kaarawdan ha mga kamot hin magraot nga mga tawo.

⁴³Tungod kay dinagmit man ini nga buhat, nagsayop an iya pagbuno han espada, ngan waray hiya mamatay dayon. Sanglit han nagkakasulod na an mga sondalo ngadto han kwarto, dinmalagan hiya ngadto han pader ngan linmukso sugad hin usa nga maisog nga bayani ngadto han mga tawo didto ha ubos.

⁴⁴Inmisol an mga tawo ngan nahulog hiya dida han dapit nga gin-isolan han mga tawo.

⁴⁵Samtang buhi pa hiya, ngan namamaso hin kaisog, binmuhat hiya nga nag-aawas an dugo tikang han iya mga kasamandan ngan dinmalagan hiya ha butnga han mga tawo, ngan ha kataposan nagsaka hiya hin usa nga umpas nga bato.

⁴⁶Yana, han nauubosan na hiya hin dugo, iya ginhukad an iya mga tinae pinaagi han duha niya nga kamot ngan iginlabog ini ngadto han mga tawo, ngan han ginbubuhat niya ini, nag-ampo hiya ngadto han Ginoo han kinabuhi ngan gininhawa, nga igbalik ha iya ini nga mga bahin han iya lawas. Amo ini an paagi han kamatay ni Rasis.