Read Waray Samarenyo Meaning Based 2 Macabeo 3 Bible Online

2 Macabeo 3 - Waray Samarenyo Meaning Based bible

2 Macabeo 3

¹Han hi Onias[3] pa an Labaw nga Padi ha Jerusalem, mahimyang an baraan nga syudad dida hin kalinaw ug kauswagan, ngan mahigpit an pagtuman han mga balaod, kay mainampoon hiya ngan nadiri hiya han maraot.

²Ginpasidunggan han mga hadi han Siria ug Ehipto an Templo ngan gintagan ini hin marahalon nga mga regalo,

³ngan ginbaydan pa ngani ni Hadi Seleuco[4] nga pangulo han bug-os nga Asia an gasto han mga halad nga tinubod han Templo tikang han iya nasukot nga mga buhis.

⁴Kundi may-ada usa ka tawo nga ginngaranan nga Simon, nga sakop han tribo ni Bilga,[5] nga labaw nga opisyal han Templo, nga napirde dida han lantugi kan Onias hiunong han mga turumanon bahin han taboan han syudad.

⁵Dida hini nga panahon, an gobernador han Siria Mayor amo hi Apolonio nga anak ni Trasco. Kinmadto ha iya hi Simon

⁶ngan ginsumatan hiya nga damo hin duro an kwarta didto han hirimosan han Templo nga diri ngani ini maiihap, ngan tungod kay diri man ini kinahanglanon para han mga halad nga tinubod, maupay nga an hadi an magbuot hini nga kwarta.

⁷Han pagkita nira Apolonio ngan han hadi, iya ginsumatan an hadi hiunong han kwarta, ngan ginsugo han hadi hi Heliodoro nga iya labaw nga ministro, hin pagkuha han kwarta para ha iya.

⁸Linmakat dayon hi Heliodoro para hini nga tuyo, kundi iginpahibaro la niya nga nagsusudoy la hiya hin pag-usisa han mga syudad han Asia Mayor.

⁹Han pag-abot niya didto ha Jerusalem ngan kahuman pagkarawata ha iya nga malipayon han Labaw nga Padi, iya iginsaysay an iya tinuod nga tuyo han iya pagduaw ngan nagpakiana hiya kon tinuod ba an iginsumat ha iya hiunong han manggad han Templo.

¹⁰Sanglit nagsiring an Labaw nga Padi nga nagbibinuwa hi Simon, an maraot nga tawo. May-ada man ngani pipira nga kwarta didto han hirimosan han Templo, kundi igingahin na in bahin hini para han balo nga kababayen-an ngan mga ilo, ngan an usa liwat nga bahin gintatag-iya ni Hircano nga anak ni Tobias, usa nga importante hin duro nga tawo. Iya liwat iginsumat nga an kadamo han kwarta maabot la hin 13,635 ka kilo nga salapi ngan 6,820 ka kilo nga bulawan.

¹²Nagsiring liwat hiya nga diri gud angay itugot hin bisan hin-o nga tawo hin pagkuha han kwarta nga gintatag-iya hadton mga tawo, kay dako an ira pagtapod tungod kay baraan ngan waray kahadlokan nira hin paghipos dida hini nga Templo nga bantogan ha bug-os nga kalibutan.

¹³Kundi nagpirit hi Heliodoro hin pagkuha han kwarta para han hirimosan han hadi, sumala han sugo han hadi.

¹⁴Sanglit nagtalaan hiya hin usa nga adlaw ngan sinmulod hiya han Templo ngan ha iya atubangan gin-ihap an kwarta. Amo ini an tinikangan han karibok han bug-os nga syudad.

¹⁵Nanhapa ha atubangan han altar an kapadian nga nakakabado han ira padianon nga mga panapton ngan nakimalooy sa Dyos nga diri kuhaon an kwarta kay hiya man an naghatag han mga balaod kanay tuyo amo nga diri paglabtan an kwarta nga iginpahipos han mga tawo didto han Templo.

¹⁶Masakit ha kasingkasing pagkit-on an Labaw nga Padi. Ginduas an iya nawong, tigaman nga mabug-at gud an iya kasingkasing,

¹⁷ngan kinakadal hin kahadlok an iya lawas, tigaman nga mabug-on an iya dughan.

¹⁸Tikang han ira kabablayan nagtirok an mga tawo hin pag-ampo nga diri unta pagtamastamasan an Templo.

¹⁹Napuno an kakalsadahan han mga kababayen-an nga nagpakasul-ot la hin sako nga mga tapis. Nagdadlagan ngadto han mga ganghaan o ngadto han mga pader han syudad, o tinmangbo naman la han ira bintana an batan-on nga kababayen-an kanay mga kag-anak hadto anay diri gud natugot nga hikit-an hira ha kadam-an.

²⁰Kundi bisan hira pumakain, ira ginbayaw an ira mga kamot ngadto sa Dyos ha pag-ampo.

²¹Hin kamakalolooy pagkit-on han Labaw nga Padi ha sugad kadako nga kasakitan ngan kabidoan ngan han ngatanan nga mga tawo didto han syudad nga nagugupong ngan nanhahapa ha tuna!

²²Samtang nakikimalooy an ngatanan han Ginoo nga Labi Kamakagarahum nga diri paglabtan an kwarta nga igintapod ha iya hin pagmangno,

²³nagdayon man hi Heliodoro han iya nahunahunaan.

²⁴Kundi hito gud nga takna han pag-abot niya ngan han iya gwardya didto han hirimosan han manggad, an Ginoo han ngatanan nga gahom ha kahitas-an nagpakita hin usa nga panan-awon, nga nagkalilisang ngan nanluya hin kahadlok an ngatanan nga nagpasipara hin pagsulod upod kan Heliodoro han pakakita nira hini nga gahom han Ginoo.

²⁵Ira hinkit-an dida han panan-awon in usa nga kabayo nga may-ada nasakay. An kabayo ginsabongan hin marahalon nga bukado, ngan an nasakay nga nakakasul-ot hin bulawan nga kasangkapan ha pag-awayan makaharadlok pagkit-on. Ha kadagmitan dinmasmag an kabayo kan Heliodoro, ngan inmisol ini ngan ginbanyakan hiya.

²⁶Hinkit-an liwat ni Heliodoro, in duha nga labi hin kamagkusog ngan mga gwapo nga batan-on nga kalalaken-an nga nakakasul-ot hin magtahom hin duro nga mga panapton. Ginpaluyoan hiya nira ngan ginsuntok hiya hin waray kalooy.

²⁷Natumba dayon hiya ha tuna nga waray na hiya kalibutan, ngan iginbutang hiya han iya mga tawo dida hin usa nga higdaan

²⁸ngan gindara hiya ngadto ha gawas. Ha pira pa la ka takna san-o ini mahinabo, sinmulod ini nga tawo han hirimosan han manggad inupdan hin damo nga mga tawo, lakip an ngatanan niya nga mga gwardya, ngan yana gindadara hiya nga waray may nabulig ha iya. Sanglit kinmilala hin dayag hira ngatanan[6] han pagkamakagarahum han Dyos.

²⁹Samtang nakada pa ha higdaan hi Heliodoro, waray na hiya makayakan ngan waray na paglaom nga maupay hiya tungod hini nga ginpakita nga gahom han Dyos.

³⁰Kundi gindayaw han mga Judiyo an Dyos nga Labi Kamakagarahum kay iya ginpanalipdan an iya Templo pinaagi hin milagro ngan natagan hira hin dako nga kalipayan, nga ha diri pa la maiha, puno hira hin kahadlok ngan kagupong.

³¹May-ada han kasangkayan ni Heliodoro naghangyo dayon kan Onias nga Labaw nga Padi nga mag-ampo hiya basi talwason han Gihahataasi nga Dyos an kinabuhi hini nga tawo nga tikamaratay na.

³²Sanglit naghalad an Labaw nga Padi hin usa nga halad nga tinubod ha paglaom nga tatalwason han Dyos hi Heliodoro, kay diri niya karuyag nga an hadi makahunahuna nga ginbuhat ini han mga Judiyo ngadto han usa ka tawo nga iya ginsugo.

³³Samtang naghahalad hi Onias, pinmakita na liwat kan Heliodoro an duha nga mga batan-on nga kalalaken-an nga nakakabado han amo ngahaw nga mga panapton han una nga nagpakita, ngan nagsiring, “Pagpasalamati an Labaw nga Padi; gintalwas han Ginoo an imo kinabuhi tungod ha iya.

³⁴Hinumdomi nga an Ginoo han langit amo an nagkastigo ha imo. Lakat na ngan sumati an ngatanan hiunong han dako niya nga gahom.” Katapos nira magsiring hini, waray na hira hikit-i.

³⁵Sanglit naghalad hi Heliodoro ngadto han Ginoo ngan naghimo hiya hin damo nga mga saad kay gintalwas han Ginoo an iya kinabuhi. Niyan nanamilit hiya kan Onias ngan binmalik hiya ngadto han hadi upod an iya kasondalohan.

³⁶Didto iya iginsumat an ngatanan nga ginbuhat han Ginoo, an Labi Kamakagarahum han ngatanan nga kadiyosan.

³⁷Han pagpakianhi han hadi kan Heliodoro kon hin-o an angay nga tawo nga susugoon han sunod nga misyon ngadto ha Jerusalem, binmaton hi Heliodoro,

³⁸“Kon may-ada ka usa nga kaaway o hinbabaroan nga tawo nga naghuhunahuna hin paglingo han imo pamunoan, hiya an igpadara. Mabalik hiya nga gintubal hin maupay, kon lugaring makabalik pa hiya, kay may-ada urosahon nga gahom nga tikang sa Dyos nga nagbubuhat didto.

³⁹Nagbabantay han Templo an Dyos han langit; iya ginhahampak ngan ginpapatay an bisan hin-o nga mapakadto hin pagdaot han Templo.”

⁴⁰Amo ito an susumaton kon gin-unan-o hin pagpanalipod han hirimosan han Templo basi diri paglabtan ni Heliodoro.