Read Waray Samarenyo Meaning Based 2 Macabeo 7 Bible Online

2 Macabeo 7 - Waray Samarenyo Meaning Based bible

2 Macabeo 7

¹Ha lain nga higayon gindakop in usa nga Judiyo nga iroy ngan han pito niya nga mga anak nga kalalaken-an. Iginpalatob hira han hadi ha pagpirit ha ira hin pagkaon hin karne nga baboy.

²Niyan nagsiring an usa han kalalaken-an, “Ano an iyo ginpapaabot nga kaupayan ha pagbuhat niyo hini? Gabay pa kami magkamatay kay magtalapas kami han mga pamatasan han amon kaapoy-apoyan.”

³Nakapapungot ini hin duro han hadi nga nagsugo pagpabangga hin maupay an dagko nga mga baong ngan mga kaldero,

⁴ngan ginbuhat ini dayon. Niyan iya ginsugo an iya mga tawo nga utdon an dila han anak nga naghimangraw ngan pag-anitan hiya ngan pamungkolan han iya mga kamot ngan mga tiil ha atubangan han iya iroy ngan unom nga kabugtoan.

⁵Katapos nira pagbuhata hini, buhi pa gihapon an batan-on. Nagsugo an hadi nga iglabog niya ngadto han usa nga bangga na nga mga baong. Samtang nag-uusbok an aso tikang han mga baong, nagdinasigay an kabugtoan ngan an ira nanay nga mamatay hira nga maisog, nga nagsiring,

⁶“Nagkikinita ha aton an Ginoo nga Dyos ngan sayod hiya han aton pag-antos. Ginpadayag ini ni Moises han pagsurat niya hin usa nga kanta ha paghukom ha karat-an hadton mga binmaya han Ginoo. Nagsiring hiya, ‘Malolooy an Ginoo hadton mga nag-aalagad ha iya.’”

⁷Han kamatay na han syahan nga bugto ha sugad hini nga paagi, nagtikang an mga sondalo hin pagkalipay dida han ikaduha nga bugto pinaagi hin pagrabota han iya buhok ngan han iya panit tikang han iya ulo. Katapos, ira ginpakianhan hiya, “Yana nakaon ka ba hini nga karne hin baboy, o karuyag ba nimo nga pagtag-usaon namon hin pamungkol han imo mga kamot ngan mga tiil?”

⁸Binmaton hiya ha kalugaringon niya nga yinaknan, “Diri gud ako makaon hini!” Sanglit ginpasakitan hiya han mga sondalo sugad han ira ginbuhat han syahan nga bugto,

⁹kundi dida han harapit na hiya mamatay, iya ginggoliatan an hadi, “Ikaw nga paraihaw! Makakahimo ka hin pagpatay ha amon, kundi babanhawon kami han Hadi han bug-os nga kalibutan ngan tatagan kami hin dayon nga kinabuhi, kay ginsugot namon an iya mga balaod.”

¹⁰Nagtikang an mga sondalo hin pagkalipay dida han ikatulo nga bugto. Han pagsugoa ha iya hin paggawas han iya dila, ginbuhat ini dayon niya. Niyan iya iginduhol nga waray pagkahadlok an iya mga kamot

¹¹ngan nagsiring, “Iginhatag ini ha akon han Dyos. Kundi labaw ha akon an iya mga balaod kay han akon mga kamot, ngan maaram ako nga gibabalik liwat ini ngahaw ha akon han Dyos.”

¹²Nahiburong an hadi ngan adton mga kaupod niya han iya kamaisog ngan han iya kaandam hin pag-antos.

¹³Han kamatay na niya, ginpasakitan han mga sondalo an ikaupat nga bugto ha amo ngahaw nga waray kalooy nga paagi,

¹⁴kundi amo ini an kataposan niya nga mga pulong, “Nalilipay ako hin kamatay pinaagi han iyo mga kamot, kay waray ruhaduha nga babanhawon kami han Dyos. Kundi waray gud pagkabanhaw para ha imo, Antioco!”

¹⁵Han pagtikangi na han mga sondalo hin pagsakita han ikalima nga bugto,

¹⁶iya gintutokan gud an hadi ngan ginsiring, “May-ada ka gahom hin bisan ano nga karuyag mo pagbuhaton ha amon, bisan kon may-ada ka kamatayon ngahaw. Kundi ayaw paghunahuna nga ginbayaan na han Dyos an amon mga tawo.

¹⁷Hulata. Gagamiton han Dyos an iya gahom hin pagkastigo ha imo ngan han imo mga tulin.”

¹⁸Niyan ginkuha han mga sondalo an ikaunom nga bugto, ngan san-o gud hiya mamatay, nagsiring hiya, “Ayaw pagsayop. Nag-aantos kami han angay ha amon, kay nakasala kami kontra han Dyos. Amo ini nga nahinabo ha amon ini ngatanan nga magpakalilisang nga mga butang.

¹⁹Kundi ayaw gud paghunahuna bisan magutiay nga makakalikay ka han kastigo tungod han pakig-away mo kontra han Dyos.”

²⁰An iroy amo an labi hin kamakaaramdok ha ira ngatanan, ngan takos gud hiya hin talagsaon nga dapit ha aton panumdoman. Bisan kon hinkit-an niya an kamatay han iya pito nga mga anak nga kalalaken-an sulod hin usa la ka adlaw, gin-ilob ini niya ha dako nga kaisog kay nagsarig hiya han Ginoo.

²¹Iya gin-usa an pagbati hin babaye ngan kaisog hin lalake ngan naghimangraw hin mga pulong hin pagpadasig ngadto han kada usa han iya mga anak nga kalalaken-an ha kalugaringon nira nga yinaknan.

²²Nagsiring hiya, “Diri ako maaram kon gin-unan-o hin pagtikang han iyo kinabuhi ha sakob han akon tagoangkan. Diri ako amo an naghatag ha iyo hin kinabuhi ngan gininhawa ngan nagturugkop han tagsa nga bahin han iyo lawas.

²³An Dyos amo an nagbuhat hini, an Dyos an nagtuha han bug-os nga kalibutan, han tulin han tawo, ngan han ngatanan nga buhi. Maloloy-on hiya ngan ig-uuli liwat ha iyo an kinabuhi ngan gininhawa, kay nahigugma kamo han iya balaod labaw kay han iyo paghigugma han iyo kalugaringon.”

²⁴Nakahunahuna hi Antioco nga gin-uuwat hiya han iroy, sanglit ginbuhat niya an ngatanan hin pag-aghat han puto niya nga lalake hin pagbaya han mga pamatasan han iya kaapoy-apoyan. Iya ginsaaran hiya diri la hin paghimo ha iya nga riko ngan bantogan, kundi hin pagbutang liwat ha iya ha usa nga hitaas nga katungdanan ha kagamhanan ngan paghatag ha iya han ngaran nga “Sangkay han Hadi.”

²⁵Kundi waray pamati ha iya an lalake, sanglit gintalinguha ni Antioco hin pag-aghat han iroy han lalake hin paghimangraw ha iya basi matalwas an iya kinabuhi,

²⁶ngan katapos hin damo nga paghangyo, inmuyon hiya hin pagbuhat hini.

²⁷Hinangbuyan niya an iya anak ngan iya ginlimbongan an mahuka nga hadi pinaagi hin pagsiring ha iya kalugaringon nira nga yinaknan, “Kalooyi ako, anak ko. Hinumdomi nga gindaradara ko ikaw ha akon tagoangkan sulod hin siyam ka bulan ngan ginpasuso ko ikaw sulod hin tulo ka tuig. Ginmangnoan ko ikaw ngan gintagan ko ikaw han ngatanan mo nga mga kinahanglanon ngada yana nga adlaw.

²⁸Sanglit gin-aaghat ko ikaw, anak ko, hin pagsiplat ha langit ngan ha tuna. Painoinoha an ngatanan nga imo hinkikit-an didto, ngan hibaroi nga an Dyos amo an naghimo hini ngatanan tikang hin waray ano man, sugad han paghimoa niya an tulin han tawo.

²⁹Ayaw kahadlok hini nga paraihaw. Igtubyan an imo kinabuhi nga malipayon ngan ipakita nga angay ka han imo kabugtoan, basi pinaagi han kalooy han Dyos, ibalik ka ha akon kaupod ha ira didto han pagkabanhaw.”

³⁰Han waray pa hiya pakakahuman hin paghimangraw, nagsiring an lalakehay, “Hadi Antioco, ano pa an imo ginhuhulat? Nadiri ako hin pagsugot han imo mga sugo. An mga sugo la dida han Balaod nga iginhatag ni Moises ngadto han amon kaapoy-apoyan amo an akon ginsusugot.

³¹Ginhunahuna mo an ngatanan nga maghuka nga mga butang nga imo bubuhaton ha amon mga tawo, kundi diri ka makakalikay han kastigo nga gin-andam han Dyos para ha imo.

³²Matuod ini nga nasisina ha amon an amon buhi nga Ginoo ngan iya ginpapaantos kami tungod han amon mga sala, basi pagtadongon ngan pagdisiplinahon kami niya. Kundi madaliay la ini nga panahon, kay iya pa gihapon kami mga surugoon, ngan pasasayloon kami niya.

³³

³⁴Kundi ikaw amo an labi hin kamahuka ngan labi hin kamaraot han ngatanan nga buhi nga butang. Sanglit ayaw paglimbongi an imo kalugaringon pinaagi hin mga lipat nga paghunahuna hin kabantogan samtang ginkakastigo mo an mga tawo han Dyos.

³⁵Diri ka gud makakalikay han kastigo ha mga kamot han Dyos nga Labi Kamakagarahum ngan nakakakita han ngatanan.

³⁶Nag-antos hin usa kadali an akon kabugtoan tungod han amon pagkamatinumanon han ginsaaran han Dyos, kundi sinmulod na hira yana han dayon nga kinabuhi.[16] Kundi hisasakban ka han paghukom han Dyos ngan pagkakastigohon ka sumala han angay ha imo tungod han imo kamapinahitas-on.

³⁷Itinutubyan ko yana an akon lawas ngan an akon kinabuhi tungod han balaod han amon kaapoy-apoyan, sugad han ginbuhat han akon kabugtoan. Kundi akon liwat ginhahangyo an Dyos nga kalooyan na niya an iya mga tawo ngan kastigohon ka na niya tubtob nga mapirit ka hin pagmatuod nga hiya gudla an Dyos.

³⁸Hinaot unta nga hi ako ngan an akon kabugtoan amo an kataposan nga mag-antos han kasina han Dyos nga Labi Kamakagarahum nga iya gindara subay han katadongan ngada han bug-os namon nga nasod.”

³⁹Nakapapungot hin duro kan Antioco ini nga mga pulong hin pagpakaraot nga iya iginpakastigo an lalakehay hin larolabaw pa kamasakit kay han iya kabugtoan.

⁴⁰Sanglit namatay an bata ha bug-os nga pagsarig ha Ginoo, nga waray gud hiya maglingo hin bisan usa ka takna.

⁴¹An kataposan nga ginpatay amo an iroy.

⁴²Kundi igo na an akon iginsumat hiunong han mga Judiyo nga ginkastigo ngan ginpirit hin pagkaon han mga tinae han halad nga kamanampan.