Read Waray Samarenyo Meaning Based Deuteronomio 1 Bible Online

Deuteronomio 1 - Waray Samarenyo Meaning Based bible

Deuteronomio 1

¹Aanhi hini nga basahan an mga pulong nga iginhimangraw ni Moises ha mga tawo han Israel han nakadto hira han kamingawan ha sinirangan nga dapit han Salog Jordan. Nakadto hira ha Kahamub-an han Jordan hirani han Suf, nga nabubutnga han bungto ha Paran ha usa nga ligid ngan han mga bungto han Tofel, Laban, Haserot, ug Disahab ha luyo nga ligid. (

²Onse ka adlaw an pagbaktas tikang ha Bukid Sinai ngadto ha Cades Barnea kon aadto aagi han sagkahon nga nasod han Edumea.)

³Dida han syahan nga adlaw han ika-11 nga bulan han ika-40 nga tuig tikang han ira pagbaya ha Ehipto, ginsumatan ni Moises an mga tawo bahin han ngatanan nga iginsugo ha iya han GINOO.

⁴Katapos ini han pakadaog han GINOO[1] kan Sihon nga hadi han mga Amoreohanon, nga naghadi didto han syudad han Hesbon, ngan kan Og nga hadi han Basan nga naghadi didto han mga syudad ha Astarot ug Edrei.

⁵Nakadto pa an mga tawo ha sinirangan nga dapit han Jordan didto han katunaan han Moab han pagtikang ni Moises hin pagsaysay han mga balaod ngan mga pagturon-an han Dyos. Nagsiring hiya,

⁶“Han nakadto pa kita ha Bukid Sinai, nagsiring ha aton an GINOO nga aton Dyos, ‘Maiha na an iyo pag-inukoy dinhe hini nga bukid.

⁷Lakat kamo tikang dinhe ngan balhin kamo ngadto han sagkahon nga nasod han mga Amoreohanon ngan ngadto han ngatanan nga mga higrani nga katunaan—ngadto han Kahamub-an han Jordan, han sagkahon nga katunaan ngan kapatagan, han timogan nga katunaan, ngan ha baybayon han Mediteraneo. Kadto kamo ha tuna han Canaan ngan unhan pa han Kabukiran han Libano, tubtob ngadto han dako nga Salog Eufrates.

⁸Amo ini ngatanan an tuna nga iginsaad ko nga GINOO hin paghatag ha iyo mga ginikanan, kanda Abraham, Isaac, ug Jacob ngan ngadto han ira mga tulin. Pakadto kamo ngan pag-ukoy kamo didto.’”

⁹Nagsiring han mga tawo hi Moises, “Han nakadto pa kita ha Bukid Sinai, nagsiring ako ha iyo, ‘Mabug-at para ha akon an katungdanan hin pagdumara ha iyo. Makuri ko na maakos kon pasagdan la ako.

¹⁰Ginpadamo kamo han GINOO nga iyo Dyos sugad han kabiton-an ha langit.

¹¹Padamoon pa unta kamo han GINOO nga Dyos han iyo mga ginikanan hin usa pa ka yukot ka pilo, ngan pauswagon unta kamo sumala han iya iginsaad!

¹²Kundi uunanhon ko, kon hi ako la, hin pakaakos han mabug-at nga katungdanan hin pagtuhay han iyo mga kalipongan?

¹³Pagpili kamo hin makinaadmananon, masinaboton, ngan batid nga mga tawo tikang han kada tribo, ngan tutudlokon ko hira nga tinaporan ha iyo.’

¹⁴Ngan inmuyon kamo nga amo ini an maupay pagbuhaton.

¹⁵Sanglit kinuha ko an makinaadmananon ngan batid nga mga pangulo nga iyo ginpili tikang han iyo mga tribo, ngan iginbutang ko hira nga mga tinaporan ha iyo. Tinaporan hin tinag-1,000 ka tawo an iba, hin tinag-100 an iba, hin tinag-50 an iba, ngan hin tinag-10 an iba. Gintudlok ko liwat in iba nga mga opisyal ha ngatanan nga mga tribo.

¹⁶“Hadto nga panahon gintugon ko hira an mga maghurukom niyo, ‘Pamatii niyo an mga kalipongan nga iginsusumbong han mga tawo ha iyo. Paghukmi hin waray pinaurog an tagsa nga kalipongan bisan kon bahin ini han iyo la kalugaringon nga mga tawo o kon nahiaapi hini in mga lumalangyaw nga nag-uokoy tampo ha iyo.

¹⁷Ayaw kamo pagpakita hin pagpaurog ha iyo mga paghukom; paghukmi an ngatanan hin amo ngahaw nga patakaran bisan kon hin-o hiya. Ayaw kahadlok bisan kan kanay kay tikang ha Dyos an iyo mga paghukom. Kon may kalipongan nga makuri gud para ha iyo, dad-a ini ngadi ha akon ngan ako an maghuhukom hini.’

¹⁸Iginhatag ko liwat ha iyo in mga turumanon para han iba pa nga iyo pagbubuhaton.

¹⁹“Gintuman ta an iginsugo ha aton han GINOO nga aton Dyos. Binayaan ta an Bukid Sinai ngan ginlatas ta an namamarapara ngan makaharadlok nga kamingawan tipakadto han sagkahon nga nasod han mga Amoreohanon. Han pag-abot ta ha Cades Barnea,

²⁰ginsiring ko kamo, ‘Aanhi na kamo han sagkahon nga nasod han mga Amoreohanon nga ihinahatag ha aton han GINOO nga aton Dyos, an Dyos han aton mga ginikanan. Tan-awa niyo; amo ito nga tuna. Pakadto kamo ngan pag-okyi ini sumala han iya iginsugo. Ayaw kamo pag-alang o kahadlok.’

²¹

²²“Kundi dinmaop kamo ha akon ngan nagsiring. ‘Pagsugo kita hin mga tawo nga mag-uuna ha aton hin pag-usisa han tuna basi makagsumat hira ha aton kon hain an gimamaupayi nga dalan nga aton pag-aagian ngan kon ano an kahimtang han mga syudad didto.’

²³“Baga maupay man adto nga iyo larang, sanglit nagpili ako hin 12 nga mga tawo, usa tikang han kada tribo.

²⁴Sinmulod hira han sagkahon nga nasod tubtob ha Kahamub-an han Escol ngan gin-usisa nira ini.

²⁵Gindad-an kita nira han ira pagbalik hin mga bunga hin kahoy nga ira hin-agian didto, ngan ginsumatan kita nira nga matambok an tuna nga iginhahatag ha aton han GINOO nga aton Dyos.

²⁶“Kundi sinmupil kamo han sugo han GINOO nga iyo Dyos, ngan waray kamo sumulod han tuna.

²⁷Man hin ngurutob ha iyo, ‘Napungot ha aton an GINOO. Ginpagawas kita niya han Ehipto ha pagtubyan ha aton ngadto hini nga mga Amoreohanon, basi pamatayon kita nira.

²⁸Kay ano nga makadto kita? Nahahadlok kita, labi na la kay ginsumatan kita han mga tawo nga aton ginsugo, nga an mga tawo didto magkurukusog ngan hiruhigtaas kay ha aton, ngan nag-uokoy hira hin mga syudad nga higtaas kaupay an mga pader. Hinkit-an nira didto in mga higante!’

²⁹“Kundi ginsiring ko kamo, ‘Ayaw kamo kahadlok hito nga mga tawo.

³⁰Mag-uuna ha iyo an GINOO nga iyo Dyos, ngan hiya an makikig-away para ha iyo, sugad han iyo hinkit-an nga iya ginbuhat didto ha Ehipto

³¹ngan didto ha kamingawan. Hinkit-an niyo kon gin-unan-o niya an pagdara ha iyo ngan iginggawas kamo ha kataragman tubtob nganhi hini nga dapit, sugad han pagkugos hin usa nga amay han iya anak.’

³²Kundi bisan pa hini nga akon iginsiring, waray la kamo gihapon sumarig han GINOO,

³³nga dayuday amo an nag-una ha iyo hin pagbiling hin dapit nga iyo pagkakampohan. Basi makatultol kamo han dalan, nag-una hiya ha iyo pinaagi hin harigi nga kalayo kon gab-i, ngan pinaagi hin harigi nga dampog kon adlaw.

³⁴“Hinbatian han GINOO an iyo mga pagngurutob ngan nasina hiya, sanglit nagsumpa hiya,

³⁵‘Waray usa ha iyo tikang hini nga maraot nga katulinan nga makakasulod han matambok nga tuna nga akon iginsaad hin paghatag ha iyo kaapoy-apoyan.

³⁶Hi Caleb la nga anak ni Jefone an makakasulod hini. Nagpabilin hiya nga matinumanon ha akon, ngan ighahatag ko ha iya ngan ha iya mga tulin an tuna nga iya gin-usisa.’

³⁷Tungod ha iyo nasina liwat ha akon an GINOO ngan nagsiring, ‘Bisan ikaw, Moises, diri ka makakasulod han tuna.

³⁸Kundi dasiga an tinguha han imo kabulig nga hi Josue nga anak ni Nun. Hiya an mangungulo han Israel hin pagtag-iya han tuna.’

³⁹“Niyan nagsiring an GINOO ha aton ngatanan. ‘An iyo kabataan nga diri pa maaram kon ano an maraot o maupay amo la an masulod han tuna—an kabataan nga, siring niyo, aagawon han iyo mga kaaway. Ighahatag ko ha ira an tuna ngan tatag-iyahon ini nira.

⁴⁰Kundi kamo nga mga tawo, balik kamo ngadto ha kamingawan ngan sulsoga niyo an dalan tipakadto han Dagat Aqaba.’

⁴¹“Binmaton kamo, ‘Moises, nakasala kami kontra han GINOO. Kundi yana masulong kami sumala han iginsugo ha amon han GINOO nga aton Dyos.’ Niyan nag-andam hin pakig-away an kada usa ha iyo. An iyo hunahuna nga masayonay la an pagsulong han sagkahon nga nasod.

⁴²“Kundi nagsiring ha akon an GINOO, ‘Sidnga hira nga diri sumulong, kay diri ako maupod ha ira, ngan pipirdehon hira han ira mga kaaway.’

⁴³Ginsumatan ko kamo han iginsiring ha akon han GINOO, kundi waray la kamo bumali. Sinmupil kamo ha iya, ngan ha iyo kamapinahitas-on sinmulong kamo han sagkahon nga nasod.

⁴⁴Niyan an mga Amoreohanon nga nag-uokoy hito nga kapungtoran nagkagawas kontra ha iyo sugad hin kabalay hin mga ligwan. Ginlanat kamo nira tubtob ha Horma ngan ginpirde kamo didto han sagkahon nga nasod han Edumea.

⁴⁵Sanglit nangaraba kamo han GINOO hin pakibulig ha iya, kundi waray hiya mamati o bumali ha iyo.

⁴⁶“Sanglit katapos naton pag-ukoy hin maiha didto ha Cades,