Read Waray Samarenyo Meaning Based Deuteronomio 10 Bible Online

Deuteronomio 10 - Waray Samarenyo Meaning Based bible

Deuteronomio 10

¹“Niyan nagsiring ha akon an GINOO, ‘Pagtabas hin duha nga mga papan nga bato nga sugad han una, ngan paghimo hin Kahon nga kahoy nga pagsusudlan hini. Sagka ngadi ha akon ngadto han pungkay han bukid,

²ngan igsusurat ko dida hito nga mga papan an iginsurat ko dida han mga papan nga imo iginpusdak, ngan onina igsusulod mo ini didto han Kahon.’

³“Sanglit naghimo ako hin Kahon nga akasya ngan nagtabas hin duha nga mga papan nga bato nga sugad han una ngan iginsagka ko ini ngadto han bukid.

⁴Niyan iginsurat han GINOO dida hini nga mga papan an amo ngahaw nga mga pulong nga iginsurat niya didto han una, an Napulo nga mga Sugo nga iya iginhatag ha iyo han paghimangraw niya tikang ha butnga han kalayo hadto nga adlaw han pagkatirok niyo didto han bukid. Iginhatag ha akon han GINOO an mga papan,

⁵ngan binayaan ko hiya ngan linmugsong ako han bukid. Niyan, sumala han iginsugo ha akon han GINOO, iginsulod ko ini didto han Kahon nga akon ginhimo—ngan aadto ini tikang pa hadto ngada yana.” (

⁶Nagkalakat an mga Israelita tikang han mga atabay nga gintatag-iya han mga tawo han Jaacan, ngan kinmadto hira ha Mosera. Didto namatay hi Aaron ngan iginlubong, ngan sinmaliwan ha iya nga padi hi Eleazar nga iya anak.

⁷Tikang didto kinmadto hira ha Gudgoda ngan nagpadayon ngadto ha Jotbata nga usa nga dapit nga may damo nga mga sapa.

⁸Didto han bukid[10] gintudlok han GINOO an mga tawo han tribo ni Levi nga amo an tinaporan han Kahon han Ginsaaran, nga mag-aalagad ha iya ha ira pagkapadi, ngan magbebendisyon ha iya ngaran. Ngan amo pa gihapon ini an ira mga katungdanan.

⁹Amo ito nga an tribo ni Levi waray nakarawat nga tuna nga ira malon, sugad han nakarawat han iba nga mga tribo; an nakarawat nira amo an katungod hin pagka mga padi han GINOO, sumala han iginsaad han GINOO nga iyo Dyos.)

¹⁰“Nagpabilin ako didto han bukid sulod hin 40 ka adlaw ug gab-i sugad han akon ginbuhat han una. Namati gihapon ha akon an GINOO ngan inmuyon hiya hin diri pagpuo ha iyo.

¹¹Niyan ginsiring ako niya hin pagbalik ngan pagpangulo ha iyo, basi makatag-iya kamo han tuna nga iya iginsaad hin paghatag ha iyo kaapoy-apoyan.

¹²“Yana, mga tawo han Israel, pamatii niyo an karuyag han GINOO nga iyo Dyos nga pagtumanon niyo: Tahora niyo an GINOO ngan tumana an ngatanan nga iya igsusugo ha iyo. Higugmaa hiya niyo, alagda hiya niyo ha bug-os niyo nga kasingkasing,

¹³ngan sugta niyo an ngatanan niya nga mga balaod. Ihahatag ko ini ha iyo yana nga adlaw para han iyo kaupayan.

¹⁴An GINOO an tag-iya bisan han gihihitaasi nga kalangitan; iya liwat an tuna ngan an ngatanan nga aada hini.

¹⁵Kundi labis an paghigugma han GINOO han iyo kaapoy-apoyan nga asay kamo an ginpili niya, diri an iba nga mga tawo, ngan kamo pa gihapon an iya pinili nga mga tawo asta ngada yana.

¹⁶Sanglit tikang yana pagsugot kamo han GINOO ngan ayaw na pagpatig-aha an iyo mga ulo.

¹⁷An GINOO nga iyo Dyos amo an gilalabawi nga Dyos han ngatanan nga kadiyosan ngan GINOO han ngatanan nga mga ginoo. Dako, makagarahum, ngan makaaramdok hiya ngan angay hiya pagsugton. Waray hiya pinalabi ngan diri hiya nakarawat hin mga hukip.

¹⁸Gintatalingoha niya nga katagan hin katadongan an mga ilo ngan mga balo nga kababayen-an. Nahigugma hiya han mga lumalangyaw nga nag-uokoy tampo han aton mga tawo, ngan nahatag hiya ha ira hin pagkaon ngan mga panapton.

¹⁹Sanglit higugmaa niyo an mga lumalangyaw, kay mga lumalangyaw kamo hadto anay didto ha Ehipto.

²⁰Tahora niyo an GINOO nga iyo Dyos ngan hiya gud la an iyo pagsingbaha. Pagmatinumanon kamo ha iya ngan ha ngaran han GINOO pagsumpa kamo.

²¹Dayawa hiya niyo kay amo hiya an iyo Dyos, ngan hinkit-an niyo han iyo kalugaringon nga mga mata an dagko ngan urosahon nga mga butang nga ginbuhat niya para ha iyo.

²²Han pagkadto ha Ehipto han iyo kaapoy-apoyan, 70 la hira ka tawo. Kundi yana ginhimo kamo han GINOO nga iyo Dyos nga magdamo sugad kadamo han kabiton-an ha langit.