Read Waray Samarenyo Meaning Based Deuteronomio 13 Bible Online

Deuteronomio 13 - Waray Samarenyo Meaning Based bible

Deuteronomio 13

¹“Bangin magsaad hin pagbuhat hin milagro o hin urosahon in usa nga manaragna o parahubad hin mga inop,

²basi mahugay kamo hin pagsingba ngan pag-alagad hin kadiyosan nga waray pa niyo pagsingbaha. Bisan kon matuman an iya iginsasaad,

³ayaw kamo pamati ha iya. Ginagamit hiya han GINOO nga iyo Dyos hin pagsari ha iyo, kon nahigugma ba kamo han GINOO ha bug-os niyo nga kasingkasing.

⁴Sunda niyo an GINOO ngan tahora hiya; sugta hiya niyo ngan tumana an iya mga sugo; singbaha niyo hiya ngan tumana an iya kaburot-on.

⁵Kundi pataya niyo in bisan hin-o nga parahubad hin mga inop o manaragna nga nagsusugo ha iyo hin pagsupil han GINOO nga nagtalwas ha iyo tikang ha Ehipto diin mga oripon kamo. Maraot in sugad hini nga tawo ngan karuyag niya nga mahigawas kamo han kinabuhi nga iginhatag ha iyo han GINOO pinaagi han iya mga sugo. Kinahanglan patayon niyo hiya basi diri mahingada ha iyo ini nga karat-an.

⁶“Bangin an iyo bugto nga lalake, o iyo anak nga lalake, o iyo anak nga babaye, o an asawa nga hinihigugma niyo, o an gisusuoki niyo nga sangkay, amo an maghugay ha iyo hin hilom hin pagsingba hin iba nga kadiyosan nga waray pa pagsingbaha niyo ngan han iyo kaapoy-apoyan.

⁷Bangin usa ha ira in mag-aghat ha iyo hin pagsingba han kadiyosan han mga tawo nga nag-uokoy hirani ha iyo o han kadiyosan hadton mga nag-uokoy ha hirayo.

⁸Kundi ayaw gud kamo pagpadara ha iya o bisan pamati ha iya. Ayaw hiya niyo kalooyi o pagpairi ngan ayaw hiya panalipdi.

⁹Pataya hiya! Kamo an mauna hin pagbato ha iya ngan sidnga an iba hin pagbato ha iya.

¹⁰Batoa hiya niyo ngada han kamatay! Nagtinguha hiya hin pagpabulag ha iyo han GINOO nga iyo Dyos nga nagtalwas ha iyo tikang ha Ehipto diin mga oripon kamo.

¹¹Niyan makakabati han nahinabo an ngatanan nga mga tawo han Israel; mahahadlok hira, ngan waray na gud magbubuhat hin sugad nga karat-an.

¹²“Kon mag-ukoy na kamo didto han mga bungto nga iginhatag ha iyo han GINOO nga iyo Dyos, bangin makabati kamo

¹³nga may-ada waray pulos nga mga tawo han iyo nasod nga naglipat han mga tawo han ira bungto ngadto hin pagsingba hin kadiyosan nga waray pa niyo pagsingbaha.

¹⁴Kon makabati kamo hin sugad nga hurobhurob, usisaha niyo ini hin maupay; ngan kon matood man nga nahinabo ini nga maraot nga butang,

¹⁵pataya niyo an ngatanan nga mga tawo didto hito nga bungto ngan an ngatanan nira nga mga baka. Puohan gud niyo ito nga bungto.

¹⁶Tiroka niyo an ngatanan nga mga hiagi han mga tawo nga nag-uokoy didto, ngan tambaka ini didto ha plasa han bungto. Katapos, sunoga niyo an bungto ngan an ngatanan nga aadto ha sakob hini, sugad nga usa nga halad ngadto han GINOO nga iyo Dyos. Kinahanglan pabay-an niyo ini nga bungto nga mabungkag ha kadayonan, ngan diri na liwat pagtindogon ini nga bungto.

¹⁷Ayaw kamo pagtipig para ha iyo hin bisan ano nga butang nga ginhukman na nga mabungkag, ngan mangangalimot an GINOO han iya mapintas nga kapungot ngan kalolooyan kamo niya. Malolooy hiya ha iyo ngan padadamoon kamo nga mga tawo sumala han iya iginsaad ha iyo kaapoy-apoyan,

¹⁸kon pagsugton niyo an ngatanan niya nga mga sugo nga akon iginhatag ha iyo yana nga adlaw, ngan pagtumanon niyo an iya ginpapabuhat ha iyo.