Read Waray Samarenyo Meaning Based Deuteronomio 15 Bible Online

Deuteronomio 15 - Waray Samarenyo Meaning Based bible

Deuteronomio 15

¹“Ha katapos han kada ikapito ka tuig, kinahanglan paraon an ngatanan nga mga utang.

²Sugara hini an pagbuhat: an nagpautang ha iya igkasi Israelita kinahanglan nga paraon na an utang; kinahanglan nga diri na niya sukton an kwarta; an GINOO ngahaw amo an nagpahayag nga ginpara na an utang.

³Makakahimo kamo hin pagsukot han nautang ha iyo hin usa nga lumalangyaw, kundi ayaw na kamo pagsukot han nautang ha iyo han iyo kalugaringon nga mga tawo.

⁴“Bebendisyonan kamo han GINOO nga iyo Dyos didto han tuna nga iya ihahatag ha iyo. Waray bisan usa han iyo mga tawo nga makakablas

⁵kon magsugot kamo ha iya ngan magtuman kamo hin maupay han ngatanan nga akon iginsusugo ha iyo yana nga adlaw.

⁶Bebendisyonan kamo han GINOO sumala han iya iginsaad. Makakahimo kamo hin pagpautang ngadto hin damo nga mga nasod, kundi ayaw kamo pangutang bisan kan kanay; paghahadian niyo in damo nga mga nasod, kundi waray nasod nga maghahadi ha iyo.

⁷“Kon may makalolooy nga iyo igkasi Israelita ha bisan diin nga mga bungto didto han tuna nga ihahatag ha iyo han GINOO nga iyo Dyos, ayaw kamo kahalot ngan pagdumiri hin pagbulig ha iya.

⁸Lugod pagmahinatagon kamo ngan pahudma hiya sugad han iya ginkikinahanglan.

⁹Ayaw kamo pagdumiri hin pagpahuram ha iya, tungod la nga hirani na an tuig hin pagpara han mga utang. Ayaw itugot niyo in sugad nga maraot nga panhunahuna. Kon dumiri kamo hin pagpautang, masangpit hiya han GINOO kontra ha iyo, ngan kamo an makakasala.

¹⁰Ihatag ha iya hin huyayag nga kasingkasing, ngan bebendisyonan kamo han GINOO ha ngatanan nga iyo pagbubuhaton.

¹¹Dayuday magkakamay-ada mga Israelita nga kablas ngan makalolooy, sanglit nagsusugo ako ha iyo nga magmahinatagon kamo ha ira.

¹²“Kon may igkasi niyo Israelita nga lalake o babaye nga magbaligya ha iyo han iya kalugaringon[13] sugad nga oripon, kinahanglan buhian hiya niyo katapos niya mag-alagad ha iyo sulod hin unom ka tuig. Han pag-abot han ikapito nga tuig kinahanglan buhian hiya niyo.

¹³Kon buhian na hiya niyo, ayaw hiya pagpalakta nga waray dara.

¹⁴Pabaloni hiya tikang han mga hatag ha iyo han GINOO—karnero, pagkaon ug bino.

¹⁵Hinumdomi niyo nga mga oripon anay kamo didto ha Ehipto ngan gintalwas kamo han GINOO nga iyo Dyos; sanglit iginhatag ko ha iyo ini nga sugo.

¹⁶“Kundi bangin diri karuyag bumaya ha iyo an iyo oripon; bangin nahigugma na hiya ha iyo ngan han iyo panimalay ngan karuyag niya hin pagpabilin dida ha iyo.

¹⁷Niyan dad-a hiya ngadto han porta han iyo balay ngan didto tuhoga an iya talinga; ngan maooripon na hiya niyo ha bug-os niya nga kinabuhi. Sugara an iyo pagdumara han iyo oripon nga babaye.

¹⁸Ayaw pagpakita hin maraot nga buot kon buhian niyo in usa nga oripon; nag-alagad na man hiya ha iyo hin unom ka tuig, ngan an iya suhol katunga la hin kanan sinuholan nga surugoon.[14] Tumana ini niyo ngan bebendisyonan kamo han GINOO nga iyo Dyos ha ngatanan nga iyo pagbubuhaton.

¹⁹“Igahin para han GINOO nga iyo Dyos an ngatanan nga suhag nga mga lalaki han iyo mga baka ngan mga karnero; ayaw niyo gamita hin pag-uma ini nga mga baka ngan ayaw niyo aroti ini nga mga karnero.

²⁰Kada tuig kakaonon ini niyo ngan han iyo mga panimalay ha atubangan han GINOO didto han usa nga dapit hin pagsingba.

²¹Kundi kon may mga dum-it ini nga mga hayop, kon piay o buta ini, o may grabe nga karat-an, kinahanglan diri niyo ini ighalad ngadto han GINOO nga iyo Dyos.

²²Makakahimo kamo hin pagkaon hin sugad nga mga mananap didto han iyo mga balay. Makakakaon kamo ngatanan hini, bisan malinis o mahugaw kamo sumala han seremonyas sugad han iyo pagkaon hin bugsok o hin oso.

²³Kundi ayaw niyo gamita an dugo hini para hin pagkaon; kinahanglan ihuwad ini ngada han tuna.