Read Waray Samarenyo Meaning Based Deuteronomio 16 Bible Online

Deuteronomio 16 - Waray Samarenyo Meaning Based bible

Deuteronomio 16

¹“Pagpasidunggi niyo an GINOO nga iyo Dyos pinaagi hin pagsaurog han Paglabay dida han bulan han Abib; gintalwas kamo niya tikang ha Ehipto dida han gab-i hini nga bulan.

²Kadto kamo han usa nga dapit hin pagsingba ngan pag-ihawa niyo didto in usa han iyo mga karnero o mga baka para han Paglabay nga pangaon, ha pagpasidungog han GINOO nga iyo Dyos.

³Kon magsaurog kamo hini nga pangaon, ayaw kamo pagkaon hin tinapay nga may-ada patubo. Sulod hin pito ka adlaw kakaonon niyo in tinapay nga waray patubo, sugad han iyo ginbuhat han pagbaya niyo hin kadagmitan didto ha Ehipto. Kaona niyo ini nga tinapay—kay tigaman ini nga tinapay han iyo pag-antos—basi, samtang nga buhi pa kamo, mahinunumdom kamo han adlaw han paggawas niyo han Ehipto, ito nga dapit hin pag-antos.

⁴Sulod hin pito ka adlaw waray gud iparatubo didto han tagsatagsa nga balay; ngan an karne han hayop nga gin-ihaw dida han gab-i han syahan nga adlaw kinahanglan kaonon hito ngahaw nga gab-i.

⁵“Ihawa niyo an hayop han Paglabay didto han usa nga dapit hin pagsingba; diri didto hin iba nga dapit han tuna nga ighahatag ha iyo han GINOO nga iyo Dyos. Buhata ini ha pagkatunod han adlaw, kay amo ini an takna han adlaw han pagbaya niyo ha Ehipto.

⁷Lagaa niyo an karne ngan kaona ini didto hin usa nga dapit hin pagsingba; ngan pangoli kamo ha pagkaaga.

⁸Sulod han sunod nga unom ka adlaw kakaonon niyo in tinapay nga waray patubo, ngan dida han ikapito nga adlaw pagtirok kamo hin pagsingba han GINOO nga iyo Dyos, ngan ayaw kamo pagtrabaho hito nga adlaw.

⁹“Pag-ihap kamo hin pito ka semana tikang han pagtikang niyo hin pag-ani,

¹⁰ngan pagsauroga an Pyesta han Pag-ani ha pagpasidungog han GINOO nga iyo Dyos pinaagi hin pagdara ha iya hin maupay nga kaburot-on nga halad nga tumbas han mga kaupayan nga iginhatag niya ha iyo.

¹¹Pagmalipayon kamo didto ha atubangan han GINOO kaupod han iyo mga anak, iyo mga surugoon, ngan han mga Levita, mga lumalangyaw, mga ilo, ngan mga balo nga kababayen-an nga nag-uokoy didto han iyo mga bungto. Pagbuhata ini niyo didto hin usa nga dapit hin pagsingba.

¹²Talinguhaa gud niyo hin pagtuman hini nga mga sugo; ayaw niyo hingalimti nga mga oripon kamo didto ha Ehipto.

¹³“Katapos niyo maggiok han ngatanan niyo nga mga gin-ani, ngan magpii han ngatanan niyo nga mga ubas, pagsauroga niyo an Pyesta han mga Payagpayag sulod hin pito ka adlaw.

¹⁴Pagpahimulosi ini niyo kaupod han iyo mga anak, iyo mga surugoon, ngan han mga Levita, mga lumalangyaw, mga ilo, ngan mga balo nga kababayen-an nga nag-uokoy didto han iyo mga bungto.

¹⁵Pagpasidunggi niyo an GINOO nga iyo Dyos pinaagi hin pagsaurog hini nga pyesta sulod hin pito ka adlaw didto hin usa nga dapit hin pagsingba. Pagmalipayon kamo kay ginbendisyonan han GINOO an iyo mga gin-ani ngan an iyo mga buhat.

¹⁶“Kinahanglan makadto an ngatanan nga kalalaken-an han iyo nasod hin pagsingba han GINOO didto hin usa nga dapit hin pagsingba hin makatulo ha usa ka tuig: ha Pyesta han Paglabay, ha Pyesta han Pag-ani, ngan ha Pyesta han mga Payagpayag. Kinahanglan magdara hin regalo an kada lalake,

¹⁷sugad han iya mahihimo nga tumbas han mga kaupayan nga iginhatag ha iya han GINOO nga iyo Dyos.

¹⁸“Pagtudlok kamo hin mga maghurukom ngan iba nga mga opisyal didto han kada bungto nga ihahatag ha iyo han GINOO nga iyo Dyos. Kinahanglan maghukom hira han mga tawo hin waray pinaurog.

¹⁹Kinahanglan matadong hira ngan diri magpakita nga may-ada hira pinalabi dida han ira mga paghukom; ngan diri hira kumarawat hin mga hukip, kay nakakabuta an mga regalo bisan han makinaadmananon ngan tangkod nga mga tawo, ngan nakakaaghat ha ira hin paghatag hin diri matadong nga mga paghukom.

²⁰Dayuday pagmaupay ngan pagmatadong kamo basi makatag-iya kamo han tuna nga ihinahatag ha iyo han GINOO nga iyo Dyos ngan basi magpadayon kamo hin pag-ukoy didto.

²¹“Kon maghimo kamo hin altar para han GINOO nga iyo Dyos, ayaw niyo isapit ha altar in kahoy nga tigaman han diyosa nga hi Asera.

²²Ayaw liwat niyo pagtindogi hin harigi nga bato para hin pagsingba hin diyosdiyos; nangangalas hini an GINOO.