Read Waray Samarenyo Meaning Based Deuteronomio 17 Bible Online

Deuteronomio 17 - Waray Samarenyo Meaning Based bible

Deuteronomio 17

¹“Ayaw kamo paghalad ngadto han GINOO nga iyo Dyos hin baka o karnero nga may mga dum-it; nangangalas hini an GINOO.

²“Pananglit hibatian niyo nga ha usa han iyo mga bungto may-ada lalake o babaye nga nakasala kontra han GINOO ngan waray magtuman han iya ginsaaran

³pinaagi hin pagsingba ngan pag-alagad hin iba nga kadiyosan, o han adlaw, o han bulan, o han mga bitoon, nga supak han sugo han GINOO.

⁴Kon hibatian niyo in sugad nga sumat, usisaha gud ini hin maupay. Kon matuod nga nahinabo ini nga maraot nga butang ha Israel,

⁵niyan dad-a niyo ito mga tawo ha gawas han bungto ngan pagbatoa hiya ngada han kamatay.

⁶Kundi pagpapatayon la hiya kon may duha o tulo nga mga testigo nga magpapamatuod kontra ha iya; diri hiya papatayon kon usa la an testigo.

⁷An mga testigo amo an mabalong han syahan nga mga bato, ngan katapos pagbabatoon ito nga tawo han iba nga mga tawo. Ha sugad hini nga paagi makukuha niyo ini nga karat-an.

⁸“Bangin may-ada magkuri hin duro nga turuhayon nga mga kalipongan han mga maghurukom didto han iyo mga bungto mahitungod hin mga katungod hin mga hiagi, o pagkasamad hin lawas hin tawo, o adton mga kalipongan hin magkalainlain nga pakamatay. Kon nahinabo ini, kadto kamo han usa nga dapit hin pagsingba nga ginpili han GINOO nga iyo Dyos,

⁹ngan itubyan an iyo kalipongan ngadto han kapadian nga Levita ngan ngadto han labaw nga maghurukom nga natorno hito nga takna, ngan hira an papaghukma han kalipongan.

¹⁰Hira an maghuhukom hini, ngan kinahanglan tumanon niyo an ira igsisiring ha iyo.

¹¹Karawata an ira paghukom ngan tumana hin tukib an ira mga tugon.

¹²Pagpapatayon an bisan hin-o nga magpasipara hin pagsupak han maghurukom o han padi nga natorno hito nga takna; ha sugad hini nga paagi makukuha niyo ini nga karat-an tikang ha Israel.

¹³Niyan hibabatian ini han ngatanan ngan mahahadlok hira ngan waray na magpapasipara hin pagbuhat hin sugad.

¹⁴“Katapos niyo pagtag-iya ngan pag-ukoy han tuna nga ihahatag ha iyo han GINOO nga iyo Dyos, niyan makakahunahuna kamo hin pagpili hin hadi, sugad han ngatanan nga mga nasod nga harani ha iyo.

¹⁵Talinguhaa niyo nga an tawo nga iyo pipilion nga magigin hadi, amo ngahaw an ginpili han GINOO. Kinahanglan usa hiya han iyo kalugaringon nga mga tawo; ayaw niyo paghimoa nga iyo hadi in usa nga lumalangyaw.

¹⁶Kinahanglan diri mag-angkon an hadi hin damo nga mga kabayo para han iya kasondalohan, ngan diri hiya magsugo hin mga tawo ngadto ha Ehipto hin pagpalit hin mga kabayo,[15] kay nagsiring an GINOO nga diri na gud mabalik ngadto ha Ehipto an iya mga tawo.

¹⁷Kinahanglan diri damo an mga asawa han hadi kay bangin tumalikod hiya han GINOO; ngan diri hiya mag-angkon para ha iya ngahaw hin damo nga salapi ug bulawan.

¹⁸Kon mahimo na hiya nga hadi, kinahanglan mamay-ada niya kopya han basahan han mga balaod ngan mga pagturon-an han Dyos, nga kinopya tikang han tunay nga kopya nga gintitipigan han Levita nga kapadian.

¹⁹Kinahanglan isapit ha iya ini nga basahan ngan magbasa hiya hini kada adlaw ha bug-os niya nga kinabuhi, basi mahibaro hiya hin pagtahod han GINOO ngan pagsugot nga matinumanon han ngatanan nga iginsusugo han GINOO.

²⁰Makakapugong ini ha iya hin pakahunahuna nga mauruupay hiya kay han iya igkasi mga Israelita ngan hin pagsupak han mga sugo han GINOO ha bisan ano nga paagi. Kon pagtumanon niya ini, maghahadi ha Israel hiya ngan an iya mga tulin sulod hin damo nga katuigan.