Read Waray Samarenyo Meaning Based Deuteronomio 20 Bible Online

Deuteronomio 20 - Waray Samarenyo Meaning Based bible

Deuteronomio 20

¹“Kon makadto kamo hin pag-atubang han iyo mga kaaway, ngan hikit-an niyo in mga karuwahe ngan mga kabayo ngan hin kasondalohan nga darudamo kay han iyo, ayaw kamo kahadlok ha ira. Maupod ha iyo an GINOO nga iyo Dyos nga nagtalwas ha iyo tikang ha Ehipto.

²Ha diri pa kamo makikig-away, makada anay ha atubangan in usa nga padi ngan masiring ngadto han kasondalohan,

³‘Mga tawo han Israel, pamati kamo! Makadto kamo ha pag-awayan yana nga adlaw. Ayaw kamo kahadlok han iyo mga kaaway, o kahulop, o kalisang.

⁴Maupod ha iyo an GINOO nga iyo Dyos ngan ihahatag ha iyo an pagdarag-an.’

⁵“Niyan maghihimangraw han mga sondalo an mga opisyal ngan masiring, ‘May-ada ba dinhe tawo nga bag-o pa la nga nagbalay, kundi waray pa ighalad an balay? Kon may-ada, kinahanglan umoli anay hiya. Kay kon diri, kon mamatay hiya didto ha pag-awayan, iba nga tawo an maghahalad han iya balay.

⁶May-ada ba dinhe tawo nga bag-o pa la nga nagtanom hin urubasan, kundi waray pa makaani han mga ubas? Kon may-ada, kinahanglan umoli anay hiya. Kay kon diri, kon mamatay hiya didto ha pag-awayan, iba nga tawo an magpapahimulos han bino.

⁷May-ada ba dinhe tawo nga karaslon pa? Kon may-ada kinahanglan umoli anay hiya. Kay kon diri, kon mamatay hiya didto ha pag-awayan, iba nga lalake an mangangasawa han iya babaye nga karaslon.’

⁸“Masiring liwat an mga opisyal ngadto han mga sondalo, ‘May-ada ba dinhe tawo nga nagtatalaw ngan nahahadlok? Kon may-ada kinahanglan umoli anay hiya. Kay kon diri, magtatalaw an iba tungod ha iya.’

⁹Kahuman hin paghimangraw han mga opisyal ngadto han kasondalohan, magpipili na hira hin mga pangulo para han tagsa nga hugpo.

¹⁰“Kon masulong kamo hin usa nga syudad, tagi anay hin higayon hin pagtubyan han syudad an mga tawo.

¹¹Kon buksan nira an mga ganghaan ngan tumubyan hira, magigin oripon niyo hira ngatanan ngan magbubuhat hira hin pinirit nga pagtrabaho para ha iyo.

¹²Kon diri tumubyan an mga tawo hito nga syudad, kundi makig-away hira ha iyo, paliboti ini han iyo kasondalohan.

¹³Niyan kon an syudad ipabihag na ha iyo han GINOO nga iyo Dyos, pamataya niyo an ngatanan nga kalalaken-an han syudad.

¹⁴Kundi madadara niyo para ha iyo ngahaw an kababayen-an, an kabataan, an mga hayop, ngan an iba pa nga mga butang didto han syudad. Magagamit niyo an ngatanan nga mga butang nga gintatag-iya han iyo mga kaaway. Iginhatag ini ha iyo han GINOO.

¹⁵Amo ito an iyo pagbubuhaton hadton mga syudad nga hirayo hin duro tikang han tuna nga iyo pag-uokyan.

¹⁶“Kundi kon maagaw niyo an mga syudad didto han tuna nga ihahatag ha iyo han GINOO nga iyo Dyos, pamataya niyo an ngatanan.

¹⁷Puoha gud an ngatanan nga mga tawo: an mga Hiteohanon, mga Amoreohanon, mga Canaanhon, mga Perizeohanon, mga Hibeohanon, ngan mga Jebuseohanon, sumala han iginsugo ha iyo han GINOO.

¹⁸Pamataya hira basi diri hira makadarahig ha iyo hin pakasala kontra han GINOO pinaagi hin pagtutdo ha iyo hin pagbuhat han ngatanan nga makapupungot nga mga butang nga ginbubuhat kon nagsisingba hira han ira kadiyosan.

¹⁹“Kon nagiibirihag kamo hin syudad, ayaw niyo pagpudla an mga kahoy nga nabunga, bisan kon maiha an iyo pagsulong han syudad. Kaona niyo an mga bunga, kundi ayaw niyo pagpudla an mga kahoy; kay diri man niyo kaaway an mga kahoy.

²⁰Mapupulod niyo an iba nga mga kahoy ngan magagamit niyo hin paghimo hin mga igburungkag tubtob han kaagaw han syudad.