Read Waray Samarenyo Meaning Based Deuteronomio 21 Bible Online

Deuteronomio 21 - Waray Samarenyo Meaning Based bible

Deuteronomio 21

¹“Pananglit hiagian in usa ka tawo nga ginpatay didto hin usa nga uma ha sakob han tuna nga ihahatag ha iyo han GINOO nga iyo Dyos, ngan diri kamo maaram kon hin-o an nagpatay ha iya,

²kinahanglan gumawas an iyo mga pangulo ngan mga maghurukom ngan pagsusuklon nira an kahirayo tikang han dapit diin hin-agian an lawas ngadto han tagsa nga higrani nga mga bungto.

³Niyan an mga pangulo han bungto nga labi kaharani han lawas nga hin-agian magpipili hin nati nga baka nga waray pa gamita hin pag-uma.

⁴Pagdadad-on ini nira ngadto hin dapit nga hirani hin sapa nga diri hinuhubsan ngan an tuna waray pa gud pag-aradoha o pagtamni, ngan didto babarion nira an liog han baka.

⁵Makadto liwat an Levitanhon nga kapadian kay hira an magtutuhay han tagsa nga kalipongan nga kasakut in pagraogdaog. Ginpili hira han GINOO nga iyo Dyos hin pag-alagad ha iya ngan hin pagbendisyon ha ngaran han GINOO.

⁶Niyan manhuhunaw ha bawbaw han baka an ngatanan nga mga pangulo han bungto nga labi kaharani han dapit diin hin-agian an ginpatay nga tawo,

⁷ngan masiring hira, ‘Waray kami magpatay han tawo, ngan diri kami maaram kon hin-o an nagbuhat hini.

⁸O GINOO, pasayloa an imo mga tawo nga Israel nga imo gintalwas tikang ha Ehipto. Pasayloa kami ngan ayaw kami pagsalaa tungod han pagpatay hin usa ka tawo nga waray sala.’

⁹Sanglit ha pagtuman niyo han karuyag han GINOO ipabuhat ha iyo, diri kamo pagsasalaon han pagpatay.

¹⁰“Kon ihatag na han GINOO nga iyo Dyos an pagdarag-an, ngan makadara kamo hin mga preso,

¹¹bangin hikit-an mo tampo ha ira in usa nga mahusay nga babaye nga imo kinakaruyag ngan buot mo pangasaw-on.

¹²Dad-a hiya ngadto han imo balay diin magkikiskis hiya han iya ulo,[20] mamamaklo,

¹³ngan magliliwan han iya mga panapton. Mag-uokoy hiya didto han imo balay ngan magmamabidoon sulod hin usa ka bulan para han iya mga kag-anak; katapos hito, makakahimo ka na hin pangasawa ha iya.

¹⁴Paglabay hin panahon, kon dumiri ka na ha iya, bubuhian mo hiya basi lumakat hiya kon ngain hiya karuyag kumadto. Tungod nga ginpirit mo man hiya hin pakighilawas ha imo, diri ka makakag-oripon ngan makakagbaligya ha iya.

¹⁵“Pananglit duduha an asawa hin usa nga lalake, ngan igin-anak nira para ha iya in mga anak nga kalalaken-an, kundi an suhag diri anak han iya minahal nga asawa.

¹⁶Kon maglarang na an lalake hin pagbahinbahin han iya mga hiagi ngada han iya mga anak, diri hiya magpapalabi han anak nga lalake han iya minahal nga asawa pinaagi hin paghatag ha iya han bahin han kanan suhag nga lalake.

¹⁷Kinahanglan tagan niya an suhag nga lalake hin doble nga bahin han iya mga hiagi bisan kon diri niya anak han iya minahal nga asawa. Kinahanglan kilalahon niya an iya suhag nga lalake ngan ighatag ha iya an bahin nga iya katungod subay han balaod.

¹⁸“Pananglit may usa ka tawo nga may anak nga lalake nga matig-a an ulo ngan masinupilon, usa nga anak nga diri nasugot han iya mga kag-anak bisan kon ira kinakastigo hiya.

¹⁹Pagdadad-on hiya han iya mga kag-anak ngadto ha atubangan han mga pangulo han bungto nga inuokyan niya ngan ipapasusi hiya ha ira.

²⁰Susumatan hira han mga kag-anak, ‘Matig-a an ulo ngan masinupilon an amon anak ngan diri nasugot ha amon; gastador hiya hin kwarta ngan parahubog.’

²¹Niyan pagbabatoon han mga tawo han syudad ini nga anak ngada han kamatay niya, basi makuha niyo ini nga karat-an. Hibabatian han ngatanan didto ha Israel an nahinabo ngan mahahadlok hira.

²²“Kon ginpatay in usa ka tawo tungod hin usa nga pagtalapas ngan ginbitay an iya lawas dida hin usa nga kahoy,

²³kinahanglan diri magpabilin didto an lawas ha bug-os nga gab-i. Kinahanglan iglubong ini hito ngahaw nga adlaw, kay an ginbitay nga tawo nagdadara ngada ha tuna han tunglo han Dyos. Iglubong an lawas basi diri niyo mahugawan an tuna nga ihahatag ha iyo han GINOO nga iyo Dyos.