Read Waray Samarenyo Meaning Based Deuteronomio 23 Bible Online

Deuteronomio 23 - Waray Samarenyo Meaning Based bible

Deuteronomio 23

¹“Waray tawo nga ginkapon o gin-utdan han iya ikinatawo nga masasakop han mga tawo han GINOO.

²“Waray tawo nga anak ha gawas o bisan hin-o han mga tulin hini nga tawo, bisan ngadto han ikanapulo ka lito han iya katulinan nga masasakop han mga tawo han GINOO.

³“Waray Amonitanhon o Moabita—o bisan hin-o han ira mga tulin, bisan ngadto han ikanapulo ka lito han iya katulinan nga masasakop han mga tawo han GINOO.

⁴Waray hira humatag ha iyo hin pagkaon ug tubig han naglalakaton kamo tikang ha Ehipto, ngan nagsuhol hira kan Balaam nga anak ni Beor, nga taga syudad han Peor didto ha Mesopotamia, hin pagtunglo ha iyo.

⁵Kundi waray pamati kan Balaam an GINOO nga iyo Dyos; ginhimo lugod niya nga bendisyon an pagtunglo ha iyo kay ginhigugma kamo niya.

⁶Samtang usa pa kamo nga nasod, ayaw gud niyo pagbuligi basi diri magmainuswagon ini nga mga nasod.

⁷“Ayaw niyo pagtamaya an mga Edomitanhon, kay uropod hira niyo. Ngan ayaw niyo pagtamaya an mga Ehiptohanon kay nag-ukoy kamo hadto anay didto han ira tuna.

⁸An ira mga tulin tikang han ikatulo ka lito han ira katulinan mahihimo masakop han mga tawo han GINOO.

⁹“Kon aadto kamo ha kampo ha panahon hin araway, paglikyi niyo an bisan ano nga makakahugaw ha iyo.

¹⁰Kon magmahugaw in usa ka tawo tungod kay gin-awasan hiya han iya binhe dida han iya pag-inop ha gab-i, kinahanglan gumawas hiya han kampo ngan magpabilin anay hiya didto.

¹¹Ha pagkakulop kinahanglan kumarigos hiya ngan ha pagkatunod han adlaw makakabalik na hiya ngadto han kampo.

¹²“Kinahanglan may-ada niyo dapit ha gawas han kampo nga kakadtoan niyo kon mauro kamo.

¹³Pagdara kamo hin lipak nga bahin han iyo kasangkapan basi kon mauro kamo, makakag-ukab kamo ngan kahuman niyo umuro tak-opan ngahaw an iyo gin-ukab.

¹⁴Himoa niyo an iyo kampo nga malinis ini sumala han seremonyas, kay kaupod niyo didto han iyo kampo an GINOO nga iyo Dyos ha pagpanalipod ngan pagpadaog ha iyo kontra han iyo mga kaaway. Ayaw kamo pagbuhat hin bisan ano nga malaw-ay nga makakapabaya ha iyo han GINOO.

¹⁵“Kon kumalagiw in usa nga oripon tikang han iya agaron ngan dumangop ha iyo hin pagpaugop, ayaw hiya pabalika.

¹⁶Paokya hiya ha bisan diin han iyo mga bungto nga iya karuyag ngan ayaw niyo hiya pagraogdaoga.

¹⁷“Kinahanglan waray Israelita nga babaye o lalake nga mahimo nga magbaraligya han iya dungog didto ha templo.

¹⁸Ayaw liwat gamita in kwarta nga tikang hini nga paagi didto ha Templo han GINOO nga iyo Dyos ha pagtuman hin usa nga saad. Nangangalas an GINOO hin sugad nga mga kababayen-an o kalalaken-an didto ha templo.

¹⁹“Kon magpautang kamo hin kwarta o pagkaon o bisan ano nga butang ngadto hin igkasi Israelita, ayaw hiya pagsukti hin patubo.

²⁰Makakagpatubo kamo han iyo iginpapautang ngadto hin lumalangyaw, kundi diri han iginpapautang niyo ngadto hin igkasi Israelita. Tumana ini nga turumanon ngan bebendisyonan han GINOO nga iyo Dyos an ngatanan nga iyo pagbuhaton didto han tuna nga iyo na pagtatag-iyahon.

²¹“Kon magsumpa kamo ha GINOO nga iyo Dyos, ayaw paglangana an pagtuman han iyo iginsaad; pinapagtuman ha iyo han GINOO an iyo iginsumpa ngan sala an diri pagtuman niyo han saad.

²²Diri sala an diri pagsumpa ha GINOO,

²³kundi kon iyo la karuyag nga pagsaad, talinguhaa nga iyo tumanon ini.

²⁴“Kon magbaktas kamo dida hin urubasan hin lain nga tawo, makakaon niyo an ngatanan nga ubas nga iyo karuyag, kundi kinahanglan diri kamo magdara hini ngadto ha iyo balay.

²⁵Kon magbaktas kamo dida hin uma hin mga pugas hin lain nga tawo, makakahimo kamo hin pagkutos han mga uhay pinaagi la han iyo mga kamot, kundi ayaw gamit hin garab.