Read Waray Samarenyo Meaning Based Deuteronomio 25 Bible Online

Deuteronomio 25 - Waray Samarenyo Meaning Based bible

Deuteronomio 25

¹“Pananglit kumadto ha hukmanan in duha nga mga Israelita hin pagtuhay hin kalipongan, ngan igpahayag nga waray sala an usa ngan salaan an ikaduha.

²Kon ginsirotan hin paglatoba an salaan, pakukulbon hiya han maghurukom ngan igpapalatob. An kadamo han mga latob ipasisikad dida han sala nga iya nabuhat.

³Mahihimo hiya paglatobon hin 40 nga mga latob. Kon ipalatob hiya hin lapos na hin 40 ka latos, makaarawod ini para ha iya ha atubangan han mga tawo.

⁴“Ayaw niyo pagbusali an baka samtang ginagamit mo ini hin paggiok.

⁵“Kon magtampo hin balay in duha nga magbugto nga lalake ngan mamatay in usa ha ira nga waray anak nga lalake, kinahanglan diri ipaasawa an nabalo niya nga asawa hin tawo nga gawas han panimalay; katungdanan ini han lalake nga bugto han namatay hin pangasawa hini nga babaye nga nabalo.

⁶Iisipon an syahan nira nga anak nga lalake nga anak han namatay nga lalake basi magpadayon ha Israel an tulin han iya panimalay.

⁷Kundi kon diri maruyag hin pangasawa han babaye an bugto han namatay, makadto an babaye ha atubangan han mga pangulo han bungto ngan masiring, ‘Diri nagtutuman han iya katungdanan an bugto han akon namatay nga bana; nadiri hiya hin paghatag han iya bugto hin tulin dida han mga tawo han Israel.’

⁸Niyan ipapatawag han mga pangulo han bungto an lalake ngan paghihimangrawan hiya. Kon dumiri la gihapon hiya hin pangasawa han nabalo nga babaye,

⁹dadaopon hiya han balo nga babaye dida ha atubangan han mga pangulo han bungto, huhukason niya in usa han mga sandalyas han lalake, tutuprahan an iya nawong, ngan masiring, ‘Amo ini an nahinanabo han tawo nga nadiri hin paghatag hin tulin ngadto han iya bugto nga lalake.’

¹⁰Kikilal-on an iya panimalay didto ha Israel nga ‘an panimalay han tawo nga ginhukasan han iya sandalyas.’

¹¹“Kon mag-away in duha nga lalake ngan umugop an asawa han usa pinaagi hin pagrabot han ikinatawo han ikaduha,

¹²ayaw niyo kalooyi an babaye; utda an iya kamot.

¹³“Ayaw kamo paglimbong kon nagamit kamo hin mga timbangan suroklan ngan mga taraksan.

¹⁵Gamita an ungod ngan toptop nga mga timbangan suroklan ngan mga taraksan, basi mag-ukoy kamo hin maiha didto han tuna nga ihahatag ha iyo han GINOO nga iyo Dyos.

¹⁶Nangangalas an GINOO hin mga tawo nga maglimbong.

¹⁷“Hinumdomi niyo an ginbuhat ha iyo han mga Amalekanhon han paggawas niyo ha Ehipto.

¹⁸Waray nira pagkahadlok han Dyos, sanglit ginsulong kamo nira ha talikoran han kinakapoy ngan binubutlaw pa kamo, ngan pinanmatay nira an ngatanan nga mga magluya na nga nakadto ha iyo luyo.

¹⁹Sanglit kon ihatag na ha iyo han GINOO nga iyo Dyos an tuna ngan matalwas na kamo han ngatanan niyo nga mga kaaway nga nag-uokoy palibot ha iyo, talinguhaa niyo hin pamatay han ngatanan nga mga Amalekanhon, basi waray na mahinumdom ha ira. Ayaw niyo ini hingalimti!