Read Waray Samarenyo Meaning Based Deuteronomio 26 Bible Online

Deuteronomio 26 - Waray Samarenyo Meaning Based bible

Deuteronomio 26

¹“Kon magtag-iya na kamo han tuna nga ihahatag ha iyo han GINOO nga iyo Dyos ngan mag-ukoy na kamo didto,

²kinahanglan an kada usa ha iyo nga magsulod kamo dida hin basket han syahan nga bahin han tagsa nga abot nga iyo gin-ani ngan kinahanglan dad-on ini niyo ngadto han usa nga dapit hin pagsingba.

³Kadtoa niyo an padi nga tinaporan hito nga takna ngan sidnga hiya, ‘Gintutug-an ko yana han GINOO nga akon Dyos nga sinmulod na ako han tuna nga iya iginsaad ha amon kaapoy-apoyan nga ihahatag ha amon.’

⁴“Kukuhaon han padi tikang ha imo an basket ngan ibubutang ini ha atubangan han altar han GINOO nga iyo Dyos.

⁵Niyan didto ha atubangan han GINOO imo igyayakan ini nga mga pulong: ‘Usa nga layaw nga Arameo an akon ginikanan. Gindara niya an iya panimalay hin pag-ukoy didto ha Ehipto. Diri hira damo han ira pagkadto ha Ehipto, kundi nahimo hira nga dako ngan gamhanan nga nasod.

⁶Ginraogdaog kami han mga Ehiptohanon ngan ginpirit kami hin pagtrabaho nga ira mga oripon.

⁷Niyan nagtawag kami hin pakibulig han GINOO nga Dyos han amon kaapoy-apoyan. Pinamatian kami niya ngan hinkit-an niya an amon pag-antos, kakurian, ug kasakitan.

⁸Gintalwas kami niya tikang ha Ehipto pinaagi han iya dako nga gahom ug kusog. Ginbuhat niya in mga milagro ngan mga urosahon, ngan itinugot niya nga mahinabo in magpakaharadlok nga mga butang.

⁹Gindara kami niya nganhi ngan iginhatag ha amon ini nga hura ngan matambok nga tuna.

¹⁰Sanglit yana gindadad-an ko an GINOO han syahan nga bahin han inani nga iya iginhatag ha akon.’ “Niyan igbutang niyo an basket ha atubangan han GINOO ngan pagsingba kamo didto.

¹¹Pagpasalamat kamo tungod han mag-upay nga mga butang nga iginhatag han GINOO nga iyo Dyos ha iyo ngan han iyo panimalay; ngan patampoha ha iyo han iyo pagsaurog an mga Levita ngan an mga lumalangyaw nga nag-uokoy dida ha iyo.

¹²“Ha kada ikatulo ka tuig ighatag niyo an ikanapulo nga bahin—ikanapulo nga bahin han iyo mga abot—ngadto han mga Levita, mga lumalangyaw, mga ilo ngan mga balo nga kababayen-an, basi ha kada bungto magkamay-ada hira han ngatanan nga kinahanglan nira nga pagkaon. Kon mahimo na niyo ini,

¹³sidnga an GINOO, ‘Waray ko ibinilin ha akon balay han baraan nga ikanapulo nga bahin; iginhatag ko na ini ngadto han mga Levita, mga lumalangyaw, mga ilo, ngan mga balo nga kababayen-an sumala han iginsugo mo ha akon. Waray ako magsupak o mahingalimot han imo mga sugo hiunong han ikanapulo nga bahin.

¹⁴Waray ako kumaon han bisan ano hini ha takna nga masulob-on ako; waray ako magdara han bisan ano hini ha gawas han akon balay han mahugaw pa ako sumala han seremonyas; ngan waray ako humatag han bisan ano hini nga usa nga halad para han mga minatay.[23] Ginsugot ko ikaw, O GINOO; ginbuhat ko an ngatanan nga imo iginsugo hiunong han ikanapulo nga bahin.

¹⁵Tamdi tikang han imo baraan nga dapit didto ha langit ngan bendisyoni an imo mga tawo nga Israel; bendisyoni liwat an hura ngan matambok nga tuna nga imo iginhatag ha amon sumala han imo iginsaad han amon kaapoy-apoyan.’

¹⁶“Yana nga adlaw nagsusugo ha iyo an GINOO nga iyo Dyos nga tumanon niyo an ngatanan niya nga mga balaod; sanglit sugta ini niyo hin matinumanon ngan ha bug-os niyo nga kasingkasing.

¹⁷Yana nga adlaw kinilala niyo an GINOO nga iyo Dyos; nagsaad kamo hin pagsugot ha iya, pagtuman han ngatanan niya nga mga balaod, ngan pagbuhat han ngatanan nga iya igsusugo.

¹⁸Yana nga adlaw ginkarawat kamo han GINOO nga iya kalugaringon nga mga tawo sumala han iya iginsaad ha iyo; ngan nagsusugo hiya ha iyo nga magtuman kamo han ngatanan niya nga mga balaod.

¹⁹Hihimoon kamo niya nga larulabaw kay han ngatanan nga mga nasod nga iya ginhimo, ngan kinahanglan pagdayawon ngan pagpasidunggan niyo an iya ngaran.[24] Magigin iya kamo kalugaringon nga mga tawo sumala han iya ginsaad.”