Read Waray Samarenyo Meaning Based Deuteronomio 27 Bible Online

Deuteronomio 27 - Waray Samarenyo Meaning Based bible

Deuteronomio 27

¹Niyan upod an mga pangulo han Israel nagsiring ha mga tawo hi Moises, “Tumana niyo an ngatanan nga mga tugon nga akon ihahatag ha iyo yana nga adlaw.

²Dida han adlaw nga natabok na kamo han Salog Jordan ngan masulod han tuna nga ihinahatag ha iyo han GINOO nga iyo Dyos, kinahanglan magtindog kamo hin dagko nga mga bato, buliha ngan bawbawi ini hin apog,

³ngan isurat dida hini ini ngatanan nga mga balaod ngan mga pagturon-an. Kon makasulod na kamo han hura ngan matambok nga tuna nga iginsaad ha iyo han GINOO nga Dyos han iyo kaapoy-apoyan,

⁴ngan aadto na kamo ha tabok han Jordan, tindoga niyo ini nga mga bato didto ha Bukid Ebal, sumala han akon igtutugon ha iyo yana nga adlaw, ngan buliha ngan bawbawi ini hin apog.

⁵Pagtindog kamo didto hin altar nga mga bato nga diri tinabas hin puthaw nga mga garamiton,

⁶kay kinahanglan paghimoon hin diri tinabas nga mga bato an bisan ano nga altar nga iyo pagtitindogon para han GINOO nga iyo Dyos. Didto iyo ighahalad in mga hayop nga tutuboron,

⁷ngan didto iyo ighahalad ngan pangangaonon an iyo mga halad hin pagkaurosa, ngan pagpasalamat kamo ha atubangan han GINOO nga iyo Dyos.

⁸Dida han mga bato nga binawbawan hin apog igsurat niyo hin dayag kaupay an tagsa nga pulong han mga balaod han Dyos.”

⁹Niyan upod an Levita nga kapadian nagsiring hi Moises ha ngatanan nga mga tawo han Israel, “Pagmingaw kamo, mga tawo han Israel, ngan pamatii ako niyo. Yana nga adlaw nahimo kamo nga mga tawo han GINOO nga iyo Dyos;

¹⁰sanglit sugta hiya niyo ngan tumana an ngatanan niya nga mga balaod nga akon ihahatag ha iyo yana nga adlaw.”

¹¹Niyan ginsiring ni Moises an mga tawo han Israel,

¹²“Kon makatabok na kamo han Jordan, matindog inin masunod nga mga tribo didto ha Bukid Gerizim samtang iginyayakan an mga bendisyon ngadto han mga tawo: Simeon, Levi, Juda, Isacar, Jose, ug Benjamin.

¹³Ngan matindog inin masunod nga mga tribo didto ha Bukid Ebal samtang iginyayakan an mga pagtunglo: Ruben, Gad, Aser, Zabulon, Dan, ug Neftali.

¹⁴Ighihimangraw han mga Levita hin dako nga tingog ini nga mga pulong:

¹⁵“‘Higagabaan han Dyos an bisan hin-o nga maghimo hin diyosdiyos nga bato, kahoy, o metal, ngan magsingba hini hin hilom; nangangalas hini an GINOO.’ “Ngan an ngatanan nga mga tawo mabaton, ‘Amen!’

¹⁶“‘Higagabaan han Dyos an bisan hin-o nga magpakaalo han iya amay o iroy.’ “Ngan an ngatanan nga mga tawo mabaton, ‘Amen!’

¹⁷“‘Higagabaan han Dyos an bisan hin-o nga magbalhin han tigaman hin pag-ultan han iya igkasi Israelita.’ “Ngan an ngatanan nga mga tawo mabaton, ‘Amen!’

¹⁸“‘Higagabaan han Dyos an bisan hin-o nga magtugway hin buta ngadto hin pagsimang han dalan.’ “Ngan an ngatanan nga mga tawo mabaton, ‘Amen!’

¹⁹“‘Higagabaan han Dyos an bisan hin-o nga magpugong han mga katungod han mga lumalangyaw, mga ilo, ngan mga balo nga kababayen-an.’ “Ngan an ngatanan nga mga tawo mabaton, ‘Amen!’

²⁰“‘Higagabaan han Dyos an bisan hin-o nga magpakaalo han iya amay pinaagi hin pakighilawas hin bisan hin-o han mga asawa han iya amay.’ “Ngan an ngatanan nga mga tawo mabaton, ‘Amen!’

²¹“‘Higagabaan han Dyos an bisan hin-o nga makighilawas hin mananap.’ “Ngan an ngatanan nga mga tawo mabaton, ‘Amen!’

²²“‘Higagabaan han Dyos an bisan hin-o nga makighilawas han iya bugto nga babaye o bugto niya nga babaye ha amay o ha iroy.’ “Ngan an ngatanan nga mga tawo mabaton, ‘Amen!’

²³“‘Higagabaan han Dyos an bisan hin-o nga makighilawas han iya ugangan nga babaye.’ “Ngan an ngatanan nga mga tawo mabaton, ‘Amen!’

²⁴“‘Higagabaan han Dyos an bisan hin-o nga makasala hin pagpatay hin tawo hin hilom.’ “Ngan an ngatanan nga mga tawo mabaton, ‘Amen!’

²⁵“‘Higagabaan han Dyos an bisan hin-o nga magpasuhol hin pagpatay hin tawo nga waray sala.’ “Ngan an ngatanan nga mga tawo mabaton, ‘Amen!’

²⁶“‘Higagabaan han Dyos an bisan hin-o nga diri magsugot han ngatanan nga mga balaod ngan mga pagturon-an han Dyos.’ “Ngan an ngatanan nga mga tawo mabaton, ‘Amen!’