Read Waray Samarenyo Meaning Based Deuteronomio 28 Bible Online

Deuteronomio 28 - Waray Samarenyo Meaning Based bible

Deuteronomio 28

¹“Kon pagsugton niyo an GINOO nga iyo Dyos ngan pagtumanon hin kinasingkasing an ngatanan niya nga mga sugo nga akon ihahatag ha iyo yana nga adlaw, hihimoon kamo niya nga larolabaw kay han bisan ano nga nasod dinhe ha tuna.

²Pagsugta an GINOO nga iyo Dyos ngan magigin iyo ini ngatanan nga mga bendisyon:

³“Bebendisyonan han GINOO an iyo mga bungto ngan an iyo kaumhan.

⁴“Bebendisyonan kamo han GINOO hin damo nga mga anak, damo nga mga abot, ngan damo nga mga baka ug mga karnero.

⁵“Bebendisyonan han GINOO an iyo inani nga mga abot ngan an iyo pagkaon.

⁶“Bebendisyonan han GINOO an ngatanan nga ginbubuhat niyo.

⁷“Pagpipirdehon han GINOO an iyo mga kaaway kon sulongon kamo nira. Masulong hira ha usa nga agian, kundi makalagiw hira ha iyo ha ngatanan nga mga agian.

⁸“Bebendisyonan han GINOO nga iyo Dyos an iyo ginbubuhat ngan pagpupun-on hin pagkaon an iyo mga kamalig. Bebendisyonan kamo niya didto han tuna nga ighahatag niya ha iyo.

⁹“Kon pagsugton niyo an GINOO nga iyo Dyos ngan pagbuhaton niyo an ngatanan nga iya igsusugo ha iyo, hihimoon kamo niya nga iya kalugaringon nga mga tawo sumala han iya iginsaad.

¹⁰Niyan hikikit-an han ngatanan nga mga tawo dinhe ha tuna nga ginpili kamo han GINOO nga iya kalugaringon nga mga tawo, ngan mahahadlok hira ha iyo.

¹¹Tatagan kamo han GINOO hin damo nga mga anak, damo nga kabakahan, ngan damo nga mga abot didto han tuna nga iya iginsaad han iyo kaapoy-apoyan nga iya ighahatag ha iyo.

¹²Igpapadara niya ha iyo in uran ha igo nga panahon tikang han iya hirimosan didto ha langit ngan bebendisyonan an ngatanan niyo nga ginbubuhat, basi makagpahuram kamo ngadto hin damo nga mga nasod, kundi diri kamo mangungutang bisan kan kanay.

¹³Hihimoon kamo han GINOO nga iyo Dyos nga mga pangulo han mga nasod ngan diri mga sakop hini nga mga nasod; dayuday magmamainuswagon kamo ngan diri gud mapapakyas kamo kon pagsugton niyo nga matinumanon an ngatanan niya nga mga sugo nga akon ihahatag ha iyo yana nga adlaw.

¹⁴Kundi kinahanglan diri niyo pagsupakon ini hin bisan ano nga paagi, o hin pagsingba ngan pag-alagad hin iba nga kadiyosan.

¹⁵“Kundi kon iyo pagsupakon an GINOO nga iyo Dyos ngan diri niyo pagtumanon hin kinasingkasing an iya mga sugo ngan mga balaod nga akon ighahatag ha iyo yana nga adlaw, mahinanabo ha iyo ini ngatanan nga mga karat-an:

¹⁶“Higagabaan han GINOO an iyo mga bungto ngan an iyo kaumhan.

¹⁷“Higagabaan han GINOO an iyo inani nga mga abot ngan an pagkaon nga gin-aandam niyo tikang hini nga mga abot.

¹⁸“Higagabaan kamo han GINOO pinaagi hin paghatag ha iyo hin pira la nga mga anak, gutiay la nga mga abot, ngan pira la nga mga baka ug mga karnero.

¹⁹“Higagabaan han GINOO an ngatanan nga iyo ginbubuhat.

²⁰“Kon magbuhat kamo hin maraot ngan igsikway niyo an GINOO, padadad-an kamo niya hin karat-an, kagupong, ug kasamok dida han ngatanan nga ginbubuhat niyo tubtob nga mapuo kamo dayon.

²¹Ipapadara ha iyo in sunodsunod nga mga sakit tubtob nga waray mahisalin ha iyo didto han tuna nga iyo na pagtatag-iyahon.

²²Hahampakon kamo han GINOO hin makatarapon nga mga sakit upod in panhupong ug hiranat; magpapadara hiya hin huraw ngan mapaso nga mga hangin basi mauga an iyo mga tanom. Diri mabaya ha iyo ini nga mga karat-an tubtob han iyo pagkamatay.

²³Diri na mauran ngan masusugad hin puthaw kamatig-a an iyo tuna.

²⁴Liwan han uran, magpapadara an GINOO hin mga bagyo nga magtatapwad hin tapotapo ug baras tubtob han kapuo niyo.

²⁵“Itutugot han GINOO nga makadaog an iyo mga kaaway kontra ha iyo. Susulongon hira niyo tikang ha usa nga aragian, kundi makalagiw kamo ha ira ha ngatanan nga mga aragian, ngan mahahadlok hin duro an ngatanan nga mga tawo ha tuna kon hikit-an nira an nahinanabo ha iyo.

²⁶Kon magkamatay kamo, maabot an katamsihan ngan magpintas nga kamanampan ngan kakaonon an iyo mga lawas ngan waray tawo nga magpapasipara hin pagtabog ha ira.

²⁷Padadad-an kamo han GINOO hin mga hubag sugad han ginbuhat niya han mga Ehiptohanon. Pararangrangon niya in mga kaduntan ha iyo mga lawas. Maluluob kamo hin mga nuka ngan sahid an pangatol han iyo kalawasan, kundi waray niyo hiaagian nga tambal hini.

²⁸Hahampakon kamo han GINOO hin pagkalurong, pagkabuta, ngan pagkagupong.

²⁹Mangangapkap kamo ha kapaw-an han adlaw sugad hin buta ngan diri kamo makakatultol han iyo dalan. Diri kamo magmamainuswagon han bisan ano nga iyo pagbuhaton. Dayuday la kamo nga pagraraogdaogon ngan pagtitikasan ngan waray gud tawo nga mabulig ha iyo.

³⁰“Igkakasabot kamo hin babaye, kundi iba nga tawo an mangangasawa ha iya. Magtitindog kamo hin balay, kundi diri gud kamo an maukoy han balay. Mag-uuma kamo hin urubasan, kundi diri gud kamo makakakaon han mga bunga hini.

³¹Pag-iihawon an iyo mga baka ha atubangan niyo, kundi diri kamo makakakaon han karne hini. Pagdadanason an iyo mga asno samtang nagkikita kamo, ngan diri na ini ig-ooli ha iyo. Ighahatag an iyo mga karnero ngadto han iyo mga kaaway ngan waray tawo nga mabulig ha iyo.

³²Ighahatag nga mga oripon an iyo mga anak nga kalalaken-an ug kababayen-an ngadto hin mga lumalangyaw samtang nagkikita kamo. Adlaw-adlaw kakapoyon an iyo mga mata hin paghinulat, kundi kawang la kay diri na maoli an iyo mga anak.

³³Kukuhaon hin langyaw nga nasod an ngatanan niyo nga mga abot nga iyo ginkabudlayan hin pagpatubo, samtang waray iba nga iyo kakarawaton, labot an dayuday la nga pagraogdaog ngan pagtalumpigos ha iyo.

³⁴Makakapatuyaw ha iyo an iyo mga pag-antos.

³⁵Lulubon han GINOO an iyo mga bitiis ug tuhod hin mga mag-undag nga kaduntan nga diri mahunong hin pagbulbog; maluluob kamo hin mga hubag tikang ha iyo alimpupuro ngadto ha rapadapa.

³⁶“Pagdadad-on han GINOO kamo ngan an iyo hadi ngadto hin langyaw nga tuna nga waray pa hadto pag-okyi niyo o han iyo kaapoy-apoyan; didto mag-aalagad kamo hin kadiyosan nga kahoy ug bato.

³⁷Didto han mga nasod nga pagpapasadngan ha iyo han GINOO mahipapausa an mga tawo tungod han mga nahinabo ha iyo; pag-iintrimisan ngan pagyuyubiton kamo.

³⁸“Magtatanom kamo hin damo nga mga binhe, kundi gutiay la an iyo pag-aanihon, kay kakaonon han mga duron an iyo mga tanom.

³⁹Mag-uuma ngan magmamangno kamo hin mga urubasan, kundi diri kamo makakapangoha han mga bunga hini o makakainom han bino hini, kay kukutkoton hin mga ulod an mga puno hin ubas.

⁴⁰Maturok an mga olibo nga kahoy bisan diin didto han iyo tuna, kundi mawawaray niyo bisan ano nga lana hin olibo, kay mapupurak an mga bunga.

⁴¹Magkakamay-ada niyo mga anak nga kalalaken-an ug kababayen-an, kundi mawawara hira ha iyo, kay dadad-on hira nga mga bihag.

⁴²Kakaonon hin gudtiay nga mga mananap an ngatanan niyo nga mga kahoy ngan mga abot.

⁴³“Magtitikagamhanan an mga lumalangyaw nga nag-uokoy didto han iyo tuna, samtang magtitiluya an iyo gahom.

⁴⁴Magkakamay-ada nira kwarta nga igpapautang ha iyo, kundi mawawaray kamo igpapautang ha ira. Ha kataposan paghahadian kamo nira.

⁴⁵“Maabot ha iyo ini ngatanan nga mga karat-an, ngan diri ini mabulag ha iyo tubtob han kapuo niyo, kay waray niyo pagsugta an GINOO nga iyo Dyos ngan waray niyo pagtumana an ngatanan nga mga balaod nga iya iginhatag ha iyo.

⁴⁶Magigin tigaman ini han kanan Dyos paghukom ha kadayonan ha iyo ngan han iyo mga tulin.

⁴⁷Ginpakaupay kamo han GINOO ha ngatanan nga paagi, kundi waray kamo mag-alagad ha iya nga malipayon ug tikos nga kasingkasing.

⁴⁸Sanglit mag-aalagad kamo han mga kaaway nga igpapadara han GINOO kontra ha iyo. Gugutomon, uuhawon, ngan maghuhubo kamo—nga mawawarayan kamo han ngatanan nga mga butang. Pagraraogdaogon kamo han GINOO[25] ngada han kapuo niyo.

⁴⁹Ipapadara ha iyo han GINOO hin usa nga nasod tikang han mga sidsid han tuna, nga usa nga nasod nga diri niyo nasasayoran an yinaknan. Mahugdon hira hin tigda ngada ha iyo sugad hin agila.

⁵⁰Magmamapintas hira ngan waray pagkalooy hin bisan hin-o, ma batan-on o tigurang.

⁵¹Kakaonon nira an iyo kabakahan ngan an iyo mga abot, ngan magkakamatay kamo hin gutom. Diri kamo nira sasalinan hin pagkaon, bino, lana hin olibo, kabakahan o kakarnerohan, ngan magkakamatay kamo.

⁵²Susulongon nira an tagsa nga bungto didto han tuna nga ihahatag ha iyo han GINOO nga iyo Dyos, ngan marurumpag an higtaas nga pinarig-on nga mga pader nga iyo sinasarigan.

⁵³“Kon paglibotan na han iyo mga kaaway an iyo mga bungto, mawawarayan na kamo pagkaon ngan kakaonon na la niyo bisan an iyo mga anak nga iginhatag ha iyo han GINOO nga iyo Dyos.

⁵⁴Mawawarayan na hin paglaom bisan pa an labi ka dungganan nga tawo nga anak hin riko ha panahon hin pagsulong ha iyo ngan kakaonon na la niya an pira han iya kalugaringon nga mga anak kay waray na iba niya nga pagkaon. Diri ngani niya tatagan hini an iya bugto o an asawa nga iya hinihigugma, o an bisan hin-o han iya mga anak nga mahisalin.

⁵⁵

⁵⁶Amo gihapon an pagbubuhaton bisan han labi ka dungganan nga babaye, riko hin duro nga waray niya pagkinahanglan. Kon paglibotan na han kaaway an iya bungto mawawarayan na hiya pagkaon nga iya na la kakaonon hin sekreto an iya katatawo pa la nga anak ngan pati an inunlan hini. Diri ngani mapasaro hiya han iya hinihigugma nga bana o han iya mga anak.

⁵⁷

⁵⁸“Kon diri niyo pagsugton nga matinumanon an ngatanan nga mga pagturon-an han Dyos nga nahisurat dida hini nga basahan, ngan kon diri niyo pagpasidunggan an urosahon ngan makaharadlok nga ngaran han GINOO nga iyo Dyos,

⁵⁹iya ipapadara ha iyo ngan han iyo mga tulin in mga sakit nga diri natatambal ngan hin magpakangingirhat nga mga peste.

⁶⁰Iya ipapadara liwat ngada ha iyo an ngatanan nga magpakaharadlok nga mga sakit nga iyo gin-agian didto ha Ehipto ngan diri gud kamo mag-uupay.

⁶¹Ipapadara liwat niya an magkalainlain nga mga sakit ngan mga peste nga diri hinnanabihan dida hini nga basahan han mga balaod ngan mga pagturon-an han Dyos ngan mapupuo kamo.

⁶²Bisan masugad kamo ka damo han kabiton-an didto ha langit, diri damo an mahisasalin ha iyo nga buhi, kay waray kamo magsugot han GINOO nga iyo Dyos.

⁶³Sugad nga nalipay an GINOO hin pagpakaupay ngan pagpadamo ha iyo, malilipay man hiya hin pagbungkag ngan pagpuo ha iyo. Gagaboton kamo tikang han tuna nga iyo na pagtatag-iyahon.

⁶⁴“Ipapasarang kamo han GINOO dida han ngatanan nga mga nasod, tikang ha usa nga sidsid han tuna ngadto ha luyo, ngan didto mag-aalagad kamo hin kadiyosan nga kahoy ug bato, kadiyosan nga waray pa hadto pagsingbaha niyo o han iyo kaapoy-apoyan.

⁶⁵Diri kamo makakaagi hin kalinaw bisan diin, waray dapit nga iyo matatawag nga iyo kalugaringon; hahadlokon kamo han GINOO dida hin duro nga kabaraka, kagupong, ngan pagturaw.

⁶⁶Dayuday makulba an iyo kinabuhi. Magkikinahadlok kamo hin duro adlaw gab-i; ngan mag-uokoy kamo dida hin dayuday nga pagkinahadlok han kamatayon.

⁶⁷Magpuputok hin kakulba an iyo mga kasingkasing tungod han ngatanan nga iyo hinkikit-an. Kada aga waray iba nga iyo hingyap kon diri an pagkagab-i; kada gab-i, waray iba nga iyo hingyap kon diri an pagkaaga.

⁶⁸Ibabalik kamo han GINOO ngadto ha Ehipto dida hin mga barko, bisan kon nagsiring hiya[26] nga diri na gud kamo mabalik ngadto. Didto tatalinguhaon niyo hin pagbaligya han iyo kalugaringon ngadto han iyo mga kaaway sugad nga mga oripon, kundi waray maruruyag hin pagpalit ha iyo.”