Read Waray Samarenyo Meaning Based Deuteronomio 29 Bible Online

Deuteronomio 29 - Waray Samarenyo Meaning Based bible

Deuteronomio 29

¹Amo ini an mga ipinapagtuman ha aton han ginsaaran nga ginsugo han GINOO kan Moises nga paghimoon niya para han mga tawo han Israel didto han tuna han Moab. Labot la ini han ginsaaran nga ginhimo para ha ira han GINOO didto ha Bukid Sinai.

²Gintirok ni Moises an ngatanan nga mga tawo han Israel ngan nagsiring ha ira, “Kinmita kamo han ginbuhat han GINOO han hadi han Ehipto, han iya mga opisyal, ngan han bug-os niya nga nasod.

³Kinmita kamo han magpakangingirhat nga mga peste, an mga milagro, ngan an dagko nga mga urosahon nga ginbuhat han GINOO.

⁴Kundi ngada yana nga adlaw waray niya itugot nga makasantop kamo han iyo hinbaroan ngan gin-agian.

⁵Sulod hin 40 ka tuig ginpangulohan kamo han GINOO hin paglatas han kamingawan, ngan waray madunot an iyo mga panapton ngan mga sandalyas.

⁶Waray niyo tinapay nga pagkaon o bino o maisog nga irimnon, kundi gintagan kamo han GINOO han iyo mga kinahanglanon basi katutdoan kamo nga hiya amo an iyo Dyos.

⁷Ngan han pag-abot naton nganhi hini nga dapit, ginmawas hira Hadi Sihon han Hesbon ug Hadi Og han Basan hin pakig-away ha aton. Kundi ginpirde ta hira,

⁸ginrikopohan ta an ira tuna, ngan ginbahinbahin ini nga tuna ngada han mga tribo nira Ruben, Gad, ngan han katunga han tribo ni Manases.

⁹Sugta niyo nga matinumanon an ngatanan nga mga ipinapagtuman hini nga ginsaaran, basi magmainuswagon kamo han ngatanan nga iyo ginbubuhat.

¹⁰“Yana nga adlaw natukdaw kamo ha atubangan han GINOO nga iyo Dyos, kamo ngatanan—an iyo mga pangulo ngan mga opisyal, an iyo kalalaken-an,

¹¹kababayen-an, ngan kabataan, ngan an mga lumalangyaw nga nag-uokoy tampo ha iyo ngan nag-alagad ha iyo hin pangahoy ngan hin pag-alog.

¹²Aanhi kamo yana nga adlaw basi karawaton niyo an ginsaaran nga hihimoon ha iyo han GINOO nga iyo Dyos ngan magsasaad kamo hin pagtuman han mga katungdanan hini,

¹³basi himoon kamo yana han GINOO nga iya mga tawo ngan magin Dyos hiya niyo, sumala han iya iginsaad ha iyo ngan kanda Abraham, Isaac, ug Jacob nga iyo kaapoy-apoyan.

¹⁴Diri kamo la an ginhihimoan han GINOO hini nga ginsaaran upod an mga turumanon hini.

¹⁵Ginhihimo ini niya ha aton ngatanan nga natukdaw dinhe ha iya atubangan yana nga adlaw, ngan ha aton liwat mga tulin nga waray pa magkatatawo.

¹⁶“Mahinunumdom kamo han mga kakurian nga aton gin-antos didto ha Ehipto, ngan han aton paglatas han katunaan hin iba nga mga nasod.

¹⁷Hinkit-an niyo an ira makapupungot nga mga diyosdiyos nga kahoy, bato, salapi ug bulawan.

¹⁸Talinguhaa niyo nga waray lalake, babaye, panimalay, o tribo nga natukdaw dinhe yana nga adlaw nga mabaya han GINOO nga aton Dyos ngan magsingba han kadiyosan han iba nga mga nasod. Bangin mamay-ada usa ha iyo nga masugad hin mapait ug makahihilo nga gamot para han mga tawo.

¹⁹Talinguhaa niyo nga waray usa dinhe yana nga adlaw nga namamati hini nga baraan nga mga turumanon, nga tungod kay ginbendisyonan na man hiya, magpapasagad na la hiya han iya kalugaringon nga paagi. Makakapuo ini ha iyo ngatanan, magmaupay ug magmaraot kamo.

²⁰Diri mapasaylo an GINOO hin sugad nga tawo. Susunogon lugod kamo han naglalaga nga kasina han GINOO ngan mangangada ha iya an ngatanan nga gaba nga nahisurat dinhe hini nga basahan, tubtob han nga mapara han GINOO an iya ngaran.

²¹Hihimoon hiya han GINOO nga usa nga pananglitan ha atubangan han ngatanan nga mga tribo han Israel, ngan ipapadara ha iya in karat-an sumala han ngatanan nga mga gaba kon tunglo han ginsaaran nga nahisurat dinhe hini nga basahan han mga pagturon-an han GINOO.

²²“Ha tiarabot nga panahon makita an iyo mga tulin ngan mga lumalangyaw nga tikang ha higrayo nga mga tuna han mga karat-an ngan mga pag-antos nga ginpadara han GINOO ngada han iyo tuna.

²³Magigin bangkil nga kamad-an an kaumhan, nga luob hin asupre ug asin; diri gud katatamnan, ngan waray maturok didto bisan kabanwaan. Masusugad an iyo tuna han mga syudad han Sodoma ug Gomora, han Adma ug Seboiim nga ginbungkag han GINOO tungod han duro na gud nga kasina.

²⁴Niyan mapakiana an bug-os nga kalibutan, ‘Kay ano nga an ira tuna ginbungkag man han GINOO? Ano an hinungdan han iya mapintas nga kasina?’

²⁵Ngan amo ini an baton, ‘Tungod kay ginsupak han mga tawo han GINOO an ginsaaran nga ira ginhimo ha iya nga Dyos han ira kaapoy-apoyan, han pagpagawsa niya ha ira tikang ha Ehipto.

²⁶Nag-alagad hira hin iba nga kadiyosan nga waray pa gud nira hadto pagsingbaha, kadiyosan nga igindiri ha ira han GINOO hin pagsingbaha.

²⁷Sanglit nasina han iya mga tawo an GINOO ngan iginpadara ngada han ira tuna an ngatanan nga mga karat-an nga nahisurat dinhe hini nga basahan.

²⁸Napungot hin duro an GINOO, ngan ha iya dako nga kasina, ginpaiwas hira niya tikang han ira tuna ngan gihalen hira nga bihag ngadto hin usa nga langyaw nga tuna, ngan aadto pa hira yana nga adlaw.’

²⁹“May mga butang nga gintago han GINOO nga aton Dyos; kundi iginpadayag niya an iya Balaod, ngan pagsusugton ini naton ngan han aton mga tulin ha kadayonan.