Read Waray Samarenyo Meaning Based Deuteronomio 30 Bible Online

Deuteronomio 30 - Waray Samarenyo Meaning Based bible

Deuteronomio 30

¹“Pinapagpili ta kamo yana han iyo karuyag: bendisyon kon tunglo. Kon nahinabo na ha iyo ini ngatanan, ngan nag-uokoy na kamo dida han mga nasod nga diin iginpasarang kamo han GINOO nga iyo Dyos, mahinunumdom kamo han iginpapili ko ha iyo.

²Kon bumalik kamo ngan an iyo mga tulin ngadto han GINOO, ngan pagsugton niyo hin kinasingkasing an iya mga sugo nga ihinahatag ko ha iyo yana nga adlaw,

³niyan malolooy ha iyo an GINOO nga iyo Dyos. Igbabalik kamo niya tikang han mga nasod diin iginpasarang kamo, ngan magmamainuswagon na liwat kamo.

⁴Bisan kon ginpasarang kamo ngadto han gihihigrayoi nga mga sidsid han tuna, titirokon kamo han GINOO nga iyo Dyos ngan ibabalik kamo,

⁵basi pagtag-iyahon na liwat niyo an tuna nga gin-ukyan hadto anay han iyo kaapoy-apoyan. Ngan magmamainuswagon ngan magdadamo kamo labaw pa kay han iyo kaapoy-apoyan.

⁶Mahatag an GINOO nga Dyos ha iyo ngan han iyo mga tulin hin masinugtanon nga mga kasingkasing, basi higugmaon hiya niyo ha bug-os nga kasingkasing, ngan magpadayon kamo hin pag-ukoy didto hito nga tuna.

⁷Iya ikakadto ini ngatanan nga mga pagtunglo ha iyo mga kaaway nga nagdumot ngan nagraogdaog ha iyo,

⁸ngan magsusugot na liwat kamo ha iya ngan magtutuman han ngatanan niya nga mga sugo nga akon ihinahatag ha iyo yana nga adlaw.

⁹Pagpapakaupayon kamo han GINOO dida han ngatanan nga ginbubuhat niyo; mamamay-ada niyo damo nga mga anak ngan damo nga kabakahan, ngan magdadamo an mga abot han iyo kaumhan. Malilipay an GINOO hin pagpauswag ha iyo sugad nga nalipay hiya hin pagpauswag han iyo kaapoy-apoyan,

¹⁰kundi kinahanglan magsugot kamo ha iya ngan magtuman kamo han ngatanan niya nga mga balaod nga nahisurat dinhe hini nga basahan han iya mga pagturon-an. Kinahanglan bumalik kamo ngadto ha iya ha bug-os niyo nga kasingkasing.

¹¹“Diri makuri hin duro o mahihimo niyo hin pagtuman an sugo nga ihahatag ko ha iyo yana nga adlaw.

¹²Diri ini aadto ha langit. Sanglit diri kamo kinahanglan pumakiana, ‘Hin-o in masaka ngadto ha langit ngan magdadara hini nganhi ha aton, basi makabati ngan makagsugot kita hini?’

¹³Diri man ini aadto ha tabok han kalalawdan. Sanglit diri kamo kinahanglan pumakiana, ‘Hin-o in matabok han kalalawdan ngan magdadara hini nganhi ha aton, basi makabati ngan makagsugot kita hini?’

¹⁴Diri, aada ini ha iyo. Aada ini ha iyo mga im-im ug kasingkasing, sanglit tumana ini niyo yana.

¹⁵“Yana nga adlaw ginpapagpili ko kamo han iyo karuyag: maupay o maraot, kinabuhi o kamatayon.

¹⁶Kon pagsugton niyo an mga sugo han GINOO nga iyo Dyos,[27] nga ihahatag ko ha iyo yana nga adlaw, kon iyo paghigugmaon hiya, pagsugton hiya, ngan pagtumanon an ngatanan niya nga mga balaod, niyan maghihingaupay kamo ngan mahihimo kamo nga usa nga nasod hin damo nga mga tawo. Bebendisyonan kamo han GINOO nga iyo Dyos didto han tuna nga iyo na pagtatag-iyahon.

¹⁷Kundi kon sumupak ngan dumiri kamo hin pamati, ngan mahimulag kamo ngadto hin pagsingba hin iba nga kadiyosan,

¹⁸mapatay kamo—ginpapahimatngon ko kamo yana dinhe. Diri mag-iiha an iyo pag-ukoy didto hito nga tuna nga tabok han Jordan nga iyo na pagtatag-iyahon.

¹⁹Pinapagpili ko kamo yana han iyo karuyag, kinabuhi o kamatayon, bendisyon han Dyos o pagtunglo han Dyos; ngan gintatawag ko an langit ngan an tuna hin pagsaksi han iyo pagpili. Pilia an kinabuhi.

²⁰Higugmaa an GINOO nga iyo Dyos, pagsugta hiya, ngan pagtumana an iya kaburot-on ngan mag-uokoy kamo ngan an iyo mga tulin hin maiha didto han tuna nga iya iginsaad hin paghatag ngadto kanda Abraham, Isaac, ug Jacob nga iyo kaapoy-apoyan.”