Read Waray Samarenyo Meaning Based Deuteronomio 33 Bible Online

Deuteronomio 33 - Waray Samarenyo Meaning Based bible

Deuteronomio 33

¹Amo ini an mga bendisyon nga iginyakan ni Moises nga tawo han Dyos ngadto han mga tawo han Israel han waray pa hiya kamamatay.

²Inmabot an GINOO tikang ha Bukid Sinai; sinmirang hiya sugad han adlaw ha igbaw han Edumea, ngan ginpawaan niya an iya mga tawo tikang ha Bukid Paran. Kaupod niya in napulo ka yukot nga kaanghelisan, ngan naglalahinggab nga kalayo ha iya too nga kamot.[31]

³Hinihigugma han GINOO an iya mga tawo,[32] ngan sinasalipdan niya an iya kalugaringon nga bungto. Sanglit mayukbo kita ha[33] iya tiilan, ngan masugot han iya mga sugo.

⁴Masugot kita han Balaod nga iginhatag ha aton ni Moises, an gimamahali nga manggad han aton nasod.

⁵An GINOO nahimo nga hadi han iya mga tawo nga Israel, han pagkatirok han ira mga tribo ngan mga pangulo.

⁶Nagsiring hi Moises mahitungod han tribo ni Ruben: “Diri unta mapuo hi Ruben, Bisan kon gutiay la hira nga mga tawo.”

⁷Nagsiring hiya mahitungod han tribo ni Juda: “O GINOO, pamatii an ira pakibulig; Itampo na liwat hira han iba nga mga tribo. Pakig-away para ha ira, O GINOO, Ngan buligi hira kontra han ira mga kaaway.”[34]

⁸Nagsiring hiya mahitungod han tribo ni Levi: “Ipinapasabot mo, O GINOO, an imo kaburot-on pinaagi han Urim ug Tumim[35] nga ginbabantayan han mga Levita nga matinumanon mo nga mga surugoon; Ginsarihan mo hira didto ha Masa, Ngan hinsabotan mo nga matinumanon hira didto han katubigan han Meriba.

⁹Nagpakita hira hin darudako nga pag-ugop ha imo Kay han ira mga kag-anak, kabugtoan nga kalalaken-an, o mga anak. Ginsugot nira an imo mga sugo, Ngan nagmatinumanon hira han imo ginsabotan.

¹⁰Pagtututdoan nira an imo mga tawo hin pagsugot han imo Balaod; Maghahalad hira hin mga halad nga tutuboron dida ha imo altar.

¹¹O GINOO, buligi an ira tribo hin basi magmakusog; Pagmalipayon tungod han ira mga buhat. Dugmoka an ngatanan nira nga mga kaaway; Ayaw na gud hira pabangona.”

¹²Nagsiring hiya mahitungod han tribo ni Benjamin: “Amo ini an tribo nga hinihigugma ngan pinananalipdan han GINOO; Iya binabantayan hira ha bug-os nga adlaw, Ngan aada hiya ha ira butnga.”[36]

¹³Nagsiring hiya mahitungod han tribo ni Jose: “Bendisyonan unta han GINOO hin uran an ira mga uma, Ngan hin tubig nga tikang ha ilarom han tuna.

¹⁴Bendisyonan unta an ira tuna hin mga bunga nga ginpahinog han adlaw, Nga hura han gimamag-upayi nga mga bunga han kada panahon hin panguha.

¹⁵Maluob unta hin pinili nga mga bunga an kadaan nira nga kabungtoran.

¹⁶Mapuno unta an ira tuna han ngatanan nga mag-upay, Nga ginbendisyonan pinaagi han pagkamaupay han GINOO, Nga nagyakan tikang han naglalaga nga tanom. Mahingadto unta ini nga mga kaupayan ngadto han tribo ni Jose, Kay amo hiya an pangulo han iya kabugtoan nga kalalaken-an.

¹⁷May kusog hin usa nga baka nga todo hi Jose, May mga sungay hin ihalas nga baka. An iya mga sungay amo an mga yinukot nga sondalo ni Manases, Ngan an mga tinag-10 ka yukot nga sondalo ni Efraim. Pinaagi hini sinusungay niya an mga nasod. Ngan ginduduso hira ngadto han mga sidsid han tuna.”

¹⁸Nagsiring hiya mahitungod han mga tribo nira Zabulon ug Isacar: “Magmainuswagon unta hi Zabulon dida han ira pagpatigayon ha dagat, Magdamo unta an manggad ni Isacar didto han ira mga balay.

¹⁹Nagdadapit hira hin mga lumalangyaw ngadto han ira bukid, Ngan hira ngadto han angay nga mga halad, An ira manggad kinukuha ha kadagatan, Ngan an tinago nga manggad ha ligid han baybayon.”

²⁰Nagsiring hiya mahitungod han tribo ni Gad: “Pagdayawon an GINOO nga nagpahiluag han ira katunaan. Nagama hi Gad sugad hin usa nga liyon, Pinapang-it niya an butkon ngan an panit ha babaw han ulo.

²¹Nagpili hira han gimamaupayi han tuna para han ira kalugaringon; Iginahin ha ira an katungod hin usa nga pangulo. Ginsugot nira an mga sugo ngan balaod han GINOO, Han pagkatirok han mga pangulo han Israel.”[37]

²²Nagsiring hiya mahitungod han tribo ni Dan: “Hi Dan amo in usa nga nati nga liyon; Nalukso hiya tikang ha Basan.”

²³Nagsiring hiya mahitungod han tribo ni Neftali: “Ginhura hin kaupayan hi Neftali, tungod kay ginpalabi hiya han GINOO; Naabot ha timogan an ira tuna tikang ha Lanaw Galilea.”

²⁴Nagsiring hiya mahitungod han tribo ni Aser: “Ginpakaupay hi Aser labaw kay han iba nga mga tribo. Higugmaon unta hiya han iya kabugtoan nga kalalaken-an, Ngan mahura unta an iya tuna hin olibo nga kakahoyan,

²⁵Mga puthaw an mga trangka han nga mga ganghaan, Ngan dayuday nga himyang an iya pag-ukoy.”

²⁶Mga tawo han Israel, waray diyos nga sugad han iyo Dyos, nga nagtatarap han bug-os nga kalangitan, nga naglalatas han kadampogan hin pagbulig ha iyo.

²⁷An Dyos amo an dayuday niyo nga panalipod an iya dayon nga mga butkon amo an nahawid ha iyo. Gintabog niya an iyo mga kaaway han pagsulong niyo, ngan ginsugo kamo hin pagpuo ha ira ngatanan.

²⁸Sanglit maukoy ha kalinaw an mga tulin ni Jacob, nga himyang didto hin usa nga tuna nga puno hin pagkaon ug bino, diin an tun-og ha langit amo an nagbabaribi han tuna.

²⁹Hin pagkamalipayon nimo, Israel! Waray usa nga sugad ha imo, nga usa nga nasod nga gintalwas han GINOO. An GINOO ngahaw amo an iyo taming ngan an iyo espada, hin pagpanalipod ngan pagpadaog ha iyo. Maabot hin pakimalooy an iyo mga kaaway, ngan iyo hira pagtatamaktamakan.